DICEMBRE
Santu Eligiu. Santa Fiurenza.
Eligiu era un santu assai pupulare in Francia per via di a canzona:
Le bon roi Dagobert avait sa culotte à l'envers.
Le grand Saint Eloi lui dit: O mon Roi!
Votre Majesté est mal culottée.
C'est vrai lui dit le Roi,
je vais la remettre à l'endroit.
Eligiu era un orefice natu versu l'annu 588 à Chaptelat, vicinu à Limoges.
U rè di i Franchi, Cluttariu Secondu, l'avia datu l'oru per falli un tronu. Eligiu li ne fece dui. Allora u rè u fece direttore di a Zecca. E munete d'oru di tandu portanu a so signatura.
A' a morte di Cluttariu, u figliolu, Dagobertu Primu, cugnumatu u Salomone di i Franchi, fece di Eligiu u so primu cunsiglieru.
A' 51 annu, dui anni dopu à a morte di Dagobertu, Eligiu si hè fattu prete è ghjè diventatu u vescu di Noviomagu, l'attuale cità di Noyon, in u dipartimentu di l'Oise. Hè mortu in issa cità u 1u dicembre di l'annu 660. Avia una settantina d'anni.
Etimolugia: da u lat. "eligius" (elettu... da Diu).
Nomi: Eligiu, Eloi, Eloy.
Paesi è cità: Anversa, , Dunkerque, Limoges, Marseglia, Noyon, Bologna.
Prutezzione; Eligiu hè u santu patrone di l'orefici, di i stazzunari è, in generale, di tutti quelli chì battenu u ferru.
U 1u dicembre si festighjeghja dinù à Santa Fiurenza.
Una Santa Fiurenza, chì campava à u seculu quartu, serebbi stata cunvertita da Santu Ilariu, vescu di Poitiers.
Un'altra Santa Fiurenza, campava à u seculu sestu in Spagna è ghjera a surella di Santu Leandru è Santu Bisidoru.
Etimolugia è nomi: Cf Fiurenzu (4 lugliu).
Santa Bibiana. Santu Ghjuvanni Ruysbroeck.
Ghjulianu l'Apostatu, nipote di Custantinu, hè statu imperatore mancu dui anni (361-363). U so cugnome vene da u fattu ch'ellu hà rinnegatu u so battezimu cristianu. Hà pruvatu à cumbatte u Cristianisimu à à sparghje una specia di duttrina politeista. Dava tutti l'impieghi, civili è militari, à i pagani, è scacciafughjava quelli chì praticavanu a religione di Ghjesù Cristu senza veradimente persecutalli. Cusì avia fattu nasce una certa odiosità è ci fù quantunque qualchì martiru.
Contanu chì, à Bibiana l'avianu messa in manu à una rofiana per ch'ella ne fessi una prustituta, ma ùn a ci fece. Nè mancu pobbe falli rinnegà a so fede. Allora, l'anu liata à una culonna è l'anu tichjata di colpi cù un staffile piumbatu, sinu à ch'ella morghi.
Etimolugia: da u lat. "vivianus" (vivace).
Casate: Viviani.
Nomi: Bibian, Bibiana, Bibiane, Bibianu, Fithian, Vibien, Viv, Vivence, Vivencion, Viventiol, Vivia, Vivian, Viviana, Viviane, Vivianne, Viviano, Vivianu, Vivien, Vivienne, Vivine.
Prutezzione: preganu à Santa Bibiana pè a pena in capu è u malcaducu.
Ghjuvanni Ruysbroeck, dettu Ruysbroeck l'Ammirabile, natu in u 1293, mortu in u 1381, hè unu di i megliu scrittori mistichi. I so libri: "E Nozze spirituale", "E Stette Chjudende", "U Libru di a più Alta Verità", è d'altri, tradutti in parechje lingua, sò letti ancu avà.
Era natu à Ruysbroeck, accantu à Brusselle, è fù 26 anni cappellanu di a chjesa Santa Gudulla di issa cità. Dopu, hà creatu, à Groenendael, in u Brabante belgicu, una piccula cumunità di canonichi regulari ch'ellu hà guvernatu sinu à a so morte à 87 anni. Tutti u tenianu caru è ùn li truvavanu alcun difettu for di u frate giardinaru di u cunventu. Quellu li rimpruverava di ùn sapè distingue un legume da una gattiva erba è suffria quand'ellu u vedia ghjunghje in l'ortu per zappittà i pustimi.
Santu Francescu Saveriu.
Francescu Saveriu hè natu u 7 aprile 1506 in un castellu spagnolu di a Navarra, accantu à Pamplona.
Hè andatu à fà i so studii in Parigi è custì hà scontru u so paisanu, Gnaziu di Loiola. U 15 agostu 1534, tramindui è cinque altri cumpagni facenu u votu di creà una cungregazione. E' cusì hè nata a Cumpagnia di Ghjesù chì prupunia à i so membri di girà u mondu per sparghje e parulle di Diu (Cf 31 lugliu).
Fatu prete à 31 annu, u Ghjesuitu Francescu Saveriu parte, quattru anni dopu, per l'Indie portughese. Imbarca in Lisbona à u mese d'aprile 1541 è, tredeci mesi dopu, ghjunghje in a cità di Goa.
