Canari
u cunservatoriu di u vestitu corsu

 

 

In u cunventu San Francescu di Canari, in Capicorsu, u cunservatoriu di u vestitu Corsu presenta una cullezzione impurtante di vestiti di u 19u seculu (1840-1900). Stu museu hè unicu in Corsica.

 

Sti custumi sò stati ricustituiti da l'attellu di cusgitura di l'associu, « Anima Canarese» nant'à i travaglii fatti da M. Rennie Pecqueux-Barboni.

 

Yves Pellegrini, smaritu in u 2007, era u presidente di l'associu « Anima Canarese » avia avutu l'idea originale di creà stu museu in u 1995, cù a cullaburazione di Jean Klein.

 

Dipoi dui anni, dece donne à a ritirata si reuniscenu ogni marti per cunfezziunà i vestiti di i tempi andati. A municipalità di Canari hà messu à a dispusizione di ste persone un locale di l'anzianu cunventu franciscanu.

 

 

 

Una cullezzione di dodeci custumi hè esposta per una mostra permanente chì rinvivisce i vestiti Corsi pocu cunnisciuti di i nostri antenati. I mudelli esposti sò ricustituzioni fide è precise fatte da l'attellu di cusgitura di u sgiò Pecqueux Barboni, etnologu è specialistu ricunnisciutu di u vestitu Corsu anzianu. E creazioni permettenu di sbugiardà a rinomina di u vestitu feminile neru chì a litteratura hà diffusatu. In fatti, u vestitu neru s'hè affaccatu solu dopu à u principiu di u 20u seculu. Nanzu i vestiti eranu assai culuriti è lussuosi.

 

 

Al di là di stu cunservatoriu, u scopu hè di creà un veru museu di l'arte è di e tradizioni pupulari.

 

U museu hè frequentatu assai è i so rispunsevuli cercanu à fallu cunnosce da tutti è, in particulare, da i circadori, i studianti, i sculari è da tutte e persone bramose di cunnosce u patrimoniu vestimentariu, elementu di a nostra cultura.

 

 

 

Per ogni rinsignamentu :

 

Tel. : 04.95.37.80.53 o 04.95.37.80.20.

Fax : 04 95 37 84 33

E-mail : mairiecanari@wanadoo.fr