« In corpu à Bastia »

da Ghjacumu Thiers

 

 

     L’ultimu rumanzu di Ghjacumu Thiers face parte di una seria di raconti chì Bastia hè u tema ricurrente. L’autore tene caru sta cità perchè ci hè natu. « Bastia hà sempre riprisentatu per mè una metafora, una cità chì, per via di u so passatu è di a so piazza mediterrania, avia una vucazione di metropola mista. Pare chì sta cità ùn abbia mai ammaestratu u so destinu ». Tandu, u scrittore prupone a so versione di stu destinu. À parte da un « ricordu di zitellina assai fattivu », principia à cuntà un storia, à imaginà un destinu à persone scunnisciute avendu puntellatu i so primi anni.

 

      Natu in u 1945, l’autore travaglia sempre nant’à una listessa perioda, quella chì, secondu ellu, hè un’epuca maiò in a storia isulana : da u 1943, annu di a liberazione di a Corsica sin’à l’anni 2000. « A perioda dopu à a guerra hè assai primurosa pè a Corsica. Pè a prima volta, deve scumbatte cù l’alterità, cù e sfarenti occupazioni nemiche. Ghjè a mutazione di una cultura cumunitaria versu una cultura suciale ».

 

      In u so ultimu rumanzu, a storia si passa in sta sucietà di l’anni sessanta chì evulueghja. À parte da un omu nant’à una mottò ch’ellu vidia spessu quand’ellu era chjucu, hà imaginatu u so destinu. « Ne aghju fattu un suldatu tedescu chì si ghjova di a liberazione di a Corsica pè scappà. U rumanzu trova l’estru in a storia di Bastia, di a Corsica d’insù è d’inghjò. » A traduzzione in francese di st’opera serà fatta da quì à qualchì mese.