Anu contu chì, in dece anni di missione, hà fattu più di 100.000 chilometri. I primi sette anni hà giratu l'Indie suttane, l'isula di Seilan, a Malesia è l'Indonesia. In u 1549, li riesce di entre à u Giappone, ci stà dui anni, è crea una piccula cumunità cristiana di 1000 persone, cumunità chì, vinti anni dopu à a so partenza ne conterà 30.000. Scrivia: "U populu di u Giappone hè u megliu di i populi".
Per cunverte e pupulazioni, ùn circava teurie cumplicate. Li amaparava u Credu, u Pater Nostru è l'Ave Maria, servendusi di un interpetru. Incaricava i catechisti di cuntinuvà a so opera è si ne andava in altrò.
Francescu Saveriu manhjava pocu, pregava assai è ghjera sempre alegru.
In u 1551, rientre in l'Indie, decisu à passà in a China. Ghjuntu in l'isula di Scianguvan, di punta à Cantone, hè malatu è si ne more in una baracca, solu cù l'interpetru. Trè settimane dopu, sò ghjunti da Goa per piglià u so cadaveru è interrallu in issa cità.
Etimolugia: Francescu Saveriu vole dì Francescu di i Iaverri, chì ghjera u nome di u castellu duv'ellu hè natu. Hè una parulla basca chì currisponde à a corsa: Casanova.
Paesi è cità: Indie, Mongolia, Pakistan, Piacenza, Bastia, Goa, Macao, Portugallu, Pamplona. In Corsica: Ghidazzu.
Prutezzione: missiunarii; turisimu.
Santa Barbara. Santu Ghjuvanni u Damascenu.
Barbara serebbi una vergine marturiata à u terzu o quartu seculu, forse in Egittu, o à u LIbanu, o in Nicumedia, o in Roma, forse ancu in Toscana.
A legenda conta ch'ella era una bellissima zitella sequestrata da u babbu per francalla da l'omi. Pudia riceve vechji filosofi è vechji pueti per istruissi. Quelli, ùn si sò micca cuntentati di amparalli i secreti di a sapienza, l'anu cunvertita à u Cristianisismu.
Quandu u babbu a sà, a sottumette à u turmentu di u focu, ma u focu ùn pò nunda contru à ella. Allora, a face scapà. Tandu u focu di u celu si scatena è tomba u babbu.
Etimolugia: da u gr. "barbaros" (barbaru, strangeru).
Nomi: Baab, Babette, Babie, Bärb, Barbara, Barbary, Barbe, Bärbel, Barberina, Barberine.
Paesi è cità: Paternò. In Corsica hè festa patrunale in Cavru, ma Barbara avia altre chjese: in Zonza, Guargualè, Figari, Sotta, forse in Pitrettu Bicchisgià, Sartè è Orezza.- Nantu à a cumuna di u Poghju di Moriani, tramezu à Santa Cristina di Campulori è u paese, in un locu chjamatu Santa Barbara, ci era una abbazia chì dipendia da i frati benedittini di l'isula di Monte Cristu.
Prutezzione: per via di u focu citatu in a legenda, Barbara hè diventata a santa patrona di l'artigliori, i suldati di u geniu, i minadori, l'armurieri è i pumpieri. A preganu pè u tonu è a morte subitania.
Usi: u ghjornu di Santa Barbara, si pianta u granu dentru à piatti tenuti à u bughju. U granu serà propiu bellu in Natale è serverà per decurà u presepiu.
Ghjuvanni u Damascenu (vene à dì: di a cità di Damascu, in Siria) era figliolu di un anzianu ministru di e finanze. Era prefettu à a Corte di u Califfu quandu, à 50 anni, si hè fattu frate à a laura di Mar Sabba, in Palestina. Hè custì ch'ellu hè mortu versu l'annu 749. Avia uan centinara d'anni. Era un sapiente è puetu. U so libru "Surgente di a Cunnuscenza" hà fattu sapè, in Occidente, a duttrina di i Patri d'Oriente. Hè statu traduttu in latinu versu l'annu 1150. San Tumasgiu d'Aquinu u cita aspessu.
In u 1890, Gjuvanni u Damascenu hè statu fattu duttore di a Chjesa da u papa Leone XIII.
Etimolugia, casate è nomi: Cf Ghjuvanni (27 dicembre).
Santu Ghilardu. Santu Sabba.
Ghilardu era un frate natu in Francia. Hè mortu vescu à u Portugallu u 5 dicembre 1109.
Un ghjornu chì l'arcivecu di Toledu era ghjuntu à u munasteru di Mussacience (l'attuale Moissac, in u dipartimentu di u Tarn-et-Garonne), intese cantà cusì bè chì ne era una maraviglia. Amparendu chì ghjera Ghilardu chì dirigia i cantori, u si purtò cun ellu in Spagna. In Toledu, Ghilardu si fece una riputazione di grande musicante è di santità.
Elettu vescu di Braga, à u Portugallu, Ghilardu dà forza à a religione catolica, chì avia persu assai per via di a prisenza di i Mori, è cunverte quasi tutti i sgiò di a dioccesi chì, nanzu, ùn campavanu chè di rapine è ùn pinsavanu chè à bambuscià.
Ghilardu hè mortu in Bornos, un ghjornu ch'ellu cunsacrava una di e numerose chjese ch'ellu avia fattu ricustruì.
Etimolugia, casate è nomi: Cf Gherardu (u 3 uttobre).
Santu Niculaiu.
Niculaiu serebbi natu versu l'annu 270 in l'Asia Minore. Hè statu vescu di Mire, l'attuale Demre, in Turchia. Hà participatu à u cunciliu di Nicea in 325. Hè mortu un 6 dicembre trà l'annu 345 è l'annu 352.
