U gruppu Eppò hè felice d’annunzià vi l’esciuta di u so secondu dischettu « D’ogni culore».

Dopu à sei mesi di un lavoru sustenutu vi vulemu offre dece tituli novi.

D’ogni culore, d’ogni savore, squiziti -à speremu-, nustrali -di sicuru-, allegri -cum’è sempre-.

Sta cuprendula hè l’opera di Flo Giordano. Flo hà trovu a manera ghjusta di dipingne l’universu di Eppò. Una campa !

Dinù a canzona « d’ogni culore » hè stata scritta da Patrizia Gattaceca. Ella dinù hà trovu e parolle ghjuste pè dichjarà chì u sintimu di l’amore è di a fratellanza ùn ponu avè culore. L’amore hè un arcubalenu.

Per festighja ‘ssa ghjunta vi demu appuntamentu vendari 2 di maghju à sei ore è mezu di sera davanti à a scola Sparti Musica in Bastia (2 rue des Zéphirs) pè tucca u vichjeru di l’amicizia.

Trè anni di spartera felice di l'emuzione durante u cuncertu cù i publichi, amichi, cumpatriotti, ghjente di quì è d'altrò nant'à e scene di Corsica è di u cuntinente. E nove canzone sò in u filu di u primu dischettu è ritimi affascinanti. Meludie cù culori luntani chì rimandanu à paisaghji di quì o à viaghji luntani. I strumenti tradizunali corsi si mischjanu armuniosamente cù sunurità d'oghje. Secondu l'estru di diverse musiche, facenu suffià un trattu mediterraniu o un libecciu tremendu à scurnà ogni capra di u paese ! A canzona d’"Ogni culore" brama chì ogni paese cù i so culori è e so razze, tessi una musaica unica induve a tulleranza è a misticcera arricchiscenu a cultura umana.