SCRITTI ZITELLINI

SCOLA DI PADULELLA
CM1 : 1980 - 1981 - 1982
MAESTRU : GHJISEPPU LEONI
ADECEC CERVIONI 1995

A raza.
Un ghjornu mi bagnava in mare. Nutendu à capu ciottu aghju vistu una raza tamant'è un paracqua, gialliccia è pichjinata di turchinu nantu à u spinu. Sò scappata è trimava da tantu chì aghju avutu paura d'issu mostru spaventosu.
Fiurenzu, 9 anni

A festa di a Madonna.
L'8 di sittembre sò andata à a festa di a Madonna cù a mo mamma. Avimu seguitatu a prucessione è pregatu. Dopu sò andata à fami un giru à tutti i banchetti di merchenti chì vendianu da beie, da manghjà, panni, scarpi, pignule, guvelli, ghjoculi… Aghju compru una cullana di perle turchine è un anellu cù una perla rossa.
Marielena, 10 anni.

E lasagne.
Dumenica scorsa, avemu fattu e lasagne.
Mamma hà messu a farina nantu à a tavula è l'hà minata cù l'acqua. Quandu a pasta era ripusata, mamma l'hà spianata cù u rotulu, l'hà appezzata è po l' hà messa à coce. Dopu hà scolatu l'acqua è hà savuritu e lasagne di salza di carne è di casgiu grattulatu.
Ci simu liccati !
Anna, 10 anni.

U zoo di Frejus.
Dui anni fà sò andata à u zoo di Frejus. Per entre aghju pagatu cinque franchi. À l'intrata ci hè una baracca duv'omu vende a nutritura per allusingà l'animali.
Aghju vistu oche, sumeri, una mufra, un elefante, scimie è altri animalotti chì vivenu in libertà.
E scimie sò curiose ; facenu i versi quand'omu li passa dinanzu, è s'omu si scorda di chjode e vitture, entrenu nentru è ùn ci lascianu un raschju.
Veronica, 10 anni.

A racolta di e persiche.
Mercuri passatu sò andatu cù babbu à coglie e persiche à l' Acqua Calla. N' avemu coltu parechje casce è l'avemu carcate nantu à a rimorca di u trattore. Dopu simu andati à purtalle à a cuperativa.
Quandu a rimorca hè stata scarca, ci ne simu ghjunti in casa cù a nostra vittura.
Francescu, 10 anni.

U bagnu.
Quand'è no eramu chjuchi, ci lavavamu tutti inseme ind' a bagnarola. Era un ghjocu per noi. Alice, a mo surelluccia era l'ultima à compie è li viutavamu a bagnarola quand'ella era sempre nentru. Tandu stridava cum' è una persa chjamendu à mamma. Avia a paura di smarì cù l'acqua pè u tufone di u scolu.
Patricu, 10 anni.

U pranzu.
Dumenica, sò andata cù mamma è babbu in Cervioni per manghjà ind'è mammone. À tavula ci eranu cannelloni è, à chì
vulia, migliacciole.
Eiu aghju manghjatu pocu, sapendu chì, per compie, ci era una torta di e più bone : era a festa di babbu è, attempu, l'anniversariu di zia.
Natalina, 10 anni.

I cunigliuli.
U mese passatu a nostra cunigliula hà cunigliulatu d'ottu cunigliulucci. U nostru vicinu hà avutu à facci una gabbia maiò per pudè allevalli tutti.
L'avimu mantenuti à rombu di saccate d'erba è di carotte è sò ingrandati prestu.
Ma figuratevi chì eri a nostra cunigliula n'hà fattu torna dece.
Ghjuvannina, 10 anni.

A' coglie l 'erba.
Mercuri sò andata cù u mo fratellu à coglie l'erba pè i cunigliuli. Aviamu un saccu per unu. Eiu strappava ind' una striscia di a vigna è fratellumu strappava ind' un'altra. Quandu i sacchi eranu colmi è imburati ci ne simu ghjunti. Eramu stanchi è ci sentia u spinu.
Ghjuvannina, 10 anni.

