FILASTROCCHE

ADECEC CERVIONI 1978

BIBLIOGRAFIA

BRANDONE (Don Petru de MARI) : " Filastrocche è canzone di zitellina ", in L'ALTAGNA, Nu 1, sitt.-utt. 1925, Bastia
RUSTINCU DI LORETU (prete SAGGESI) : " Qualchì Filastrocche di Loretu di Casinca ", in L'ALTAGNA, Nu 5, apr. 1926, Bastia.
P.C. : " I fochi di San Giuvanni " MUNTESE, Nu 98, apr. 1926 ghiugnu-lugliu 1964.
Simon-Jean VINCIGUERRA : " A Ciriola ", in U MUNTESE, Nu 102, ghiennaghju 1965.
Roccu MULTEDO : " Le Mazzérisme et le Folklore magique de la Corse ", ed. A.D.E.C.E.C., Cervioni 1975.
Ghjuvanteramu ROCCHI : " Stendu à sente i vostri cori ", scioglilingua è puesie, ed. A.D.E.C.E.C., Cervioni 1975.

 

Sò falatu in l'ortu
c'era un gattu mortu
cù la so zampetta
mi feci una trumbetta
u ventu a mi rompe
passendu lu ponte
vò da lu ferrale
per fallami arangiane
u ferrale ùn c'era
era andatu in ferrera
c'era trè zitelle
fecianu e fritelle
mi ne detenu una
eiu dissi : chì furtuna
mi ne detenu un'antra
pusendu nantu a panca.

Ind'un scornu c'era un vechju
chì accunciava lu so lettu
di cuscogliule è filettu

§§§§

Trè aciuculi
posanu in panca
unu fila l'altru innaspa
unu face la bucata
per amor di la spusata
a spusata hè in lettu
si mena di chjave in pettu
chjave in pettu ùn ti minà
chì ti vogliu cunsulà
punterolu à mezu core
per quand'averai da more
quand'averai da spirà
punterolu passerà

§§§§

Voga voga sia
anderemu in Bastia
da quelle belle donne
chì filanu la seta
la seta è la bambace
-madonna chì vi piace.
ci piace u nostru signore
cù centu anelli in ditu
centu à mè
centu à tè
centu à babbitu caru chì n'un ci hè

c'era una campagna
sunava la diana
a campana era rotta
c'era trè donne sottu
una filava l'altra innaspava
l'altra facia cappelli di paglia

Batti battaglia batti battaglia
battaglia hè incuminciata
namuraccia inamurata
nè pane nè farina
madama Catalina
affaccatevi in finestra
chì passanu trè fanti
cù trè cavalli bianchi
sunendu lu tamburu
buru bum bum buru bum

§§§§

O bà
ghjunghjite avà
chì lu sole si ne và
si ne fala à la marina
avvideci à dumatina

§§§§

Mangulì mangulì
vai in Zitambulì
chì ci hè un agnellu
à mezu à u chjusellu
agnellu biancu
agnellu neru
chì per tè serà lu veru

§§§§

Luci luci sole
un filu d'amore
un filu d'arigentu
chì vale cinque centu
centu cinquanta
a regula la canta
a canta Mariola
ristagna la paghjola
chì cosge è chì taglia
chì face la battaglia
u topu macina
a furmicula staccia
damine un pezzu
d'issa razzicaccia
eiu ùn ti ne vogliu dà
chì l'aghju da manghjà

§§§§

 

Calicaloce
dammi una voce
cinciminellu
dammi un anellu
sumera nera
dammi una pera
pesciu marinu
dammi un cinquinu
dallu à mè dallu à tè
è cusì serai lu rè.

Acula nera
dammi une pera
pesciu marinu
dammi un cinquinu
calicaloce
dammi una voce
cinciminellu
dammi un anellu
chì mi vogliu marità
cù a figliola di Pasquà.