In l'undecesimu seculu, l'osse di Niculaiu sò state purtate in Bari, una cità di e Puglie taliane. Da tandu, i pelegrini d'Europa andavanu in Santu Niculaiu di Bari, cum'elli andavanu in Roma o in Santiagu di Compostella.
Niculaiu hè u santu u più pupulare di a Chjesa ortodossa. A' u Medievu, u so cultu si hè spartu in i paesi Scandinavi, in Alemagna, in Olanda, in Belgica, in Sguizzera, in Lorena è in Alsassia. Hà francatu l'Atlanticu purtatu da i migranti germanichi. In America l'anu vestutu cù un mantellone rossu, cum'è Babbu Natale. Da tandu, in parechji paesi, face cuncurenza à Babbu Natale, dendu rigali à i zitelli bravi. Cun ellu, ci hè un persunagiu incaricatu di dà a frusta à quelli chì sò gattivi.
Etimolugia: da u gr. "nikè" (vittoria) è "laos" (populu).
Casate: Nicoli, Nicolai, Nicolini, , Nicorelli. In l'81, Nicolai era à l'undecesimu rangu di e caste corse.
Nomi: Claes, Claus, Clos, Colas, Cole, Colette, Colin, Cozette, Klaasina, Klasie, Klaus, Kleiske, Klose, Kola, Kolaig, Neacail, Nicco, Niccolo, Nichol, Nichola, Nicholas, Nick, Nickie, Nicky, Niclaus, Nicol, Nicola, Nicolaas, Nicolaï, Nicolao, Nicolas, Nicolasa, Nicolau, Nicole, Nicolet, Nicoletta, Nicolette, Nicoli, Nicolin, Nicolina, Nicoline, Nicolo, Nicolò, Nicolu, Nicou, Niculaiu, Niculau, Niculetta, Niekje, Niels, Nigole, Nikki, Niklas, Niklaus, Niklavs, Nikol, Nikolaï, Nikolajs, Nikolaus, Nikolaz, Nikolia, Nikôs, Nikosch, Nikoucha, Nils, Niolò, Niss, Nisse, Nitsche, Nyk.
Paesi è cità: Russia, Bari, Andona, Sassari, Sicilia, Corfù, Amiens, Lorena, Parigi.In Corsica: Cugnoculi Muntichji, Arrù, Guagnu, Curà, Felicetu, Tuminu, Santu Niculaiu di Moriani, Porri, Castifau, Livia, PItrettu Bicchisgià, a Sarra di Scopamena, Olmi Cappella, Auddè, a Munacia d'Auddè, , Calasima.- In Corsica, u cultu di Santu Niculaiu venia à u settesimu rangu dopu à Santa Maria, San Ghjuvanni, San Petru, San Martinu, San Quilicu è San Michele. Avia 33 chjese.
Prutezzione: Niculaiu hè u santu patrone di i viaghjadori, di i marinari, di i nutari è avucati, di i marcanti di vinu, di biera, d'acqua, di i vechji figli, di e femine senza dota è di i bravi zitelli.
Arte: Pè u più, Santu Niculaiu hè riprisentatu vestutu da vescu, cù a mitria è u bastone pasturale. U so simbulu hè fattu cù trè boccie. D'altronde, in tutte e so legende si ritrova u numeru 3: 3 ufficiali rumani salvati da a morte, 3 mele in oru per salvà trè zitelle cundannate à fà a vita, 3 pezze in oru per cumprà una battelata di granu, i 3 zitelli messi in sale da un salamaghju è rinviviti, a so nutritura di tutti i ghjorni fatta di 3 grane di melangrana è 3 tazze d'acqua.
Santu Ambrosgiu.
Ambrosgiu hè natu in Trevisi versu l'annu 340. Era u figliolu di un altu funziunariu rumanu incaricatu di l'ordine in Milanu. Ellu, hè statu guvernatore di e pruvincie Emilia è Liguria.
Quand'ellu hà 34 anni, ci hè, in Milanu, l'elezzione di u vescu. Ortodossi è Ariani eranu in disaccordu è risicava di corre u sangue. Allora u populu hà impostu à Ambrosgiu chì, tandu, ùn era ancu battizatu. In ottu ghjorni hè statu battizatu è urdinatu. Hè statu cunsacratu u 7 dicembre 374.
Ambrosgiu hè u vescu chì hà battizatu à Sant'Agustinu. Un' si cuntentava micca di predicà a fede cristiana, si inframettia trà u guvernu è l'auturità ecclesiastiche. Hè mortu in Milanu u 4 aprile di l'annu 397. Hè statu sepoltu, secondu e so vuluntà, accantu à i santi Gervasiu è Prottasiu.
Etimolugia: da u gr. "ambrôsios" (immurtale).
Casate: Ambrogi, Ambrosi, Ambrosini, Ambrogiani.
Nomi: Ambrogio, Ambroise, Ambrose, Ambrosgiu, Ambrosio, Broz.
Paesi è cità: Milanu, Vigevano.
Prutezzione: Preganu à Sant'ambrosgiu pè l'ape è l'animali dumestichi.