U battellu ingunfievule.
In cor di vacanze d'estate, cù i mo amichi, simu andati à u fiume di l'Infernu per nutà. Aviamu purtatu un battellucciu ingunfievule. Quand'è no eramu à mezu di l'onda, u battellu s' hè sgunfiatu è l'acqua entrava nentru. Avemu capalzatu è simu falati tutti in l'acqua, calzi è vistuti. Simu isciuti chì sapianu nutà, ma avimu avutu à fà asciuvà i nostri panni à u sole nanzu di pudè rientre.
Ghjiseppu, 10 anni.

U tempurale.
A simana passata hè piossu è fattu u ventu. I ghjamboni di i castagni si turcianu è truncavanu. E fronde vulavanu per L'aria chì parianu acelli, invece chì l'acelli, smariti da u celu, s'aggruttavanu cum'elli pudianu sottu à i tetti di i baracconi. L'aria era ghjalata. U mare smossu è biancu di sciuma murmava cum'è u tonu.
Un' ci era l'arte di dorme da u furore è i fulmini.
Cristianu, 9 anni.

U cignale.
Quindeci ghjorni fà, babbu hè andatu à caccia cù i so cumpagni. Anu tombu un cignale maiò è unu chjucucciu. A sera, versu cinque ore, hè rientratu in casa c'un bellu cusciottu cignalinu ind'a sacchetta.
A mo mamma l'hà cucinatu in salza à a stretta è u lindumane, à cullazione, ci simu liccati.
Catalina, 10 anni.

L'acellu.
L'altreroni ma facia un giru nantu à u mo cavalluseccu. In più bella, un acellu inticcia ind'a mo testera è casca in terra, feritu à l'ala. Sò piantatu, l'aghju pigliatu in manu è l'aghju purtatu in casa. L'aghju medicatu è messu in gabbia sperendu ch'ellu megliurassi.
U lindumane a gabbia era viota è u mo misgiucciu avia l 'acellu in bocca. N'aghju pientu.
Antone, 10 anni.

A' caccia.
Sabatu sò andatu à caccia cù babbu.
Ghjunti ind'a furesta avimu vistu una casaccia carca di lellera. Ci simu piattati daretu è avimu aspettatu una bella stonda. Eccu un acellone neru chì si lampa nantu à u lelleraghju per manghjà. Babbu tira è u tomba. Era un merlu bizzichigiallu.
Cristianu, 9 anni.

L'accidente di vittura.
Dumenica ci hè statu un accidente di vittura vicinu à a nostra casa. U cunduttore hà vulsutu evità un misgiu è hà minatu ind'u muru di u nostru ortu. Ind'a vittura ci era u babbu, a mamma è u figliolu di 14 anni. A mamma era ferita in capu è l'ambulanza l'hà purtata à l'ospidale in Bastia.
Antone, 10 anni.

L'anniversariu.
Mercuri sò andata ind'è Pasqualina per festighjà u so anniversariu. Avimu manghjatu torta è fiadoni.
Pasqualina hà avutu parechji rigali : una bicicletta, una penna in oru, un braccialettu in argentu, una borsa in coghju, libri, dischi è une poche di scatule di cicculate. Era cuntentissima.
Avimu statu à sente a musica, cantatu è ballatu. Hè stata una bella ghjurnata.
Natalina, 10 anni.

U " misciuì ".
Sabatu sera, babbu è ziu anu tombu un muntone. L'anu salitu, impeveratu è po l 'anu infirzatu nantu à un' asta di ferru è l'anu messu sopra à un focu di rusta. Trè orette dopu a carne era cotta. L'avimu manghjata trà i parenti è vicini. Oh, cum'ella era bona !
Cristianu, 10 anni.

U tarentulu.
Sabatu sò andata à u fiume cù a mo amica. Quand' è no simu ghjunte à l'urice di l'acqua, ella si mette à stridà. Aghju dumandatu ciò ch' ella avia. Avia vistu un tarentulone giallu rigatu di neru. Quandu l'aghju vistu, aghju avutu paura ancu eiu è sò fughjita.

