Puesie di Natale

 

U Natale di u ciucciu

Cumu serà chì tutte e stelle

si sò strinte pè a manu

pè fà tante lumerelle

nantu à u ghjalgu splendurente ?

È u focu chì si mira

indu u vechju spechju appesu,

schjuppitteghja è sparghje in festa

a so chjama d'unità

 

A ciccona di u paese

cumu serà ch'ella chjucchitteghja

À u solitu, à st'ora,

ùn si sente più un zittu,

ed eiu m'agranu inciucciulitu

indu u mo veculu cupertu.

Ma sta sera dicenu tutti

ch'ella hè festa.

È i mo ochji maravigliati

scoprenu a veghja di Natale.

 

Rosa Maria Ottavi

 

Supplica à Babbucciu Natale

Babbu Natale

Tù chì sì tantu caru

Fà cum’ella ti pare

Ma ùn tricà più à falà

Ùn ne possu più d’aspettà

È ogni sera di Natale

S’è tù mi lasci addurmentà

Ùn ti porraghju mai basgià

 

Rosa Maria Ottavi

A veghja di Natale

 

Intornu à u ghjalgu chì splindureghja

Scuprimu a veghja di Natale

Cù a ciccona chì sbattagliuleghja

Cantemu a veghja di Natale

Di punta à u focu chì sciuppitteghja

Cuntemu a veghja di Natale

 

Ghjuvan Teramu Rocchi

 

Filastrocca

Per a festa di Natà

Capifocu capifocu

Per a festa di Natà

Capifocu in cicculà

Tricchi trocchi trocchi è trà !

 

Ghjuvan Teramu Rocchi