Sartè u Vennari Santu (2)

Nove ore di sera. Azzingata à u fiancu di a muntagna, fida, fiera è ancu esaltata, Sartè s'appronta à manifestà a so lealtà à Diu, in stu ghjornu di Vennari Santu.
Ogni finestra lucicheghja digià à più pudè è, in i vechji quarti cù e strette scure è scuscese, danu un lume dolce è inguttuppante, ciò chì porghje u misteru chì cunvene à a prucessione ch'ha da passà in isse strette.
Esse fieru di mantene i so usi fendu chì, à traversu l'anni, u Catenacciu, trascinendu e so catene è purtendu a so croce, cumemureghji in u misteru di u so anunimatu, u drama chì, 2000 anni fà, hè sbuccatu annant'à u sacrifiziu di u Golgotha.
Sartè hè di sicuru esaltata, perchè malgradu u caratteru religiosu di a so famosa prucessione, face da sedimentu di ciò chì i seculi barbari anu lasciatu.
Nata, si dice, da a penitenza ch'un assassinu penitente vulìa fà, ne hà mantenutu cum'è a so ombra passendu torna sopr'à ella.
Mà, guardemula passà, è lascendu accantu stu ricordu appena penosu, ammiremu solu a fervore di i fidi è e voce zitelline chì cantanu u " Perdono mio Dio ". È si a croce, purtata da i penitenti i neri, ci ramenta u sensu prufondu di sta manifestazione, ci vole à dì chì u capuchju ùn piatta micca sempre un'assassinu, ma dinù un fidele semplice chì vole umiliassi davant'à Diu, o forse una persona vulendu ringrazià u Celu per una grazia divina, è ch'ùn hà a paura di strappassi i pedi annant'à e petre di u caminu.
Seguitata da a populazione sana, in u so quadru medievale, sta prucessione strazieghja per truvà un passu à traversu a folla zeppa. Ma, seria è serena, si lascia mitraglià da i " flashs " di i ritrattadori è di i sineasti gulosi di fiure, mustrate in u mondu sanu.
È ghjè appuntu in ciò ch'ella tene di tantu pitturescamente arcaicu ch'ellu ci vole à vede l'attraenza annant'à a maiò parte di i turisti chì, tutti l'anni, si stringhjenu in Sartè. Certi, cù una sensibilità più suttile, ne cunservanu un'impressione cumuvente è durevule.
Ùn puderemu mai ringrazià abbastanza i Sartinesi di a so passione di l'usi anziani, è di l'ardore à falli campà.


Un travagliu da Petru-Ghjuvanni Bresciani
(Testu uriginale esciutu in francese in a rivista
d'infurmazione culturale "U Muntese ", Nu 109 , 1966)
(Ritratti di Anghjula Ghjiseppa Bresciani Paoli)