Sosula: Si sà chì i dii grechi ùn murianu micca per via ch'elli avianu u privilegiu di beie l'ambrosia. Ciò ch'ellu era issu liquore, ùn si sà. Ci sò chì pretendenu ch'ellu era fattu cù u nettaru di i fiori. Oghje, facenu un liquore, chjamatu "ambrosia", chì ùn hà nunda à chì vede cù quellu di i dii grechi. Eccune a ricetta:
Fate macerà:
. 10 litri d'acquavita... di a buna.
. 5 litri di vinu biancu... vechju di preferenza.
. 80 grammi di coriandra.
. 20 grammi di carofanu.
. 20 grammi d'anicinu verde.
. è 14 centesimi di grammu di muscu.
Lasciate ripusà dece settimane. E' po, filtrate, è aghjunghjiteci 7 chilò è mezu di sciroppu di zucchezru è 5 litri d'acqua... distillata s'ellu hè pussibile.
Mettite in buttiglie belle sugillate.
A celebrazione di l'Immaculata Cuncezzione di Maria Vergine, antichissima in Oriente, hè stata istituita in Occidente à u settesimu seculu.
U dogmu di l'Immaculata Cuncezzione ùn hè micca statu accettatu senza dificultà. San Bernardu, à u seculu XII, San Bonaventura è San Tumasgiu d'Aquinu à u seculu XIII, ùn ne vulianu sente parlà. I primi à insegnallu sò stati un Inglese è un Irlandese è, soprattuttu, à u seculu XIV, u franciscanu scuzzese Duns Scot.
In Francia, a Sorbona hà accettatu u dogmu è Bossuet l'hà ghjustificatu, allora chì i discepuli di San Tumasgiu cuntinuvavanu à predicà chì Maria avia peccatu. Parechji papa anu avutu à intervene per falli stà zitti.
Ci hè vulsutu à aspettà u seculu XIX per chì u dogmu di l'Immaculata Cuncezzione sia impostu da da Piu Nonu (1846-1878). L'8 dicembre 1854, publicava a so bolla "Ineffabilis" chì dicia:
"Subitu cuncepita, per grazia è privilegiu di u Diu omniputente, a beata Vergine Maria hè stata preservata da u peccatu uriginale."
Quattru anni dopu, in Lourdes, a Madonna apparia à Bernardette Soubirous, dicenduli: "Je suis l'Immaculée Conception".
Nomi: in Corsica usava u nome Cuncetta, datu in l'onore di a Madonna cum'è Nunzia, Natività è Assunta.
Paesi è cità: l'Isula Rossa, Pigna, Carpinetu, Caroneu è u Seminariu d'Aiacciu.- Ramintemu chì, à a cunsulta di Corti di u 31 ghjennaghju 1735, i Corsi, in rivolta contru à Genuva, avianu sceltu l'8 dicembre cum'è festa naziunale. Un preambulu à una specia di Custituzione dicia:
"Eleghjimu l'Immaculata Cuncezzione di a Vergine Maria, pè a prutezzione di a Patria è di tuttu u Regnu di Corsica. A so imagine deve esse stampata nantu à tutti i scudi è tutte e bandere. A vigilia è u ghjornu di a so festa, seranu celebrati in tuttu u Regnu cù a massima devuzione è dimustrazioni di gioia à rombu di moschetteria è cannone".
Santu Valeriu.
Valeriu era un abbate, discepulu di San Culumbanu, mortu in l'annu 622.
Etimolugia: da u lat. "valere" (purtassi bè, esse furzutu).
Casate: Valeri, Valery.- Ricurdemu a furmazione di e casate in "y". A parte da un nome, una casata hè un plurale chì si face in "i". Es. Michele dà i Micheli, Leone da i Leoni, ecc. Valeriu dà i Valerii, cù doppia "i". Prima, scrivendu, avianu l'abitutine di finì cù una fiuritura è cusì a seconda "i" si assumigliava à una "i" longa (j). L'appicciu di a "i" è di a "i" longa, hà datu (cù l'influenza francese) a "i" greca (y).
Nomi: Valère, Valeria, Valerian, Valeriana, Valériane, Valerianka, Valeriano, Valerianu, Valerianus, Valérie, Valérien, Valérienne, Valerijs, Valerio, Valeriu, Valero, Valery, Valéry, Valeska, Valier, Valioucha, Valioukha, Vallie, Valore, Valy, Waleria.
Santu Rumaricu. Santa Eulalia di Merida.
Rumaricu era un signoru francu à u serviziu di u rè d'Austrasia, issu regnu orientale di a Gallia. Hà abbandunatu u mistieru di l'arme per fassi frate à Luzzovium, (l'attuale Luxeuil-les-Bains in u dipartimentu di a Haute-Saône), in u munasteru chì San Culumbanu venia di creà.
Rumaricu era pruprietariu di terre in a muntagna di e Vosges. Cù u so amicu Santu Amatu, ci fece dui cunventi, unu in un locu chì hà pigliatu u so nome: Montis Romarici, duv'ella hè nata a cità di Remiremont. Hè mortu in issu munasteru l'8 dicembre di l'annu 653.
Etimolugia: da u germ. "hrod" (gloria), "mar" (rinomina) è "ric" (putente).
Nomi: Maric, Romanic, Romarich, Romary, Romarico, Rumaricu.