§§§§

Unu dui è trè
u papa ùn hè rè
u rè ùn hè papa
u ciocciu ùn hè lumaca
a lumaca ùn hè ciocciu
u casgiu ùn hè brocciu
u brocciu ùn hè casgiu
chì va pianu hà asgiu
chì hà asgiu n'ùn camina
u ghjallu ùn hè ghjallina
a ghjallina ùn hè ghjallu
è chì và à pedi ùn và à cavallu
chì và à cavallu ùn và à pedi
u muntone hà quattru pedi
quattru pedi hà un muntone
a trappula ùn hè u cintrone
u cintrone ùn hè trappula
a pulenda ùn hè pappula
a pappula ùn hè pulenda
è chì cena n'ùn merenda
chì merenda n'ùn cena
Sainone ùn hè Serena
è Serena ùn hè Sainone
è chì mi stà à sente hè un cuglione

§§§§

Pizzicu minicu
di nati naticu
di nasu di cagna
vai in Balagna
vaici tù ch'ùn ci vò eiu
vaici tù Marcu Matteiu

§§§§

In sta torra o Petru Pà
Quanti misgiucci ci stà ?
In sta torra dimmi o 'Ntò
Quanti misgiucci ci sò ?

§§§§

ghjocu :

quante corne hà a me capra ?
quante corne hà a me capra ?
sè per trè avessi dettu
per cavallu benedettu
è per santa Nicola
s'ella hè bella o s'ella hè bona
s'ella hè bella accimicata
quante corne hà a me capra ?

si ghjoca à dui : unu si mette daretu à quill'altru è face e corne, una, duie, trè, … ecc…
l'altru deve induvinà quante corne face.

§§§§

Sorti sorti bugiartulò
babbitu è mammata sò in prigiò
senza oliu è senza sale
chè t'ùn appia mai male

§§§§

Piovi piovi è timpareghja
chì babbone hè sottu a teghja
cù a coppia à cù l'aratu
lavureghja ind'è l'archjatu

§§§§

Una duie è trè
u sumere di Memè
a ghjallina di Martina
u gattucciu di Paulucciu
u catellu di Pistellu
l'anu visti à u macellu
oimè !

§§§§

Una corda di pelu
una fola ma fola
una catelluccia mora
una duie è trè
un pizzicu d'acellu
una cuchjara d'argentu
chì vale cinque centu
centu cinquanta
tuttu u mondu canta
canta lu gallu
risponde la gallina
a vechja Minichina
cù trè capelli in testa
s'affacca à la finestra

§§§§

Sù su le zalambriglie
sù sù ci vole à ballà
allisciatevi culombe
chì v'avemu à marità
eiu sò liscia è ben pettina
la dumenica matina
ma lu spechju hè troppu bruttu
ùn mi ci possu spechjà
chì l'affare possi andà
u mio lettu hè troppu altu
ùn mi ci possu arrivà
cumpreremu un sedione
c'omu ci possi cullà

Una duie è trè
scavalcati caru di mè

§§§§

è ciripì è ciripà
è lasciati inghjermà

§§§§

Seri seretta
andemu à la messa
duve quelle belle donne
chì filanu la seta
è la seta è la bambace
nostra madonna chì ci piace ?
a noi ci piace un bellu vestitu
è po centu anelli in ditu
centu à mè
centu à tè
centu à mammata chì n'ùn ci hè.

§§§§

Pizzicu minicu
di nati naticu
rocca ruccagna
vai in Balagna
vaici tù Marcu Matteiu
a ta nassa nassaiola
quì ci colla pediola
pediulì pediulà
Don Filice è Don Lanova
una tazza di farina
è quill'altra d'accitone
vaici tù babbu Leone
pizzichi vole Paulu Sà ?
vole ta vechja
vole ta nova
Don Filice è Don Lanova

§§§§

" Pater nostru " nissi nissi
steti un annu è po lu dissi
eiu lu dissi appesu a un palu
" sed libera nos a malu "

§§§§

A settimana santa :

Sì Diu vole
sì Diu vole
prestu manghjeremu l'ove

Quandu mi scatineraghju?
Quandu Pasqua serà di maghju !

§§§§

A vigilia di Corpus Domine :

O Signore cumu feste
a fà maghju tuttu feste ?

