I Stati Uniti festighjeghjanu stu 4 di lugliu di u 2026 u 250u anniversariu di a so indipendenza chì u testu fundatore hè ispiratu da a perioda paolista. A nutizia si trova in a rivista di u famosu Washington Smithsonian institution, un’istituzione di ricerca scientifica. Cusì dice dinù Charles J. Balesi chì campa trà Stati Uniti è Corsica è chì unu di l’antenati era frà i primi partigiani di u Babbu di a Patria. Stu membru fundatore di Corsica Diaspora cù Edmond Simeoni cunsidereghja chi i ‘Babbi fundatori di i Stati Uniti”, autori di a Dichjarazione d’indipendenza sò stati influenzati da l’opera pulitica di Pasquale Paoli. Un fattu storicu chì hè u sugettu d’un articulu ind’u numeru d’aprile-maghju 2026 di a rivista Smithsonian, publicata da u centru di ricerche Washington Smithsonian institution. St’articulu insegna chi a Custituzione corsa di u 1755 hà ispiratu quella di l’USA è sprime a pussibilità ch Pasquale Paoli sia ancu ellu “Babbu fundatore”. Sò evucati sumiglie trà i testi di e custituzione corsa è americana fundati tramindui nant’à “i valori di u seculu di i Lumi”.  U rolu di a Corsica in st’anniversariu d’indipendenza hè rammentatu cusì à l’Americani. 

L’articulu conta a vita di Pasquale Paoli, u rolu di u scrittore scuzzese James Boswell diventatu amicu di Paoli. D’altronde, u racontu ch’ellu face Boswell di a so visita in Corsica in u 1765, publicatu u listessu annu, fubbe un successu di vendita in Inghilterra è in e culunie inglese d’America. Culunie induve Ebenezer Mackintosh, persunalità di a perioda rivuluziunaria americana contr’à u putere di a curona inglese, chjamò u so figliolu Paschal Paoli Mackintosh in umagiu à l’”eroe rivuluziunariu corsu”. Una leia palesa dunque trà Paoli è i Stati Uniti permettendu di scumette chi a Corsica truverà a so piazza, puru s’ella hè chjuca, durante e manifestazione di fervore patriotticu americanu pè festighjà u 250u anniversariu di a dichjarazione d’indipendenza di u so paese.