In u quadru di e cumemurazione pè i 300 anni di a nascita di Pasquale Paoli (1725-1807), u museu di Merusaglia organiseghja, in più di a mostra evenimentu “ Pasquale Paoli, 300 anni ! C’era una volta un Capu di Statu”, un cullocchiu scientificu maiò "A Corsica è i Corsi ind’e timpeste di u XVIIIesimu seculu". Serà luni u 14 di lugliu, u ghjornu di u 270u anniversariu di l’elezzione di Paoli cum’è Capu Generale di a Nazione.

St’elezzione in u 1755 hè u simbulu d’una sperienza pulitica nova in Europa : a nascita d’un Statu isulanu fundatu nant’à una custituzione republicana è i so principii di suvranità pupulare, d’educazione publica è di libertà civile. Bellu nanzu e rivuluzione americana è francese, a Corsica diventa sott’à Paoli un mudellu di guvernu à tempu arradicatu in e so rialità culturale è orientatu versu i curenti nuvatori di u pensamentu europeu. 

U museu di Merusaglia hà da addunì universitarii, storichi, cercadori, specialisti internaziunali travagliendu nant’à a storia corsa, e rivuluzione, è e persunalità pulitiche di i Lumi. Seranu studiati i sfarenti aspetti di a stonda paolina : a so purtata custituziunale, a so piazza in a diffusione di l’idee sparte in Europa, a so influenza nant'à e lotte pè a libertà in altri territorii è a memoria di u so nome sin’à a nostra epuca.  E cumunicazione pruposte presenteranu una lettura rinnuvellata di l’azzione pulitica di Paoli, di a so reta d’influenza intellettuale, a singularità di a Rivuluzione corsa in u cuntestu dii i scunvuglimenti maiò di u XVIIIesimu seculu. A u prugramma dinù, u pensamentu di u babbu di a Patria ricunnisciutu in Inghilterra induv’ellu hà campatu in esiliu, è à i Stati Uniti induve parechje cità si chjamanu Paoli in umagiu à i so ideali republicani. D’altronde un riprisentante di a cità di Paoli City in Pennsilvania Ed Auble, serà presente à u cullocchiu. Dopu à stu scontru, l’atti di u cullocchiu seranu publicati.