E castagne.
Mercuri, sò andata in Orezza, cù babbu è mamma per coglie e castagne.
A' u paese, avemu pigliatu u nostru spurtellu, a nostra ruspaghjola è, cù u sumere di mammone, simu andati à u castagnetu. N'avemu coltu sette sacchi.
Toccu sera, babbu hà insomatu i sacchi à u sumere è l'hà ghjunti in paese, fendu parechji viaghji.
Mi sentia u spinu da a fatiga.
Ghjisabella, 10 anni

Un sonniu.
L'altra notte aghju sunniatu chì faciamu, cù ziu, un giru à bicicletta. Ziu hà fighjatu l'ora per vede u tempu chì no mettiamu. Andavamu tantu in furia chì sò cascatu è a mo bicicletta era un sumere ; mi sò coltu è sò ghjuntu in casa. Tandu mi sò discitatu.
Un' era chè un sonniu.
Antone, 10 anni

E fasgiole
Mercuri, babbone hà accesu u focu, hà messu e castagne ind'u testu è l'hà fatte arruste.
Ognitantu, e vultava scuzzulendu u testu da altu in bassu. Quand'elle eranu cotte, hà intrusciatu una pezza di canavacciu è l'hà messa nantu à e fasgiole per tenele umide.
Sbuchjavanu appena tocche è ghjeranu suvurite.
Marianghjula, 10 anni

A carne purcina.
A settimana scorsa avemu tombu u purcellu.
Ziu l'hà scucculatu, babbu l'hà polzu è mamma hà coltu u sangue ind'u stagnone. Dopu l'avemu abbuschjatu è raschjatu. Pulitu ch'ellu era, babbu l'hà apertu è hà cacciatu e trippe. Mamma è zia sò andate à lavalle à u fiume.
U lindumane, babbu è ziu anu appezzatu è sceltu coste, lonzi, coppe, prisutti, spalle, bulagne, panzette, è anu staccatu a polpa. D'ista polpa, salita è impeverata ne anu insaccatu salcicce è figatelli ch'elli anu appesi sopra à u focu per affumicalli è siccalli.
Ugeniu, 10 anni

A zilimbrina.
Ghjè dumenica. Cù a mo surella, è babbu andemu à facci una spassighjata pè u Ponte à l'Infernu, più indà di u paese.
Da un castagnu, pendeca un ghjembone troncu da u ventu. Più bella zilimbrina ùn pudia infattà. Mi ci appiccu à duie mani, chjamendu à mamma per ch'ella veda ciò chì sò fà. In più bella u ghjembone strappa e mi lampu da sottu in rinculoni.
Sò cascata nantu à i sepali è devimu ghjunghjecine chì aghju e ghjambe è u spinu sfrigiatu.
Ghjulia, 9 anni

A' piscà.
Un ghjornu sò andatu cù babbu à piscà in fiume. Da nantu à una teppa, babbu lampava in l'onda u filu cù l'amu duv'ellu avia infirzatu un lumbrice rossu. Da l'urice di u fiume mi pigliava a vista di e truite chì facianu colla è fala sottacqua senza tuccà. In più bella u filu s'hè stinzatu. Babbu hà tiratu sessu a so canna. Qualcosa trinnicava azziccatu à l'amu. Paria un serpu : ghjera un'anguilla maiò. Un' avimu chjappu altru nunda è ci ne simu ghjunti.
Cristianu, 9 anni

A piogia.
Piovi, piovi, piovi da u celu abbughjatu,
Nantu à u mo capu allapidatu.
Fala, fala, fala l'acqua,
Nantu à i fiori è l'arburi di a machja.
U celu hè neru, i nivuli sò sburati,
A' pocu à pocu, i fiumi sò sbarzati,
Piovi, piovi, piovi da u celu amantatu…
Suffia, 10 anni

A pulenda.
Venneri scorsu avemu fattu a pulenda.
Mamma hà messu una paghjola d'acqua c'un zinzicu di sale à u focu. Quandu l'acqua bullia, hà lampatu a farina castagnina, à pocu à pocu, ind'u mentre chì babbu riminava cù u pulendaghju. Cotta ch'ella era, babbu hà ribuccatu a bomba nantu à una tuvaglia infarinata, è po l'hà affettata cù u filu.
L'avemu manghjata cù u casgiu frescu è u figatellu arrustitu.
Stefanu, 10 anni

U rucone.
Eri, andendu à circà i limoni, aghju vistu un vermu grossu, pilutu, culuritu di rossu è di neru luccicu, ma ùn sapia micca ciò ch'ellu era. L'aghju fattu vede à mamma.
Mamma m'hà dettu ch'ellu era un rucone chì più tardi diventarà una bella farfalla.
Ghjisabella, 10 anni.

