« Retour à la source »

d’Iviu Pasquali

 

 

         A casa d’edizione L’Harmattan hà publicatu pocu fà un libru d’Iviu Pasquali, in a seria « Graveurs de mémoire » sott’à u titulu « Retour à la source ». Quand’omu cunnosce a persunalità di l’autore, omu aspetta i so intusiasmi, i so palisamenti, rivindiche è altre pruteste. Puetu, canterinu, impruvisatore, Iviu Pasquali hà sempre fattu cunnosce u so amore di i valori antichi. U cantu di sicuru, ma dinù e tradizioni è sta mentalità, lascita d’identità  fendu chì a Corsica hè corsa. D’altrò, dedicheghja sta testimunianza à a moglia, à i figlioli è à a famiglia.

 

         Dice dinù : « À tutti quelli chì anu sappiutu mantene ciò chì ci addunisce aldilà di e rumpiture è interessi, à quelli chì anu travagliatu è datu pè u splendore, i muschi, i savori, i culori è i soni di a nostra isula senza mai dumandà nunda ; à tutti l’anonimi chì anu mantenutu è trasmessu a nostra lingua è i nostri canti, à tutti l’innamurati di a nostra terra, di a nostra machja, e nostre muntagne, e nostre coste chì anu campatu à modu semplice, degnu è umile, sta cultura di parechji seculi, à tutti quelli chì speranu in un avvene più bonu... è à tutti quelli ch’ùn anu mai capitu nunda è chì ùn puderanu mai capì ».

 

           L’autore parla di e lezziò ch’ellu hà ricacciatu di e so aventure, amenta a so zitellina, a so vita prufessiunale, a so passione di u cantu è di a cultura, mai assiccata cum’è a surgente « acitosa di l’acqua d’Orezza », puntu di partenza di una storia chì impone oghje di « vultà à a surgente ». Questa hè l’alleguria di un bisognu d’identità vera pè stu zitellu di Castagniccia chì dinunzia dinù una perdita di valori, un sradicamentu. Infine, Iviu Pasquali, 47 anni, ùn si scorda di e persone anziane è di a so « lascita vitale ! ».