I Spagnoli anu assai fede per duie giovane martire, duie zitelle di listessu nome: Eulalia di Barcellona, festighjata u 12 ferraghju, è Eulalia di Merida. Serebbi di ista ultima chì Prudenziu, u famosu puetu di lingua latina, hà scrittu:
"Mai, nisuna criatura umana, ebbe tanti doni, tanta grazia, tanta bellezza. I dodeci inverni è i tredeci verani ch'ella passò nantu à ista terra, fù cum'è una strangera in istu mondu. Mai volse sente parlà di lettu nuzziale: a so persona appartenia à Ghjesù Cristu. Mai ebbe gustu à i ghjochi di e zitelle di a so età. Avia in orrore i delizii ammoglianti, u dolce parfume di e rosule è e visture spampillante."
Quandu Dioclezianu dete ordine di persecutà i Cristiani, Eulalia volse avè l'onore di esse marturiata. I genitori, per francalla da a morte, a chjusenu in una torra. Eulalia riescì à cunvince a cameriera chì avia a chjave è, traminduie, si prisentonu davanti à u tribunale, sputendu in faccia à u ghjudice chì e cundannò à morte. U martiriu d'Eulaia fù longu. Lampata nantu à un legnaghju accesu, l'anu vista ingolle e fiare per ghjunghje più prestu à u latu di u Signore.
Etimolugia: da u gr. "eulalos" (chì parla bè).
Nomi: Eula, Eulalia, Eulalie, Lallie, Lia.
Paesi è cità: Merida, Lentini.
Santu Daniele. Santu Damasiu.
Daniele hè natu l'annu 409 in Mratta, l'attuale Samsate, in Turchia. Era un frate chì si era fattu stulitu, unu di issi frati chì campavanu nantu una culonna, sposti à tutti i venti. Hè mortu vicinu à Custantinopuli à l'età di 84 anni, l'11 dicembre 493.
Dicenu chì a so culonna a l'avia fatta fà l'imperatore. Cunsistia in un tavulacciu nantu à dui pilastri cù un parapettu è un tettucciu. Per ghjunghjeci ci era una scala. Ci hè statu 33 anni, sinu à a morte.
Da quassù, predicava. Avia sempre i listessi discorsi: "tenite caru u Signore chì ellu vi tene caru; u peccatu ùn pò dà felicità", è po: "tenite caru à tutti, soprattuttu i poveri".
Dicenu dinù chì i nutabili venianu à cunsultallu è ancu l'imperatori Leone Primu (457-474) è Zenone (474-491). Cum'è tutti, cullavanu a scala per discorre cù issu discepulu di u più celebre di i stuliti: San Simeone (Cf u 5 ghjennaghju).
Etimolugia: da l'ebreu "dan" (ghjudice) è "el" (Diu): u mio ghjudice hè u Signore. A' l'urigine di u nome Daniele, ci hè u prufetu d'Israele, in l'Anzianu Testamentu.
Casate: Dani, Danieli, Danielli.
Nomi: Dania, Danie, Daniel, Daniela, Daniele, Danièle, Danielle, Danielo, Daniélou, Danielu, Danila, Danilo, Danitza, Danjel, Dännel, Dany, Deniel.
Damasiu, papa da l'annu 366 à l'annu 384, era figliolu di un prete spagnolu. Si fece prete in Roma è fù elettu à a testa di a Chjesa di Ghjesù Cristu. A l'epica, u Cristianisimu era diventatu religione di Statu è i Cristiani avianu tutti i cumandi, ma eranu in disaccordu frà di elli.
Damasiu ebbe à cumbatte l'Ariani chì avianu elettu un antipapa. Dumandò à San Ghjilormu di traduce u Novu Testamentu in latinu, è u latinu sustituì u grecu in a liturgia d'Occidente.
Damasiu avia un cultu particulare pè i martiri. Hà fattu riparà è ingrandà e catacombe, è metteci scrizzioni in latinu. Certe esistenu sempre. Hè custì chì i papa eranu sepolti. Ellu, in a critta di u cimiteriu San Calistu, ci fece mette una lastra chì dicia: "Ancu eiu mi serebbi piacciuta di esse sepoltu quì, accantu à i santi, ma temu di prufanà e so cendere"... è fù sepoltu in una chjesa di a via Ardeatina.
Santa Ghjuvanna. Santu Spiridione.
Ghjuvanna si chjamava Jeanne-Françoise Frémiot. Era a figliola di un presidente di u Parlamentu di Burgogna. Hè nata in Dijon in u 1572 è ghjè morta in Moulins u 13 dicembre di u 1641.
A' 20 anni, hè stata maritata cù u barone Christophe de Rabutin-Chantal è hà parturitu sei volte. Quattru figlioli anu campatu, trè femine è un maschju chì fù u babbu di Madame de Sévigné.
Dopu à ottu anni di matrimoniu, more u maritu. Quattru anni dopu, scontra à San Francescu di Sales chì dirige a so cuscenza è diventa u so più caru amicu.
A' 38 anni, cunsigliata da San Francescu, crea a Cungregazione di e Visitandine, un Ordine fattu per visità i poveri ma chì diventa prestu un Ordine di cuntemplative è di sore incaricate di l'educazione di e zitelle.
Quand'ella more, à 69 anni, dopu à 31 annu di vita religiosa, e sore di a Visitazione avianu 86 cunventi. Ella hè stata sepolta in Annecy, in a cappella di u primu cunventu accantu à San Francescu di Sales.
Etimolugia casate è nomi: Cf à San Ghjuvanni (27 dicemmbre).