Una spassighjata in muntagna.
Un ghjornu, in corsu di vacanze, sò andata à scopre aria cù i mei. Pè a muntagna mi sò ghjucata cù u mo fratellu à corre quindi è culandi. Batti è scumbatti sò cascata à mezi ghicci. Fratellumu si campava di rise mentre chì eu pienghjia da e pene di e spine ciotte nantu à e mo pusatoghje.
Fiurenza, 9 anni.

U focu ind'u carminu.
D'invernu, quand'ellu face u fretu, mamma accende u focu ind'u carminu. Mette un bellu ceppu per capifocu, piazza accantu una manata d'accendime di scopa è ci sciacca nantu legne minute è grosse. Dopu, cù un fulminente, piccia focu à a scopa chì caccia e fiaccule sciappittendu. Quandu e legne grosse si accendenu, e vampe sò alte è scallanu bè.
Valeria, 10 anni.

U casgiu frescu.
Per fà u casgiu mamma cola u latte cù una pezza bianca nentru à un stagnone pulitu, aghjusta appena d'impresu è lascia caghjà un' oretta.
Dopu pone e fattoghje nantu à una scafa è, cù u coghju, l'empie tutte di caghjatu.
Pianu pianu, u seru sgotta è u casgiu piglia a forma di a fattoghja. Tandu, mamma u volta da sottu à sopra è ci lampa, nantu, una cria di sale pestu.
Ghjuvannina, 10 anni.

A notte di Natale.
Simu a vigiglia di Natale. Sonanu e campane è andemu à a messa di mezanotte. Dettu messa rientrimu in casa. Davanti à u carminu ci sò i rigali chì u Bambinu m'hà purtatu : un saccu di surtita in coghju rossu è una puppona tamant'è mè.
Pè u ripastu, mamma hà approntatu un bellu tianu di caprettu è, per appressu, pastizzeria fine à vuluntà.
Fiurenza, 10 anni.

U figatellu arrustitu.
L'altra sera avimu accesu un bellu focu di legne secche. Mamma hà infirzatu quattru tronchi di figatellu ind'u spetu è l'hà messi à calore sopra à a rusta.
Di l'untu chì sguttava ne avimu intintu un pane neru spaffatu in dui. Arrustitu ch'e llu era, mamma hà strintu i pezzi di figatellu mezu à e duie paffe di pane tirendusi u spetu.
Avimu manghjatu pane è figatellu accantu à u carminu è fù a nostra cena. Un deliziu !
Chjarastella, 10 anni.

A neve in piaghja.
Quandu era chjuca hà nivatu in piaghja. A mane, arrizzendumi, aghju fighjatu pè u purtellu è aghju vistu a neve. Era cuntenta. E muntagne, l'arburi, i tetti eranu tutti bianchi.
Cù babbu, i mo fratelli è a mo surella simu isciuti in piazza, ma belli cuperti chì si siccava da u fretu. Babbu hà fattu un barone di neve è dopu l'a vimu pigliatu à pallate.
Chì ghjurnata beata à meza neve ! Mi sò campa !
Valeria, 10 anni.

Capudannu.
U ghjornu di capudannu sò andata cù babbu, mamma, i mo fratelli è a mo surelluccia à dà u bon annu à caccara.
Caccara hè stata cuntenta è ci hà datu centu franchi di strenna à ognunu.
A' meziornu, avemu manghjatu e bugliticce, duie torte è betu u vinu dolce.
Toccu sera ci ne simu ghjunti in casa nostra.
Valeria, 10 anni.

A mo puppattula.
A mo zia m'hà rigalatu una puppattula. Hè bionda cù l'ochji verdi. Hè bella è a chjamu Suffia. Di ghjornu hà un vistitu turchinu è rossu, ma, a sera, per chjinalla, li mettu a so camisgia di notte. Suffia dorme ind' un lettinu cuperta di lenzoli fiuriti è di un cupertoghju turchinu.
Chjarastella, 9 anni.

I brilluli castagnini.
Eri sera, aghju dumandatu à mamma di fammi i brilluli. Ne era in brama.
Prima, avimu stacciatu a farina castagnina è mesu l'acqua à bolle c'una cria di sale. Quandu l'acqua bullia, mamma lampava a farina è eiu riminava cù a cuchjara di legnu.
Cotti ch'elli eranu, mamma hà tiratu i brilluli ind' i piatti coppi è l'avimu manghjati cù u latte frescu.
Lurenzu, 9 anni.

