« I Canzoni di Ziu Mirlinu »

 

Ritrattu di Michel Luccioni strattu da Corse-Matin

 

« I Canzoni di Ziu Mirlinu » ghjè un libru in culori di novanta sei pagine, accumpagnatu d’un CD chì prupone ottu canzone.

U libru hè statu prisentatu da u CRDP (Centru Regiunale di Documentazione Pedagogica) di a Corsica cù Petru Dieghi autore è cumpunitore, Rinatu Coti, scrittore, Hervé Ettori, direttore di u CRDP, Jean Alessandri, aggiuntu, Ghjuvan Maria Arrighi, ispettore pedagogicu regiunale di lingua è di cultura corsa, Jean-Baptiste Paoli, incaricatu di missione, lingua è cultura corsa à u CRDP, iniziatore di prugettu è Alexandre Marcellesi, scrittore. Petru Dieghi, ghjè anzi tuttu l’anima corsa. Trae a so energia à u più prufondu di sè stessu.

À traversu stu libru, parla di a so cultura, fendu referenza à u paese di a so zitellina. Stu mondu maravigliosu di tradizioni duve i zitelli sò rè. Stu libru ùn s’assumiglia à l'altri. « I Canzoni di Ziu Mirlinu », ghjè editatu grazia à a cullaburazione di u Ministeru di l’Educazione Naziunale è di a Cullettività Territuriale di Corsica, in un cuntrattu di pianu Statu-CTC, pè u sviluppu di l’insegnamentu di a lingua è di a cultura corsa. Stampatu à 1 200 esemplarii, ghjè distribuitu gratisi in tutte e scole materne è primarie di l’accademia, è in i dui centri di sugiornu linguisticu.

Maliziosu è spiritosu, Ziu Mirlinu inviterà tutti i zitellucci corsi à cantà cù ellu. Petru Dieghi è Rinatu Coti, omi di cumpetenze è attalentati, anu messu à ghjornu u so amore pè a nostra lingua materna.