Corsica Cristiana, 2000 anni di Cristianisimu

L'espusizione, chì s'aprerà à u museu di Corti u 30 ghjugnu, è chì si tenerà sin'à u 30 dicembre 2001, custituisce una cuntribizione à a cunniscenza di quindeci seculi di a storia di a Corsica. Sò dunque cusì quindeci seculi di vita cristiana, cumpunente fundamentale di a nostra storia, ch'ella serà cunsacrata l'espusizione ritracciendu e grandi periode di a cristianizazione di l'isula. À l'iniziativa di a CTC in prisenza di Rémi Froment, secretariu generale, Marie-Eugénie Poli-Mordiconi, rispunsevule scientifica, Catherine Mortier, scenografica incaricata di l'espusizione, Philippe Pergola, cummissaru di l'espusizione, tenenu à testimunià di l'ingagiamentu di Jean Baggioni, presidente di l'esecutivu di a Cullettivà Territurale di a Corsica. U publicu porrà scopre e prime testimunianze di u cristianisimu in Roma, chì sò state esposte in e principale manifestazione internaziunale nant'à u cristianisimu primitivu, opere chì pruvenenu da i grandi musei rumani, da u museu di u Louvre in Parigi è Brescia.

L'Isule di u Mediterraniu
Ghjè u Mediterraniu insulare chì serà a l'onore di l'espusizione. À più parte di l'oggetti è di i travagli esposti cuncernanu essentialmente a Corsica ch'elli sianu d'aspettu storicu, archeologicu, di scritti, d'opere d'arte cum'è munimenti, sculture, quadri, orificeria, tissuti, a musica è canti religiosi. A storia muderna cuntempuranea occuperà una piazza impurtante cù e cunfraterne. 500 metri quadrati sò cunsacrati à l'espusizione « Corsica Cristiana ». Omu si pò imaginà u vetru innoratu u più celebre di i musei di u Vaticanu, ritratti di San Petru è San Paulu, riquadri di u sulaghju in musaiche di a catedrale paleocristiana di Mariana, u capitellu riprisentendu a crucifissione di Santa Ghjulia, e pianete in seta orientale ricamate in Genuva, e testimunianze imprestate da e cunfraterne, è l'oggetti d'orificeria.

A cunfidenza di i musei
A cunfidenza di i musei chì anu imprestatu s'opere cum'è quellu di u Vaticanu, di a Ghjesa taliana, di e ville di Roma, Brescia, Echisi, di u Louvre, sò eloquenti. L'autori di u catalogu è i rapurtatori di u cullocchiu sò circatori internaziunali ricunnusciuti da l'Università di Corti, ma dinù da altre università è centri di ricerche francesi, taliani, o di a cità di u Vaticanu. Frà i quali: André Vauchez di l'Accademia Francese, direttore di a Scola Francese di Roma, Fabrizio Bisconti di l'Accademia Puntificale rumana d'archeolugia, secretariu di a cumissione puntificale d'archeolugia sacra.

Cullocchiu internaziunale
Da u 30 ghjugnu à u 4 lugliu u museu urganizeghja à l'Università di Corsica un cullocchiu internaziunale apertu à tutti, a participazione hè gratisi. Trenta cinque prufessori è circatori specialisti di a storia di a ghjesa mediterranea, storichi, archeolochi, archivisti, storichi d'arte specialisti di u sonu è antropologhi seranu l'intervenenti di istu cullocchiu. Duie ghjurnate seranu cunsacrate a e visite, a prima a dumenica 1 lugliu :”Da Mariana à Bastia”, nant'à u situ archeologicu di a Canonica in Lucciana, è in Bastia cù a visita di i principali tesori d'arte sacru di a villa, in seratinata cunferenza di Mr André Vauchez, u tema: “saints de Méditerranée”. A seconda ghjurnata marcuri 4 lugliu in Aiacciu à u museu Fesch, è i tesori d'arte sacru di a villa. A serata serà cunsacrata à a musica religiosa animata da u gruppu Caramusa.