In Carghjese, a festa patrunale hè quella di Maria Assunta, u 15 agostu, tantu pè u ritu latinu chè pè u ritu grecu, ma u patrone di i Grechi hè Santu Spiridione, un vescu di Trimidonte, in l'isula di Cipru, mortu versu l'annu 374. Issu santu hè unuratu in Carghjese u 12 dicembre, cum'è in tutta a chjesa d'Oriente, allora chì quella d'Occidente u festighjeghja u 14.
Spiridione serebbi statu marturiatu attempu à d'altri veschi. A' tutti li avianu cacciatu l'ochju dirittu è tagliatu u pesciu di a gamba manca. E so osse sò cunservate in Corfù duv'ellu hè u santu patrone di l'isula.
Nanzu di esse vescu, Spiridione era un pastore pecuraiu. Contanu chì, una notte, avianu pruvatu à arruballi a so banda di l'animali, ma ùn a ci fecenu chì e so pecure ùn si muvianu. A' u fà di u ghjornu, Spiridione scuntrò i ladri è li dete un castratu dicendu ch'ella era cusì facile di dumandà è micca di arrubà.
Santa Lucia.
Lucia era una vergine siciliana, marturiata in Siracusa versu l'annu 290.
A legenda conta ch'ella hè stata dinunziata cum'è Cristiana da un giuvanottu chì si ne era innamuratu è ghjera statu rispintu. Hè stata cundannata à fà a vita di e prustitute ma, quand'elli a volsenu purtà in una casa, restò ferma cum'è una culonna è mancu dui boi l'anu pussuta move. Anu pruvatu à brusgialla ma e fiare si alluntanavanu. In fine, l'anu scannata.
Avia dettu à u ghjudice: "Tù rispetta a vuluntà di i to patroni, éiu rispettu quella di u mio Diu; tù trema davanti à i to principi, eiu ùn temu chè u mio Diu; tù , i to principi ùn li voli dispiace, eiu u mio Diu ùn u vogliu offende. Fà dunque ciò chì ti pare è piace, eiu feraghju ciò chì serà utile pè u salvamentu di l'anima meia".
Una altra legenda dice chì, per fassi goffa, si sradicò l'ochji è i mandò, nantu à un piattu, à u so innamuratu, ma a Vergine Maria i li rese più belli è più lucenti.
A salma di Santa Lucia hè stata purtata da Siracusa in Custantinopuli è da Custantinopuli in Venezia.
Etimolugia è nomi: Cf Lucca (18 uttobre).- In u 1981, in Corsica, Lucia venia à u dodecesimi rangu di i nomi feminili. Era quellu di 12 donne nantu à 1000.
Paesi è cità: Siracusa. In Corsica: Bucugnanu, Azzana, Talasani, Chera, u Viscuvatu, Santa Lucia di Mercuriu, Santa Lucia di Moriani, Santa Lucia di Tallà, Santa Lucia di Portivechju. A' u Medievu, Santa Lucia avia 29 chjese è ghjè sempre stata cum'è in Roma, a Santa Patrona di parechje cunfraterne.
Prutezzione: Sinu à a riforma greguriana di u calindariu, a festa di Santa Lucia era u 27 dicembre è currispundia à u sulstiziu d'invernu, quandu i ghjorni riprincipianu à cresce, quandu a luce rivene. Da u 1584, u pruverbiu francese : "à la Sainte Luce, les jours avancent d'un saut de puce" ùn hè dunque più valevule. Per via di a currispundenza cù u sulstiziu, dunque di u nome, Santa Lucia avia a riputazione di guarì l'ochji malati. Ancu oghje si sente dì: "chì San Lucia ci cunservi a vista".- In Parigi, Lucia hè a santa patrona di i sartori.
Santu Agnellu. Santu Ghjuvanni di a Croce.
Secondu San Ghjuvanni, l'agnellu hè u simbulu di u Cristu chì si sacrificheghja per riscattà i peccati. In u so Vangellu conta chì Ghjambattista battizava, quand'ellu vide à Ghjesù chì venia versu ellu è disse: "Eccu l'Agnellu di Diu chì toglie u peccatu da u mondu".
In l'Apocalisse, l'Evangelistu ripiglia u simbulu di l'Agnellu. Dice chì, in celu, accantu à u tronu di Diu, mezu à i quattru animali è i vintiquattru vechji, ci era l'Agnellu chì stava in pedi, ma chì paria esse statu tombu.
L'Agnellu avia sette corne è sette ochji chì sò i sette spiriti di Diu, mandati in tutta a Terra.
E' l'Agnellu si avvicinò è pigliò u libru da a manu diritta di quellu chì pusava nantu à u tronu.
Quand'ellu ebbe pigliatu u libru, i quattru animali è i vintiquattru vechji si prusternonu davanti à l'Agnellu. Ugnunu avia cetere è coppe piene di parfumi, chì sò e prighere di i santi.
E' cantavanu un novu cantu chì dicia: "Tù si degnu di riceve u libru è di apre i so sugilli; chì tù si statu tombu è, cù u to sangue, ci ai riscattatu. E', in più, ci ai fattu rè è preti di u nostru Diu, è noi regneremu nantu à a Terra".
E' si intese millaie è millaie di voci chì dicianu: "Degnu hè l'Agnellu, chì ghjè statu scannatu, di riceve a putenza, è e ricchezze, è a sapienza, è a forza, è l'onore, è a gloria, è a benedizzione".
E' tutte e criature chì sò in celu, è in terra, è sottu terra, è in mare, dicianu: "à quellu chì posa nantu à u tronu è à l'Agnellu, sia a benedizzione, è l'onore, è a gloria, è a forza, in i seculi di i seculi".
