St'associu, chì festighjerà i so dece anni in u 2026, hè statu creatu da Nathalie Vasta-Simonetti è Luc Vadi. Oghje, ci participeghjanu una cinquantina di giovani da 5 à 18 anni diretti da Nathalie Vasta-Simonetti, Lisandru Bellagamba è Dumè Peretti. Facenu i corsi di cantu i marti, ghjovi, venneri è sabbatu è altre animazione cù l’aiutu preziosu di genitori in un lucale messu à dispusizione da a municipalità. Dapoi a so creazione, Ghjuventù Cerviuninca hà rialisatu più d’una centinaia di prestazione in Cervioni ma dinù in sfarente cumune di Corsica è d’altrò. Hà vintu dinù u cuncorsu naziunale di a Mutualità Suciale Agricula in u 2024 pè u so prugettu di cumedia musicale “Da eri à oghje”. Un bellu viaghju in e canzone corse d’eri à oghje.

Pè e feste di fine d’annata, a scola di cantu serà presente à u mercatu di Natale di Cervioni u 30 di nuvembre è hà da prupone un cuncertu di Natale u 13 di dicembre. L'annu 2026 serà quellu di i so dece anni. In st’occasione, escerà un dischettu cù quattru tituli. Hè previstu un scontru cù a scola di cantu d’Aiacciu durante e vacanze di Pasqua, un viaghju in Montpellier di maghju è à u paese bascu d’ottobre. Grazia à e municipalità di Cervioni è d’altre di Costa Verde, di e persone, a vendita di e vultate durante i mercati è fiere, l’associu pò campà. Sì vo vulite aiutallu, chjamate u 06 34 14 15 00.