Dapoi qualchì ghjornu, in Cervioni, a storia di a cumuna si ritrova nant’à un affrescu maiò mettendu in risaltu persunalità emblematiche chì anu ammanitu u passatu è lacatu una lascita à longu andà. Cusì, e memorie lucale anu a so riprisentazione artistica. Un’inchiesta di terrenu hà permessu di raccoglie infurmazione pè riprisentà i tratti singulari di ste memorie. Hè stata cundutta da a squadra di cercadori di u Prugettu Paoli-Napulione di l’università di Corsica. Un prugettu iniziatu da Jean-Guy Talamoni in cullaburazione cù u laburatoriu UMR LISA, presidatu da Geniu Gherardi è cù u sustegnu di l’ADECEC. 

L’artistu Hugo Peters dettu Piombu hà messu in forma stu travagliu. Da Teodoru di Neuhoff, Pasquale Paoli à Napulione Bonaparte, st’affrescu invita à riflette nant’à un passatu cumunu, à stimà e rialisazione di ste persunalità storiche è à capì a so influenza nant’à a cultura identitaria. L’affrescu illustra l’impurtanza di priservà è trasmette u patrimoniu à e generazione future. U teritoriu di Costa Verde hà accunsentitu è purtatu stu prugettu chì hè a prima rialisazione cuncreta. Altri seguiteranu in Corsica pè un pelegrinaghju cumemurativu di a storia isulana. 

In u quadru di a so tesa nant’à a memoria, Marcandria Peraut, dutturante à l’Università di Corsica, hà datu à l’artistu Piombu l’elementi à riprisentà nant’à st’affrescu. Ghjè dinù un omagiu à e donne è à l’omi chì a vita hè fatta di credenze, di tradizione, di miti è di legende. Un omagiu à a grande Storia è quella micca scritta. Oghje ghjornu, Teodoru di Neuhoff, disprezzatu in a litteratura di u 18u seculu, ripiglia i so diritti ind’è ellu in Cervioni, vicin’à Paoli è Matra. Infine, un QR codice serà creatu pè dà spiecazione storiche nant’à l’affrescu.