Paesi è cità: A celebrazione di a memoria di un Santu Agnellu abbate, si hè sparta dopu à l'undecesimu seculu quandu un sottudiacunu di a Chjesa di Napuli scrisse un libru per cuntà i miraculi di u santu. Più tardi, anu parlatu di e so intervenzioni per liberà à Napuli è à Sorrente accampate da i Saracini. E' po u cultu hè ghjuntu in a pruvincia di Frossinone è in Lucca.
In Ruglianu (festa patrunale) u cultu pò esse statu purtatu da i marinari in lutta contru à i Barbareschi.
Ghjuvanni di a Croce, duttore di a Chjesa, natu l'annu 1542 in a Vechja Castiglia, hè mortu in l'Andalusia u 14 dicembre 1591.
Hè unu di i megliu scrittori mistichi di a Chjesa latina è unu di i megliu pueti spagnoli. E so opere e più cunnusciute sò: "A Notte Scura", "U Canticu Spirituale" è "A Fiara d'Amore".
Ghjuvanni era di una famiglia nobile ma sbaiuccata. Hè statu un zitellu massu è un omu gentile. Più bravu, ùn ci ne era. A' 21 anni si hè fattu frate carmelitanu. A' 25, hè diventatu l'amicu fidu fi Santa Teresia d'Avilla, a so paisana.
Ghjuvanni hà rifurmatu u so Ordine creendu i Carmelitani scalzi. Hè statu persecutatu da i calzi chì l'anu chjusu in una cellula, ma dinù da quelli di a so riforma chì l'anu speditu in un paisolu scantatu di l'Andalusia, luntanu da tutte e persone ch'ellu tenia caru è chì u tenianu caru.
Etimolugia, casate è nomi: Cf Ghjuvanni l'Evangelistu (27 dicembre).
Santu Valerianu.
Trè santi portanu u nome di Valerianu:
. unu hè statu marturiatu in Turnus, In Burgogna, versu
l'annu 178;
. un altru in Roma in 229;
. un terzu in a cità taliana di Forli à u seculu quintu.
Etimolugia, casate è nomi: Cf Valeriu (9 dicembre)
Paesi è cità: Vicinu à Parigi, u "Mont Valérien" hè una culletta alta 130 metri. Ci si andava in pelegrinaggiu. Da u seculu XV à a Rivuluzione francese, ci stavanu i rimiti. In u 1634, u prete Hubert Charpentier ci avia fattu una Viacruci è un Calvariu. Da u 1806 à u 1811, i Trappisti ripiglionu l'usu di u palegrinaggiu. Da u 1816 à u 1830, ci stetenu i missiunarii di Francia chì ci anu fattu un cimiteriu. In u 1841, ci anu edificatu una furtezza chì ghjuvò durante a guerra di u 70. Dopu ci anu messu a telegrafia militare è a meteorolugia. Oghje ci hè u memuriale in l'onore di i Francesi tombi da l'Alemani durante l'ultima guerra.
Santa Albina. Santa Adelaide.
Albina era una vergine di Cesarea marturiata versu l'annu 249.
Etimolugia: da u nome lat. "albus" (biancu).
Nomi: Albain, Alban, Albana, Albane, Albanus, Albin, Albina, Aubaine, Auban, Aubin.
Adelaide, nata in Burgogna versu l'annu 931, hè morta in Alsassia u 16 dicembre 999.
Regina d'Italia è d'Alemagna, hè stata a prima imperatrice di u Santu Imperu. Era bella è graziosa chì ne era una maraviglia. E', in più, era struita.
A' 16 anni, u babbu, rè di Burgogna, l'avia maritata cù u rè d'Italia chì morse trè anni dopu, avvelenatu da Berengariu chì si dichjara rè è prupone à Adelaide di maritalla cù u figliolu. Ella scappa è dumanda aiutu à Ottone Primu, rè d'Alemagna. Ottone scaccia à Berengariu, si pruclama rè d'Italia è, cum'ellu era veduvu, si marita cù Adelaide chì, tandu, avia una vintina d'anni.
Dece anni dopu, Ottone vene à u succorsu di u papa chì li dà a curona imperiale di Carlumagnu. Hè cusì ch'ellu hè natu u Santu Imperu chì durerà più di 8 seculi, sinu à Napulione.
A' a morte d'Ottone, u 7 maghju 973, Adelaide guverna cinque anni u Santu Imperu à contu di u figliolu Ottone Seconde chì si era zitellu. U guvernerà torna da 991 à 996 à contu di u figliulinu.
In 996, Adelaide avia 65 anni. Campa torna trè anni, occupata à prutegge a Chjesa è à aiutà i poveri. More in viaghju à Seltz, vicinu à Strasburgu.
Etimolugia: da u germ. "adel" (nobile) è "heit" (rangu, razza).
Nomi: Adelaïda Adelaide, Adelaide, Adelaïde, Adelheid, Adoucha, Alissa, Della.
Paesi: Boemia, Polonia, Silesia.
Santu Lazaru.
Lazaru era u fratellu di Marta è di Maria. Secondu u Vangellu di San Ghjuvanni, Ghjesù l'hà risuscitatu allora ch'ellu era mortu da parechji ghjorni.
Legende nantu à ellu ci ne hè tantu è più. Ne facenu un vecsu di Cipru... o di Marseglia. U facenu martiru à i tempi di Nerone è ancu più tardi.
