Symboles de la Corse

Jean-René Laplayne è Véronique Emmanuelli

 

 

A prima edizione in u 2001 di i « Symboles de la Corse » di Jean-René Laplayne, direttore di La Corse Votre Hebdo, è Véronique Emmanuelli prupunia e bellezze secrete di i siti, ramentava destini eccezziunali è cuntava cusì a cronaca d’una Corsica cuntempuranea nant’à i chjassi di a storia è in u core di l’omi. Oghje ghjornu, l’opera ùn hè più dispunibile.

 

Pè a so seconda paruzione, à u veranu 2005, l’edizioni Assouline adopranu torna a formula chì era stata un successu quattru anni fà : da una banda un testu, da l’altra ritratti eppo, à mezu, a Corsica si ricorda, trà mare è muntagna, d’esse grava, prufonda è misteriosa, sicuramente cum’è st’isule scuperte da Ulysse.

 

In a nova edizione, l’autori presentanu quaranta simbuli, ognunu descrittu in una o duie pagine attillate, chjare è servute da l’emuzione sputica è u lume di i ritratti di Laziz Hamani. Sò amentati u paese, « cumunità tocca da seculi di storia, di lotte, di letiche induve l’isulanu affirmeghja un’identità, un pezzu di Corsica. U so nome rimanda spessu à una particularità giugraffica, à e culture, à l’arburi nant’à u situ, à una tradizione religiosa ». Avemu dinù à Aleria, Carghjese trà altre cumune, l’isulanità, u banditismu o un stilettu riprisenta articulazioni fundamentali in a manera di pensà, di sente, di teme u so universu. Dunque, spunta l’anima isulana, quella chì « ci vole à scuntrà, à ammansà, l’anima di e 360 cumune di l’isula chì tessenu una Corsica straziendu pè fassi capì ».

 

Si parla di Grossu Minutu « suldatu valente di l’umurismu corsu » à tempu « malignottu è chì face ride », di Napulione, Pasquale Paoli, Teodoru Primu, Sampieru Corsu, Colomba, Tino Rossi… Altri simbuli : u cursinu, « cane pitturescu, campagnolu, sobru, sintimentale », u cignale « rè di a machja », u muvrone « signore di e cime ». A presentazione di st’animali face ch’elli diventanu attraenti. D’altrò, u furmiculime di l’invisibile è di u misteru sacru affioranu cù e pulifunie, u Catenacciu, e chjese rumaniche, e cunfraterne. Infine, savori nustrali, simbolica di u castagnu è di u pinu in un libru mustrendu l’intelligenza è l’amore d’un paese è chì l’autori si primureghjanu di fallu capì.

 

      Les symboles de la Corse, Jean-René Laplayne è Véronique Emmanuelli, edizioni Assouline, 112 pagine, 30,34 scudi.