I Signadori è a trasmissione

di u secretu di e preghere a notte di Natale

 

 

A notte di Natale u Signadore svela à l'iniziati u secretu di e preghere chì ùn devenu esse divulgate per esse efficaci. Petru Simoni hè un persunagiu chì pare esciutu da un libru di raconti è di legende. Anzianu pastore di a Tavagna, hè statu iniziatu à e pratiche seculare di i Signadori chì medicheghjanu u spiritu è a persona cù e preghere è e virtù di e piante.

I Signadori facenu parte integrante di a sucietà corsa. Sò i guardiani di pratiche antichissime dipoi i tempi i più landani.Tuttu principia à l'epuca di u neoliticu cù i sciamani venuti d'Europa è d'Asia discendenti di i grandi preti o streghi. Sti sciamani anu insegnatu à i Corsi u putere di guarì in aduprendu a preghera è e virtù di e piante, per via chì u populu corsu hè sempre statu credente. U sciamanismu avia per scopu di medicà, di dà sullevu à a ghjente è à u spiritu, grazia à preghere chì s'amparanu a notte di Natale quandu u sole si chjina.

Per esse Signadore, ci vole à crede in Diu, ma dinù à u Diavule. Per via di a so grande eloquenza u Signadore hè enigmaticu quandu omu u interroga nant'à l'urigine di stu donu. Cù assai umilità, Petru Simoni dice : "Sò un'intermediariu trà u mondu di i vivi è u mondu di i morti". In fatti, a so vucazione ùn hè micca un azardu. Hè in lea cù a famiglia, a so mamma praticava l'ochju, ghjè ella chì l'hà insegnatu l'usi è i custumi isulani. Hè ingrandatu in a natura in cuntattu cù e piante è l'animali : "Da zitellu i miò sciali era di parcorre a valle di i Mauri à Poghju Mezzana. Sta valle hè piena di secreti. I miò passi mi purtavanu versu Fiuminale, u più altu paese di a Tavagna". "Ogni casa avia u ricordu di l'antennati, a storia era scritta nant'à e petre. Dipoi stu tempu, tucchendu un muru in petra aghju a visione di e persone chì stavanu in sti lochi".

U Signadore si guarda di svelà u secretu di e preghere chì li sò state trasmesse da l'anziani, Petru Simoni dice : " Tutte e preghere sò amparate u 24 dicembre à mezanotte, cù variante secondu e lucalità. Per esempiu in u Boziu, e preghere sò trasmesse sin'à u 31 dicembre. Cunnoscu cinque manere di segnà l'ochju è una cinquantina di preghere. Ogni persone pò avè l'ochju chì pò esse lampatu per ghjelusia, o ancu dicendu u bè di sta persona senza riferissi à u Signore". "A preghera di l'ochju hè accumpagnata da un ceremuniale chì principia fendu brusgià foglie d'ulivu per e fumicazioni, per scaccià i gattivi spiriti. Facciu u segnu di a croce trè volte è a preghera sopra à u piattu pienu d'acqua, è ripetu tutte e preghere di l'Incantesimu. Dumandu i nomi è casate di u babbu è di a mamma di u malatu. Cù u ditu mignulu di a manu diritta, facciu cascà trè gocce d'oliu, una pè a mamma, una pè u babbu è una pè u malatu. Si tandu a goccia d'oliu si sparghje in l'acqua, a persona hè annuchjata".

U Signadore ricunnosce in a forma di e tacche d'oliu e cause di u Male è i mezi di fallu smarì. A seanza fatica assai u Signadore, si l'innuchjatura hè forte. Per fà cresce a so efficacità, è dinù per prutegesi, u Signadore deve ricumincià l'operazione rispettendu un tempu di trè ghjorni. "Si a persona hè sempre annuchjata, dumandu à u malatu una pezza bianca (culore di l'Immaculata Cuncezzione) ch'ella averà purtatu durante a nuttata, è sale grossu. "Facciu una preghera, tagliu un pezzu di stofa, poi ingutuppu u tuttu cù un frisgettu rossu (culore di sangue), a persona malata deve purtà stu picculu fangottu nant'à ella sinu à a disparizione di u Male". U Signadore ùn hà nisuna putenza particulare, per via chì u so putere hè natu da un'iniziazione. Li ci vole una grande forza murale è fisica per cumbatte e forze di u male. In e so incantazioni, Petru Simoni invoca aspessu a Vergine Maria, u Signore è un Santu : "In casu di prublemi à l'ochji, facciu duie preghere à Santa Lucia. Per prutegesi di u venneri 13, ci vole à pregà à l'alba San Petru è San Bartulumeu". Frà a multitudine di e preghere, riteneremu quella chì impedisce l'inundazioni. A preghera cunsacrata à i quattru venti (U Gregale, U Libecciu, A Tramuntana è U Maestrale) chì si deve fà in piena natura e bracce sparte in croce.

I Signadori pratecanu una medicina pupulare menu arcaica ch'omu pensa : "tempi fà i medichi officiali sradicavanu i denti goffi à vivu, allora chì u Signadore utilizava u suchju d'una pianta chjamata "A Nocca" chì tombava u nerbu di u dente senza dulori. "L'erba di l'Ascensione" o "Erba Santa" era utilizata pè i vermi, e punghjiture di l'insetti o a sturcitura d'un membru. A puncigula nera medicheghja i rumatismi è a radica di u talavellu cumbatte i purioni. Tempi fà, i pastori facianu frighje u catellu lurcu, a so grassa servia à medicà e piaghe di i cavalli, eppo e donne l'adupravanu per fà cresce i capelli."

Assai superstiziosi, i Corsi anu sempre avutu addossu talismani per prutegesi da a malasorte cum'è "A Petra d'Acula" chì si trova à a foce di Castirla, sta petra hà u putere di rende invisibile s'omu prununzia una parulla magica. "A Petra quadrata" chì prutege da u malefiziu, ghjè una petra à forma cubica, chì si trova vicinu a Canari è in u Fiumaltu.

Mai stancu, Petru Simoni cuntinueghja u studiu di e credenze pupulare corse è brama di trasmette à e future generazioni tutta a ricchezza di a cultura isulana, per chì i Corsi ùn dimenticheghjinu mai e so radiche è a so cultura.

 

Fiure stratte da u "Mémorial des Corses" (Jean-Marie ARRIGHI et Marie-Jean Vinciguerra")
è da u libru Mazzeri, Finzioni, Signadori di Dorothy CARRINGTON Ed. Alain Piazzola.