A' a neve.
Mercuri sò andata cù Michele à a foce di Verghju. Era nivatu assai. Tempu ghjunti, avimu pigliatu una sculisciaghjola è ci simu pichjati in cima d'una cullata per sguillà à falera. Avimu fattu parechje falate è chjappu parechje strambacate. Toccu trè ore, eramu stanchi è ci ne simu ghjunti in casa, cuntenti cum'è pichji.
Valeria, 9 anni.

A mo zighina.
Mercuri passatu, era in l'ortu è aghju intesu imbelà a mo capra. Sò falatu à vede ciò ch'ella avia. Avia figliatu d'una zighina tutta chjarasgiata, frisgiata nantu à u spinu è stellata à meza fronte.
U mo babbu l'hà fattu un caserottu per aggruttalle.
Frà pocu puderemu munghje a capra è fà u casgiu.
Pasquale, 10 anni.

I muradori.
I muradori cumencianu à travaglià.
U manuale porta a rena cù a bruetta è porta u cimentu ch'ellu buleghja cù a rena, di paletta. Dopu amoglia cù l'acqua per fà a buzana, sempre palittendu da sottu à sopra. Quandu a buzana hè bè minata, a ribocca ind' una camatta è a porta à u maestru di muru.
I muri collanu pocu à pocu, mattone à mattone, è a casa piglia forma. Serà compia frà quattru o cinque mesi.
Cristianu, 9 anni.

Babbone è u misgiu.
Aghju un misgiu neru. Quandu fischju, mi colla nantu à a spalla è mi lecca u collu. A mo mamma ùn vole.
Un ghjornu, babbone pusava è u ghjattu, abituatu cù mè, li salta nantu a spalla. Babbone, chì ùn hà micca ghjatti è poca pazienza, hà avutu paur a, l'hà datu una manata è l' hà lampatu in terra. U misgiu hà capitu è avà, quand' ellu vede à babbone, scappa.
Patrizia, 10 anni.

L 'accidente di trattore.
Ultimamente, babbu hè andatu pè e Poghje cù u so trattore. Quand'ellu hà chjappu a cullata, à l'entrata di u chjosu, u trattore s'hè arrizzatu, s'hè giratu versu a ripata è hà vultulatu. Babbu avia u pede chjappu mezu à i dui manichi di e vitezze è s'hè stortu a chjavetta saltendu. Ancu di grazia ch'ellu hà saltatu chì si pudia esse tombu !
Michele, 10 anni.

I disertori.
In tempu di a guerra di quattordeci, ind'e machje di Biguglia, ci eranu i disertori. Una sera sò vinuti ind'è u babbu di mammone è anu chersu da manghja. U mo arcibabbone l'hà datu da manghjà è da beie. Dopu si ne sò andati per paura di fassi piglià da i gendarmi chì i ricircavanu. Mammone ùn avia chè ott'anni è hà avutu una paura scema.
Antone, 10 anni.

E vugliticce.
Eri avimu manghjatu e vugliticce. Mamma hà preparatu una pasta di farina, d'ovu, di latte, cù un'unghja di levitu è un zinzicu di sale. L'hà minata bulighjenduci i pezzi di casgiu frescu. Dopu hà versatu a pasta cù a cuchjara ind'a frissoghja d'oliu bullente. Avimu fattu cullazione di vugliticce è ci simu campi.
Ugeniu, 10 anni.

A mascara.
L'altru ghjornu, u mo fratellu hè entratu in casa tirendu un stridu. Avia a so faccia listessa à quella di u scimiu. Mi truvava vicinu à a porta. Spaventata, sò scappata à rifugiami in braccie à babbu. Tandu, mi sò avvista chì fratellumu si era mascaratu cù una visera di scimiu è aghju risu.
Marianghjula, 9 anni.

A burla.
Per Natale aghju fattu una burla à u mo fratellu. Sapia ch'ellu aspettava un rigalu da a so cumare.
Aghju pigliatu una scatula è ci aghju messu un chilò di sale. L'aghju impacchittata di bella carta è ligata di un frisgettu giallu.
Quandu u mo fratellu hè ghjuntu l'aghju datu u pacchettu.
Fratellumu si rallegrava dicendu : " U mo magnetofonu ! ". Subitu subitu hà apertu a scatula è a trovu u sale. S'hè fermatu à bocca aperta è mi sò campa di rise.
Valeria, 10 anni.