§§§§

U 15 aostu :

O la nostra madunnina
cum'ella stà collu tortu
pare tutta una fregata
quand'ella rientre in portu

§§§§

 

A vigilia di a Candilara :

Ciriola ciriola
noi dentru è voi fora

fubbe grassu lu purcellu
ci darete un figatellu
per sta ghjente chì macine
un zanettu di farina
è ch'hà vigna in le Mezane
pò dà vinu à damisgiane

§§§§

 

A vigilia di a Candilara.
Sottu a finestra cantanu i zitelli :

Ciriola ciriola
s'ellu ci hè ventu o ragnola
di l'invernu semu fora
s'ellu face bellu tempu
per un mese stemu dentru

è cherenu !

o casa di lu Signore
apriti per carità
or aiò fatevi onore
ùn si pò più aspettà

Insistenu :

O casa di lu Signore
è di santa carità

per fà scherzu à Pierinu
dateci per carità
una zucchetta di vinu
è frittelle à vuluntà

Minaccianu :

A birba stà in punta
cù mille stacchetta
è chere vendetta
a chì dice di nò

è sì a porta ùn s'apre :

chì casgiu è carne purcina
vi dianu mal d'urina
quante petre ci hè in stu muru
quanti peli hà u vostru mulu
tante zecche à u vostru culu

§§§§

A' U FUCALORU DI SAN GHJUVA'

In Belgudè:

O cumpà o cummà
per la sera di San Ghjuvà
ciò chè n'avemu ci sparteremu
ciò chè no ùn avemu ci ne steremu
ci chjameremu di tù è di tè
ch'ellu ingrandi quant'è quì…
(omu si tocca i denti)

In Calvi :

Cumpà è cummà
pà a sera di San Ghjuvà
ch'elle crescinu e vostre treccie
cum'è radiche di leccie
ch'ella creschi a mo cummare
par quantu pesci ci hè ind'u mare
sè no ci chjameremu di tù è di voi
turnarete tamant'è noi
sè no ci chjameremu di tù è di tè
turnarè tamant'è què…
(omu si tocca i denti)

In a Vulpaiola :

A' ch'ùn si chjamerà
nè cumpà nè cummà
a zampetta di u so gattu si siccherà)

In Alisgiani :

Cumpà è cummà
per la fede di San Ghjuvà
quellu ch'ùn chjamerà
cumpà è cummà
un bracciu li siccherà

In u Mucale :

Cumpà è cummà
à la sera di San Ghjuvà
ci faremu i nostri guffi
cum'è pè di candilucci
ci faremu e nostre trecce
cum'è pè di candilecce

In Venacu :

Cumpà è cummà
Di la sera di San Ghjuvà
belli cari eramu prima
è po più seremu avà
ch'ellu s'allonghi u vostru spinu
cum'è una radica di pinu
ch'ellu ingrandi u vostru nasu
cum'è un manechju di vasu
v'appiate tanti figlioli
quantu in Venacu ci hè fiasgioli
chì v'appiate incappucciate
quantu ci hè petre ind'e filate

In Petraserena :

Cumpare è cummare
per a fede di San Ghjuvà
ch'ellu ingrossi u vostru spinu
cum'è una radica di pinu
ch'ella ingrossi a vostra treccia
cum'è una radica di leccia
chì v'aghjate tanti figlioli
quantu in Venacu ci hè fasgioli
or basgiemuci o cumpà
per a fede di San Ghjuvà

In Porti Vechju:

Tutti volti chì no ci scuntremu
cumpari è cummari ci chjameremu
par Zan Petru è par zamponi
ch'iddu crescu u vossu ghjamboni
par Zan Petru è Zan Ghjuvanni
ch'iddi crescani i vossi panni.

In Sartè :

Picci cumpà è picci cummari
par San Petru è par San Paulu
par San Ghjacumu di Gallizia
sì cumpar ùn dici cummari
a so mani siccarà
sì cummari ùn dici cumpà
…………………………
è quand'è no ci scuntraremu
cumpa è cumma ci chjareremu

§§§§

A NOTTE DI NATALE :

Cuccurucù
hè natu Ghjesù
uuh ! uuh ! uuh !
be…e…e…telem
hi hon
hi han
andemu tutti
à l'adorà

§§§§

A prighera di i zitelli di Letia quand'elli andavanu à chjinassi:

