Storia di u presepiu

San Francescu d'Assise averebbe seghjurnatu vicinu à Bunifaziu è omu li attribuisce a creazione di u presepiu à u XIIIu seculu. Eppuru, toccu l'Altu Midievu, si mintueghja un decoru di « præsepe » in l'uratoriu di Santa Maria Magiore in Roma. In Francia, ci volse à aspettà u XVIIu seculu pè vede presepii in e chjese pruvenzali, u seculu dopu in Italia, in particulare in Napuli. Fubbe una moda franchendu u quadru di a chjesa perchè e famiglie nobili è burghesi d'Italia spendianu assai soldi pè decurà i so palazzi cù ricustituzioni di a Natività. In Corsica, i santunelli s'affacconu in e case solu in u 1930, fora di u prespiu in acasgiù è avoriu purtatu da u giovanu Bonaparte, venendu da l'Oriente in u 1799, è chì ghjuvava di rigalu à a mamma. Questu si pò sempre vede à u museu di a casa Bonaparte in Aiacciu.

Di regula, in e case à principiu di u XXu seculu, era spostu solu u Bambinu nant'à un lettu di paglia è era chjamatu ancu ellu « U Presepiu ». Stu nome mostra ch'ellu simbulizava da per ellu u latu meravigliosu di a so nascita. U più spessu, era fattu in cera è hè trasmessu di leva in purleva (de génération en génération).