A pesca cù u pinnatu.
Sabatu sò andatu cù babbu à dirascà i nucioli.
Compiù chì no avemu ci ne simu falati pè u fiumicellu. Avemu pisatu una petra, un'anguilla hè scappata è babbu
L'hà tronca in dui minenduli di spinu di pinnatu. Avemu cuntinuatu à piscà, eu pisendu e petre è babbu minendu di pinnatu à l 'anguille. N'avemu chjappu una decina. Mamma e ci hà fatte frighje u lindumane.
Federicu, 10 anni.

I catelli.
Dumenica a mo cuchja hà catellatu nantu à u vechju camione. Hà fattu nove catelli. Dui anni u pelame falu, trè sò russicci è quattru turcati.
Quandu u mo cane và vicinu à u camione, a cuchja abbaghja.
L'altreri, mi sò avvista chì ùn firmava più chè quattru catelli è mi dumandu duve l'altri ponu esse chjappi.
Mariachjara, 10 anni.

A merendella.
U luni di Pasqua sò andatu à fà a merendella cù u mo cuginu. Avimu purtatu pullastru in arrostu, casgiu, pane, u nostru campanile è a nostra ghjallina piena d'ove in ciculata.
Dopu manghjatu, ci simu ghjucati à corre, à appichjacci à l 'arburi, a cincinacci è fà capriole in l'erba fresca.
Simu rientrati in casa à u ciuttà di u sole, stanchi è cuntenti.
Cristianu, 9 anni.

U mo canarinu.
L'estate scorsu, un amicu m'hà rigalatu un bellu canarinu giallu. Manghjava e grane di scagliola è pizzicava e fronde d'insalata. Tutte e matine li pulia a so gabbia è li cambiava l'acqua di u so bagnu. Era alegru è fischjava tutta a ghjurnata.
L'altra mane, aghju lasciatu a porta di a gabbia aperta è u mo acellucciu si n'hè andatu. M'hà miraculi dispiacciutu !
Veronica, 10 anni.

U mo canucciu lupu.
Venneri, babbu hà ghjuntu un canucciu lupu. Ghjè neru cù e zampe russicce. Quandu ghjungu da a scola, m'incorre è mi mursica i pedi per ghjucassi. Ognitantu, si stippa à u misgiu, ma u ghjattu si rivolta in zerga è caccendu e sgrinfie. Aghju paura ch'ellu ùn li faccia male.
U chjamu Sboccamuntagna.
Saveria, 10 anni.

In battellu.
Ind'e vacanze di pasqua, aghju pigliatu u battellu sin'à Marseglia per andà in Montpellier à vede à Caccaru è à Caccara. U mare era tantu mossu chì l'acqua cullava nantu à u ponte di u battellu. Quelli chì escianu da a so cabina rientravanu prestu prestu, trosci lapidi.
Fiurenza, 9 anni.

U misgiu è u serpu.
Uni pochi di ghjorni fà, u mo misgiu hà trovu un serpu in l'erba secca. Era longu, giallu è neru. L'hà chjappu pè u collu è l'hà trinnicatu per tumballu. Mortu ch'ellu era, u misgiu u s'hà pigliatu in bocca è si n'hè andatu.
M'hà spaventatu è stumacatu.
Anna, 10 anni.

L'urtucciu.
Dumenica scorsa, cù u mo cuginu è u mo fratellu ci avemu fattu un urtucciu. Avemu zappatu, tiratu i solchi è piantatu fave, pisi, insalata, radichji è ancu uni pochi di fiori. Dopu l'avemu accintu di reta per parallu da e ghjalline.
I legumi è i fiori principianu à nasce. Speremu ch'elli crisceranu.
Annamaria, 10 anni.

L'ove di l 'Ascensione.
Ghjovi era l'Ascensione. Sò falatu à piglià l'ove ind'u nidu è l'aghju purtate à mamma. Si ne hà tenutu unu è l'hà marcatu d'una croce. Dopu m'hà mandatu à purtanne unu à mammone è unu à zia. U nostru l'avimu appesu sopra à u lettu per prutege a nostra casa da u focu, da a timpesta è altre disgrazie.
Michele, 10 anni.