Padre nostru di Natale
beatu puru à chì l'ampara
l'amparò u palegrinu
è a disse à San Martinu
san Martinu cullò in celu
è à disse à San Michele
San Michele aprì le porte
di li vivi è di li morti
una petra di mattone
tutti l'anghjuli in balcone
una petra di baina
tutti l'anghjuli in duttrina
... una petra liscia liscia
tutta l'acqua ci sculiscia
una petra tonda tonda
tutta l'acqua ci s'abbonda
si abbundò tantu è tantu
nostra Madre si calò
beppe tantu di quell'acqua
chì d'un figliolu ingravidò
quandu nascì quellu figliu
tuttu u mondu alluminò
canta canta rose è fiori
natu hè nostru Signore
… natu hè à Beteleme
mez'à u boie à l'asinellu
per cuprì à Ghjesù bellu
ùn c'era fascia ne pannella
à chì lu sà à chì lu dice
à ch'ùn lu sà ghjusta hè d'amparallu
à a fine di lu mondu
ci ttruvaremu tutti riuniti

§§§§

Pè azzicà i chjuchi o per fà u manganiolu nant'à un'anca :

Miaò miaò
quantu n'aghju ti ne dò

nicchi nicchi Stifanò
quantu ci ne stà ti ne dò

zò zò cavallò
manghja ci ne stà ti ne dò

I zitelli di a scola di Luri (C.P. -1977 anu cuntinuatu :

Zè zè sumirè
manghja l'erba chì ci n'hè

zì zì Ghjuvan Luì
manghja u pesciu chì hè quì

zù zù cavallù
manghja u fenu chì hè quassu

zà zà Maria Pà
manghja u pane chì hè culà

§§§§

Buca bucagna
farina di castagna
quelle belle donne
chì filanu la seta
seta è bambace
sò cose chì ci piace
piace à mè
piacè à tè
piace à babbu chì n'ùn ci hè

§§§§

Lumacò lumacò
caccia e corne à u to patrò
chì si t'ùn le cacci micca
liccherai di bastò

I zitelli di a scola di Luri (C.P. -1977) anu cuntinuatu :

Sumerò sumerò
porta e legne a u to patrò
chì si t'ùn le porti mica
liccherai di bastò

Cavallò cavallò
porta bè u to patrò
chì si t'ùn lu porti micca
liccherai di bastò

Zitellò zitellò
porta u pane à a to mammò
chì si t'ùn lu porti micca
liccherai di bastò

§§§§

A' chì vole à Catalina
la so dota ci sarà
un zanettu di farina
è lu stacciu per staccià
la cuchjara è la furcina
è lu piattu per manghjà
à chì vole à Catalina
la so dota ci sarà

§§§§

Piove piove
a gatta face l'ovu

§§§§

Sò cullatu à mundà granu
ind'è San Ghjulianu
c'eranu trè zitelle
mi n'anu datu una
una ùn m'hè abbastata
mi n'anu datu un'altra
sottu la panca m'hè cascata
u gallu nantu la porta
fecia la collitorta
u gattu in camisgia
si campava di risa

§§§§

A' Lavasina
cusì vicina
cusì luntana
luntana da mè
o caru frate
n'ùn ci pigliate
chì simu capre
è femu bè…bè…

§§§§

A' le rocche è le rucchette
à le tazze benedette
Arrizzatevi madonna
à piglià ciò chì vulete

§§§§

Fume fume nidà
viatine à lu Castellà
duve mammata serena
chì t'apprunterà la cena
purterai i sticcatelli
per riste li ficatelli

§§§§

Canta u cuccu… U zitellu li dumanda:

Cuccu meiu cuccu meiu
quant'anni aghju à campà eiu ?