A Chjesa di Corsica à u core di a Chjesa universale
U cullocchiu internaziunale chì accumpagna l'espusizione " Corsica Cristiana " s'hè apertu à a facultà di dirittu di l'Università di Corti nant'à u tema : " a Chjesa di Corsica, a Chjesa di u Mediterraniu, a Chjesa universale ". Durante cinque ghjorni omu porrà riflette nant'à a piazza è l'implicazione di a Chjesa Corsa à u core di a Chjesa universale. Cunferenze è visite di u patrimoniu custituisceranu tante vistiche d'infurmazioni è di riflessioni pè u publicu. " A Chjesa hà una piazza impurtante in Corsica, riprisenta circà 80% di u nostru patrimoniu ", dice Filippu Pergola, rettore di l'istitutu puntificale d'archeolugia cristiana è cumissaru di l'espusizione. " Istu cullocchiu ghè u risultatu logicu di trè anni di preparazioni di stù cungressu. Custituisce un cumplementu di travagliu chè no avemu furnitu per stabilì u statu di i lochi di ricerca. Ci permette d'andà al di là di a riflessione, i circatori ponenu e base, ripiazzanu a chjesa di Corsica in un novu cuntestu. S'agisce cusì d'apre un dibattitu destinatu à lancià future ricerche ". Ista valurizazione di u patrimoniu culturale insulare derà un secondu soffiu à a riflessione storica nant'à a Corsica di i quindeci seculi scorsi. " Era ben insesu u mumentu d'urganizà un evenimentu d'una tale impurtanza, in oltre e ricerche in corsu, è una presa di cuscenza attualmente in a cuntinuità d'una storia insulare, chì s'inscrive in u cuntestu di u Mediterraniu più chè in quellu d'una Francia cuntinentale ", sottulineeghja u direttore di a scola francese di Roma, Mr André Vauchez. " U scopu di a manifestazione custituisce non soladimente à fà u puntu, mà dinù à stimulà e ricerche. Resta ben insesu una mansa di ricerche à fà soprattuttu in archeolugia medievale ", percizeghja André Vauchez. " Ci hè una presa di cuscenza lucale nant'à l'impurtanza di megliu capì stì fenomeni, quella d'ammaestrà u so passatu per entre in l'avvene ". L'evenimentu hè impurtantissimu in fatti ghè a prima volta quelli sò reuniti l'elementi di u patrimoniu di a cristianità insulare. L'impurtanza è a qualità di l'intervenenti chì participeghjanu à u cullocchiu. " Ghjè a prima volta quellu s'intraprende una riflessione d'inseme nant'à 2000 anni di cristianisimu in Corsica ". L'idea d'assucià l'espusizione nant'à e ricerche di l'arte religiosu in Corsica incù un cullocchiu universitariu hè una dimarghja nova è uriginale. A storia religiosa Corsa hà un ritardu per via di e vicende di a storia, è l'archivie chì sò spaperse. Un ritardu chì a riflessione permetterà di cumpensà à l'occasione di ste ghjurnate, hè chì averebbi per scopu di rilancià un travagliu di memoria.

San Ghjuvà à a fonoteca di Corti : a religione à l'onore
E cunferenze organizate da a fonoteca à u Museu di a Corsica in u quadru di a decesima edizione di a festa di " San Ghjuvà " in giru a u tema di a tradizione orale di i canti religiosi. Cunferenze scelte in preambulu à l'espusizione " Corsica Cristiana ". " U tema hè d'altronde in raportu cù l'innu a San Ghjuvan Battista chì hà servutu di basa à u sulfegiu ", preciseghja Bernardu Pazzoni etnomusicologu, rispunsevule di a fonoteca di u Museu di a Corsica. " A scelta s'hè fatta di manera paradossale, postu chì a tradizione orale ùn hà bisognu di solfegiu ". Artisti, circatori, musicanti, pueti o puru semplici visitatori si sò cuncolti à a citadella di Corti per una seria di cunferenze d'alta qualità. E tradizioni orale di a musica religiosa di u Mediterraniu sò stati passati à u stacciu fine da specialisti cum'è : Jean-Claude Sillamy, cumpunitore, duttore in musicolugia è duttore in lettere è arti, u padre Athanasios Armos cantore à l'Exarchat Grecu catolicu, specialistu di e mode bisantine, u padre Naamtallah Khoury, maestru di cappella à u vicariatu Maronitu Notre Dame di u Libanu, Francescu Berlinghi, etnomusicologu, prufessore d'educazione musicale, Jean-Claude Chabrier, insegnante à a Sorbona, Christine Biancarelli, duttore à a Scola di l'alti studii in scienze suciali di Marseglia. Cunferenze chì anu affascinatu l'attenzione di u publicu. Dice Bernardu Pazzoni : " U scopu di a manifestazione hè di reunì persone di differenti orizonti ingiru à a musica tradiziunale, affine di fà capì megliu l'impurtanza di a tradizione orale in Corsica ". In seguitu à stà parte teorica, a serata s'hè compia cù un cuncertu di canti liturgichi à a ghjesa di l'Annunziata.

U primu CD di a Fonoteca di Corti
Intitulatu « Canti religiosi corsi » istu discu accumpagnerà u catalogu di l'espusizione « Corsica Cristiana », sabbatu, à u museu di a Corsica. A fonoteca di u Museu di a Corsica hè una vera memoria di a tradizione orale corsa, ringhjude quattru centu cinquanta ore d'arregistramenti chì si ponu cunsultà sopr'à piazza, cunsacrate à u cantu religiosu. L'esciuta di stù CD hè prugrammata pè u 30 ghjugnu ghjornu di l'inaugurazione di l'espusizione « Corsica Cristiana ». Intitulatu « Canti religiosi corsi » cumprende un documentu ecceziunale di Felice Quilici, chì ghjè statu depusitatu sottu à forma di copie à u Museu di a Corsica, arregistramentu fattu nant'à un magnetofunu à filu d'acciaiu à u principiu di l'annate cinquanta, in a ghjesa di Moita, e voci sò di : Carl'Andria Follini (seconda), Antone Alerini (terza), Martinu Valesi (bassu). D'altri ducumenti più recenti sò stati arregistrati in Ota, Zoza, Ciamanacce è Ortu, in l'annate settanta da l'etnomusicologu sguizzeru Markus Römer. Incù « Canti religiosi », a fonoteca apre cusì e porte a u patrimoniu di a tradizione orale corsa. Un'inziativa interressante chì porrebbi esse rinnuvellata.