U veranu.
U veranu hè di ritornu. L'acelli sò cuntenti è cantanu à voce rivolta. U sole hè più luminosu è più callu. L'arburi di l'ortu cumencianu à sbucciassi è i fiori si spannanu dendu tanti culori di gioia à tutta a natura.
Chì maraviglia u veranu !
Valeria, 10 anni.

Un fiore manghjacarne.
Un ghjornu di veranu a mi spassighjava ind'u pratu daretu à a nostra casa. Per casu, aghju vistu un fiore sbucciatu, russicciu. Fighjendulu da vicinu, aghju rimarcatu ch'ellu era pienu di mignoculi morti. Pensu ch'ellu era u fiore d'una pianta manghjacarne.
Veronica, 10 anni.

In isula d'Elba.
Dumenica simu andati in l'isula d'Elba. Ci simu arrizzati à l'alba per piglià u battellu à 6 ore. U viaghju hà duratu quattru orette. Tempu sbarcati simu andati à visità à Portuferraiu è po dopu, a casa duv'ellu hè statu Napulione quand'ellu era in esiliu. Avimu vistu parechje cose antiche. Avimu avutu à andà à manghjà nantu à l'erba per via chì ci era troppu mondu in l'osterie.
Versu 6 ore di sera, avimu ripigliatu u battellu per rientre in Bastia.
Saveria, 10 anni.

L'erba di l'Ascensione.
Ghjovi simu andati à circà l'erba di l'Ascensione. Avimu fattu un pezzu di strada in vittura. Per ghjunghje à u locu duv'ella nasce l'erba, avimu cuntinuatu à pedi una viottulella fatta da l'animali è chì babbu hà avutu à dirascà. Avimu coltu l'erba ind'u spurtellu, à bastanza per noi è u nostru parentatu. A'u ritornu, n'avimu appesu un mazzulellu à u crucifissu per prutege a nostra casa da i periculi.
Cristianu, 10 anni.

U trifogliulu à quattru foglie.
Dumenica scorsa, in l'ortu, aghju trovu un trifogliulu à quattru foglie. In furia, l'aghju detta à mammone, à Gabriella, à Mariantonia è à Francesca. Tutte, ci simu messe à circanne d'altri. Cù mammone n'avemu trovu quindeci è n'aghju fattu un mazzulettu. S'ella hè vera chì u trifogliulu à quattru foglie porta furtuna, pensu d'avenne à bastanza per esse furtunata pè a mo vita.
Suffia, 10 anni.

Troppu imburati.
Eri sera sò andatu cù Petru à manghjà e chjarasge prumaticce. Ci simu bè imburati, forse appena troppu, postu chì barchenduci da l'arburu u pantalone di Petru s'hè strappatu…
Michele, 10 anni.

E pullezze.
Eri sera, babbone hà compru quattru pullezze. L'avimu messe in pullinaghju. Dopu simu andati à cumprà u granu per dalli à manghjà.
Sò eiu chì sò incaricatu d'occupami di e ghjalline, matina è sera.
Frà pocu cuminciaranu à fà l'ove è tandu, mamma ci ne farà tante frittate è pastizzi.
Stefanu, 10 anni.

A pruvista di rena.
Babbu acconcia a nostra terrazza. Mercuri per aiutallu aghju travagliatu cù ellu è cù Mohamed u so manuale. Eu, era nantu a rimorca è empiia u stagnone di rena, Mohamed u facia cullà cù u canapu appesu à a tagliola è babbu spindicava u stagnone è u ribuccava nantu à a terrazza.
Compiu chì no avimu, ci ne simu entrati in casa per rinfrescacci, stanchi ma cuntenti.
Michele, 10 anni.

U falcu è u serpu.
Marti, rientrendu cù babbu da Tagliu Isulacciu, andavamu in vittura pian pianinu. Nantu à a strada avimu vistu un falcu chì si ne vulava cù un serpu in bocca. Era a prima volta chì vidia una cosa simile.
Babbu m'hà amparatu chì un falcu si manghja un centu di serpi l'annu.
Ghjannantone, 10 anni.