U cuccu li risponde : cuccù, cuccù, cuccù,…
è u zitellu conta : unu, dui, trè, …

Quandu u contu hè longu :

Cuccachjolu cuccachjolu
megliu tù chè u rusignolu

S'ellu hè cortu :

Cucculerdu cucculerdu
zittu tù chì sì un bugierdu

 

§§§§

U manganiolu :

Ziguli mangani
pedicurtacci
ne voi più
di quelli migliacci ?
sì chì li vogliu
mettili à mogliu…

§§§§

A mo barba
hè tantu longa
più l'allisciu
è più s'allonga

bella a mio barba
dammi un saccu d'erba
per cullamine in paradisu
nantu à u mo cavallu grisgiu

o… pè u me cavallu grisgiu
chì ghjè mortu in paradisu

§§§§

Salta salta pecura bianca
ùn possu saltà

ùn aghju che un'anca
s'eiu n'avissi una duie è trè
salteria megliu chè tè

§§§§

Coda di purcellu
piuma d'acellu
ciottami in stacca
erba tavacca
pezzu di cane
bocca di cane
uuu !

§§§§

Topu marinu
venimi in manu
ti volgiu dà
un bacinu di granu

§§§§

A' u Petricaghju d'Alisgiani, i zitelli anunziavanu u furestu cantendu:

A' serrà li porci
cù la coda torci torci
cù lu grugnu terra terra
centu scudi di capera
serrate li porci
aprite le cani
è tenite e vostre mani

§§§§

Piovi piovi
finament'à ghjovi
è sì ùn abbasta
piovi finamente à Pasqua

§§§§

Un' piuvì ùn piuvì
chì ùn vole San Martì
San Martì hè cullatu in celu
à sunà le trè campane
per li vivi per li morti
per li santi Pater nostri

§§§§

Un' piuvì ùn nivà
chì babbone hè à lavurà
cù la coppia è cù l'aratu
u Signore l'hà fidighjatu

§§§§

A signora Maria Madessa
l'incutraimu à l'acqua fresca
acqua fresca ùn nè vulia
a mandaimu in Bastia
in Bastia ùn ci vulia stà
a mandaimu à cacà

§§§§

Topu pinnutu
chì vai di notte
pichjendu à le porte
topu pinnutu
cascami in manu
chì ti deraghju un bacinu di granu

§§§§

Cinciriola cinciriola
piglia i to libbri è vai à a scola

§§§§

Chjò chjò
Piglia muscò

T'ai vindutu la to grammatica
per un nidu di pincigliò

§§§§

Un' piuvì ùn piuvì
San Ghjiseppu s'hè messu à durmì
cù nant'à e braccie u nostru Signore
stancia l'acqua è luci sole

§§§§

Pinzù
rattazzù
mengu un calciu è colla in sù

§§§§

Chjirulì castagne cotte
chjirulì chì sò mal cotte
chjirulì chì cuceranu
le castagne di lu pianu

§§§§

Prighera magica (Vignale) :

Pignatella coci è bolli
piena di brocciu è cipolli
è tù donna di Vignale
sè t'ùn voli guarì fà cos'ella ti pare

§§§§

A' l'oliu à l'oliata
a pecura figliata
à chì ride à chì parla
un pizzicu è una scappiata
eiu sò figliol'di tale
possu fà ciò chì mi pare

§§§§

Pompò di cutò
trè galline è trè cappò
andendu per la cappella
rincuntrai una zitella
rincuntrai una merlata
mi piria mio innamurata

§§§§

A Madonna di Niolu
fatemi truvà un sprignolu
o Madonna di Loretu
fatemi truvà un buletru

§§§§

Lunta lunetta
fammi un piacè
fala sta notte
à dorme incù mè.

§§§§

Una gallina nantu lu muru
pizzicava pane duru
pizzighì pizzigà
alza la coda è si ne và

§§§§

Aghju manghjatu la papparinata
è lu mio corpu face gluglù
ma so scappu di questa nuttata
papparinata ùn ne manghju mai più

§§§§

Eiu sò una canzunetta à l'aritrosa
chì à chì la sente ùn l'ampara mai
eiu ghjunsi sottu l'ombra d'una noce
alzai l'ochji è trè mele pigliai
m'affacca lu patron'di le chjarasge
è dice e moi susine piglate t'ai
mi tirò unc'un sassu nant'à un dinochju
è mi crepò un ochju.

§§§§

Pè salutà à Marietta
chì purtava una bella faldetta
si hà cacciatu lu cappellu
u ziu Cuccurunellu
suffiava un ventu scatinatu
cuccurunellu hè cascatu
malatu

§§§§