Stéphane Casalta si n’hè andatu à l’altru mondu di manera subbitanea, mentre ch’ellu si truvava in Arles. Avia 56 anni. Uriginariu di Santa Riparata di Balagna, era autore, cumpunidore, interpretadore. Fundatore di u gruppu Giramondu in u 1993, avia participatu da giovanu à l’emmergenza di u gruppu A Filetta in l’anni ottanta. In u 2001, escia un primu dischettu “Una preghera”. In u 2018, hà creatu u spettaculu « Canti a Lucendiluna » cù a curale taliana Armonioso in canto. Hà fattu esce dui dischetti sott’à u titulu « Animantiga ». U primu hè statu finalistu di i premii Tenco è Loani in u 2019. Hà fundatu un duettu Magicanima cù a canterina argentina Rosela Libertad, a so musa.  Stéphane Casalta hà cullaburatu cù numerosi canterini corsi è d’altrò. Girava u mondu, soprattuttu l’Italia. U mondu di a cultura corsa chì li tenia tantu à core, hè in dolu