|
L'avventu - Corsica, dicembre 2006 
L'Avventu principiava a prima dumenica seguitendu u 26 di nuvembre, un periudu annunziendu a nascita prossima di u Messia, eppo un « tempu liturgicu di preghere è quaresima induve a Chjesa aiutava à appruntassi à a ghjunta di u Salvadore, ma aviamu rallegramenti grazia à e feste patrunali » (cf Lucette Poncin in Noëls de Corse, Edisud). Difatti, trè tappe spirituali puntellavanu u caminà di i credenti versu l'apoteosa di Natale. Capunanzu a Sant'Andria, u 30 di nuvembre. Fubbe u primu apostulu chì hà seguitatu u Cristu è, ind'a parabula di a multiplicazione di i pani in Galilea, hà dumandatu à Ghjesù di nutrì millaie di poveri cù cinque pani è dui pesci. In Corsica, a sera di a Sant'Andria, giuvanotti vanu à dumandà « da beie è da manghjà » in e case di certi paesi. Seconda tappa, a San Niculaiu, u 6 di dicembre, celebrata da messe, prucessiò è, in Balagna, fendu a distribuzione di e sannicole, panucci assumigliendusi à quelli di a Sant'Antone. San Niculaiu hè diventatu famosu perchè hà rinvivitu trè criampuli tombi da un macellaru. Hè patrone di a Russia, di i paesi di Tuminu, Urtaca, Felicetu, Livia, San Niculaiu…
À sta trilugia, s'aghjusta in Carghjese u 12 di dicembre, a Santu Spiridione festighjatu da una prucessiò seguitata da i membri di a chjesa greca di u ritu bizantinu è di a chjesa latina. Nanzu d'esse vescu, Spiridione era un pastore pecuraiu. Contanu chì, una notte, avianu pruvatu à arruballi a so banda d'animali, ma ùn a ci fecenu perchè e so pecure ùn si muvianu per via di una forza misteriosa. À u fà di u ghjornu, Spiridione scuntrò i ladri, li dete un castratu dicendu ch'ella era cusì facile di dumandà è micca d'arrubà. Eccu dunque signalamenti maiò di l'anziana sucietà agropasturale corsa sempre pregati quantunque. Accantu à e ghirlande elettriche di e cità, lucenu sempre e candelle di Santa Lucia. |
||||||||||||
Terza tappa, a Santa Lucia u 13 di dicembre. U cultu di sta vergine siciliana, marturiata in u 304 sott'à Dioclétien, s'hè impiantatu assai prestu in l'isula. Hà datu u so nome à Santa Lucia di Moriani, Santa Lucia di Mercuriu, Santa Lucia di Tallà è à funtane chì l'acqua face prò à l'ochji. Si dice ch'ella hà purtatu manghjusca à cristiani infastiditi è agruttati in catacombe è ch'ella s'hè strappata l'ochji pè falli purtà à u prumessu delusu chì l'avia dinunziata. Tandu, Diu li hà resu prunelle ancu più belle ma, à mumentu datu, u boia a pulzò. Santa Lucia hà u pudere di rende o di migliurà a vista eppo a so festa hè a prima prumessa di una vultata di a luce sulare, difatti « À la sainte Luce, les jours croissent du saut d'une puce ». Face chì, vulendu cunghjurà u bughju di l'invernu, i cristiani l'unuravanu per mezu di numerose lumere è lumigni.