A piantera di i pomi
A settimana passata, sò cullatu cù babbu pè e Poghje induv'è no avimu una bella piana.L 'avimu dirascata è laburata cù u trattore.
Eri babbu hà tiratu i solchi di merone è l'avimu posta à pomi.
Avà, ci tocca à aspettà ch'elli naschinu per maghjincalli è trasolcalli. I cacciaremu di ghjungnu à luna vechja.
Michele, 10 anni.

In Bastia.
Sabatu sò andatu in Bastia à spassighjà cù Babbu è cù Mamma. Simu falati à vede u portu. Ci era un battellone biancu è bellu da duve surtianu vitture è ghjente carche di valisge. Dopu simu andati à visità i magazini, ma eu fighjava soprattutu i ghjoculi ind'e vitrine.
Pè i carrughji, ci era tantu mondu chì i pulizzeri devianu regulà a circulazione.
Cristianu, 9 anni.

I sparagi.
Dumenica scorsa, sò andatu cù babbu à circà i sparagi. Avimu marchjatu assai pè a machja è u purettu è n'avimu trovu un bellu mazzulu.
Mamma n'hà fattu una frittatone chì no avimu manghjatu dopu a suppa.
Ghjannantone, 10 anni.

E chjarasge
Dumenica, cù i mei, simu andati à u paese di a Porta per vede à mammone.
Ci era un chjarasgiu carcu di frutti maturi. Mi sò appichjata.
Mamma m'hà dettu :" Si tù cogli e chjarasge ti faraghju a cunfettura ".
Empiutu ch'ellu hè statu, u sacchettu m'hè scappatu.
" Avà a cunfettura hè fatta " hà dettu mamma. A mo surella s'hè campa di rise.
Natalina, 10 anni.

A cagnuccia di a mo vicina.
A cagna di a vicina hè diventata gattiva dipoi chì anu tombu i so canucci. Ghjè tamant'è un misgiu ma ha i denti pinzi.
Mercuri, mamma rivenia da u mercatu cù u mo fratellu. A cagnuccia, piattendusi, avanzava pianu pianu. Vicinu ch'ella era da u mo fratellu, s'hè messa à abbaghjà è à mursicà. Mamma hà pigliatu un battulellu è l'hà minata in capu.
Dipoi a cagna ùn s'avvicina più è abbaghja da luntanu.
Anna, 10 anni.

I pattini.
Dumenica, cù babbu è mamma sò andata in Bastia ind'è a mo cugina.
Dopu meziornu, tutti inseme, simu andati nantu à a piazza. Cum'è no aviamu purtatu i pattini à rotule aghju avutu a voglia di pattinà. Stendu assente à mamma ùn aghju messu chè unu per principià. Ruzava cusì bè chì ghjera un piacè. Ma quandu aghju messu i dui, m'aghju chjappu una strambagata.
Mamma ridia, eiu nò…
Patrizia, 10 anni.

A tundera.
L'altreroni, trè amichi sò venuti ind'è noi per aiutà à babbu à tonde e pecure.
Dui tenianu a pecura è l'altru a tundia cù una furbicia elettrica. Facianu più prestu chè cù e furbici à manu.
A'meziornu tutte e pecure eranu tose. Ma cum'elle eranu goffe, signore !
Ghjuvannina, 10 anni.

L'incendiu.
Una sera di ferraghju, u nostru cane abbaghjava. Babbu esce di casa per vede ciò chì ci era. U pughjale era tantu incesu chì e fiaccule cullavanu in celu alluminendu u circondu. Babbu avia paura chì u focu ùn ghjunghjissi à i camioni.
Dopu sò ghjunti i pumpieri è anu spintu u focu. Babbu era spenseratu.
Federicu, 10 anni.

E fole di Babbone.
U piacè di Babbone era di cuntami fole. Frà tante, mi ricordu di quella di " I dui induvinelli " :
- Per maritassi cù a figliola di u rè, ci vulia à poneli dui induvinelli.
- Un giovanu paisanu, pocu struitu ma pienu di bon sensu, li pone questi quì :
- " Nona hà tombu à Paula è Paula ne hà tombu trè ".
- " Un'durmì nè celu nè terra è aghju vistu u mortu chì trè vivi purtava ".
- A principessa ùn ci capì nunda è u giovanu paisanu diventò principe.
Ma, o Babbò, chì volenu dì isti induvinelli ?
Babbone ùn rispundia micca chì si era addurmintatu.
Valeria, 10 anni.