|
|
||
| ||
|
In sti primi di lugliu di u 2002 s’hè spenta a voce chjara di u pueta lacqualacciu Marcellu Acquaviva. Sta voce ch’è no intesimu nantu à i prima dui dischi di Canta u populu corsu, Eri, oghje, dumane è Libertà : ci dicia un paghju di puesie chì, ogni volta, iniziavanu u rinovu culturale portu da quelli di Canta. Ricurdemune calchì filare : |
|||
|
Sì a vita d’arrimane Ùn turnarà mai più Oghje tante cose vane Sò tinute da virtù È di qualità anziane Bisognu ci n’hè, dinù (Sognu è spiranza in Eri, oghje, dumane) |
Si purrà chjamà suddesfu U Corsu firmatu fieru Quellu chì ùn ne hà betu Acqua torba à lu bichjeru Chì li porghje, à manu in pettu U barbantone stragneru (U culunialistu in Libertà) |
||
|
Difindidore di a lingua, scrive in l’anni cinquanta in la rivista Monte Cintu. Publicheghja in lu 1979 Populu è rime, l’acqualogia : prupone prima un cuntrastu trà dui finti parsunagi, Pennaforte è Squarciaficu chì, raghjunendusila sopra à u passatu di l’Acquale di Lozzi è quellu di Niolu, bramanu dinò par l’omu corsu « Ch’ellu avanzi dirittu À mezu à u so lume » ; a sigonda parte vene custituita da una racolta di robba niulinca, puesia tramandata à bocca è messa quì in scrittura, incù stratti di Peppu Flori, Ghjaseppu Giansilj (Pampasgiolu) è parechji altri pueta luzzinchi ch’è vo pudarete turnà à scopre aprendu dinò à Populu è rime. Oramai l’ultima muntagnera l’hà fatta in stu lugliu u ben di Marcellu : à a so famiglia li femu e nostre parte. Incù rispettu accumpagnemu à locu di riposu st’omu passiunatu da i so lochi è da a so ghjente ; da ultimu licenziu ci ghjuvarà l’ultima strofa di A muntagnera, successu tamantu di i cantarini di A filetta :
|
|||
|
Avà chì ai riuntu Di l’istate u rughjone Di tantu in tantu in paese Affaccati à l’accasione Poi ùn mancà a to festa A mane di Santu Intone |
|
||