A' u medievu, u cunfundianu cù u Lazaru di a parabula di u riccu gattivu, un circataghju spillaccheratu è carcu di piaghe. Hè cusì ch'ellu hè diventatu u santu di i pestiferi.
Etimolugia: da l'ebreu "El'azar" (Diu hà datu aiutu).
Nomi: Eléazar, Eliezer, Lazare, Lazaro, Lazaru, Lazarus, Lazzari, Lazzaro.- U nome Lazaru u davanu à un figliolu aspettatu è desideratu.
Casate: Lazzari, Lazzeri, Lazarini, Lazzarini.
Paesi è cità: in Francia, pare chì "Lazare" ùn esisti micca cum'è nome di persona. Ma a festa hè celebrata attempu à quella di Marta, u 29 lugliu, secondu u calindariu di Ghjerusalemme. In a dioccesi d'Autun hè festighjatu u primu sittembre è, in Marseglia, u 17 dicembre.
Paesi è cità: Marseglia.
Prutezzione: Lazaru hè u santu patrone di i pestiferi (Cf a parulla "lazarettu").
Santu Grazianu. U Beatu Ludovicu.
Grazianu serebbi statu marturiatu l'annu 303, in l'Ambianese, l'attuale regione d'Amiens in u dipartimentu di a Somme.
Etimolugia: da u lat. "gratia" (graziosu, amabile).
Casate: Graziani, Grazioli, Graziosi, Grazietti.
Nomi, Engracia, Giorsal, Grace, Gracie, Gracieuse, Grata, Gratiane, Gratianne, Gratien, Gratienne, Gratiniano, Grato, Graziana, Grazianu, Graziella, Graziello, Graziosa.
U 18 dicembre 1782, muria, in Calinzana, Ghjuvan Marcu Luigi, dettu Ludovicu.
Era natu in Zuani in u 1712. I genitori vulianu fanne un prete è li fecenu amparà u latinu da u curatu di Tallone. Per via di gattive frequentazioni, diventò un zitellu disubbidiente, scrianzatu, alpestru, orgugliosu è ricusò di cuntinuvà à studià.
Avia 19 anni quandu a so innamurata si annegò in fiume sottu à u paese. L'addisperu fece ch'ellu ritruvò a fede di quand'ellu era zitellu.
Tandu, infatta chì San Teofilu ghjunghje in Zuani per creà u so famosu Ritiru è Teofilu u cunvince di a vanità di e cose di istu mondu, è u cunsiglia di parte in Roma à studià a teolugia.
Quand'ellu volta, hè fattu prete è ghjè accettatu à u cunventu di Niolu.
Ludovicu hà passatu quaranta anni di a so vita à predicà, soprattuttu in u circundariu di Corti è in Balagna. A so fede, e so virtù, l'anu permessu di fà qualchì miraculu.
Quand'ellu hè mortu, in Calinzana, l'anu sepoltu in a chjesa di San Biasgiu è, per ramintà ch'ellu era statu un predicadore famosu, anu scrittu , nantu à a so tomba, ch'ellu era un secondu Demostene.
Contanu ch'ellu attasanava à Pasquale Paoli per ch'ellu cacciessi da prigiò un prete di Zuani chì ghjera di u partitu di i Matra. Annervatu da i so discorsi - chì parlava di scumunicallu - Paoli l'averebbi minacciatu. E' Ludovicu rispose: "Eccelenza, nè eiu primu martiru, nè voi primu tiranu". E' u prete ebbe a libertà.
Etimolugia, casate è nomi: Cf San Luigi (21 ghjugnu).
Santu Dariu. Santu Urbanu.
Dariu, secondu u libru di Daniele, in l'Anzianu Testamentu, serebbi statu un rè di Babilona.
Dariu fece di Daniele u primu presidente. L'altri eranu ghjelosi è aspettavanu ch'ellu fessi qualchì malfatta per dinunziallu. Ma malfatte ùn ne facia.
Allora, dissenu à Dariu: "Fà un decretu; chì quellu chì ferà una riquiesta à un diu o à un altru omu chè tè, sia lampatu in a fossa à i leoni".
Daniele, surpresu in traccia di pregà, fù lampatu mezu à i leoni.
Dariu passò a notte senza cena è senza dorme.
A mane, à l'alba, si spicciò di andà à a fossa di i leoni, chjamendu à Daniele cù voce dulurosa.
Daniele ùn era micca mortu. I leoni ùn l'avianu mancu toccu. Disse: "O Rè, posse tù campà in perpetuu! U mio Diu hà mandatu un anghjulu chì hà tuppatu a bocca à i leoni, per via chì sò statu ghjustu cun ellu è ghjustu cù tè".
Dariu si rallegrò, fece caccià à Daniele da a fossa è ci messe quelli chì l'avianu incausatu, è so moglie, è i so figlioli.
E' po, à tutti i populi è nazioni, mandò lettere chì dicianu: "Chì a vostra pace cresci. Ugnunu deve riverì u Diu di Daniele chì face miraculi in celu è in terra".
Etimolugia; da u gr. "dôron" (rigalu).
Casate: Dari, Dary.
Nomi: Cf Isidoru (4 aprile).
Urbanu Quintu (Guglielmu di Grimoald), papa da u 1362 à u 1370, era natu l'annu 1310 in Grisaccu, un paese di l'attuale dipartimentu di a Lozère. Fù u settesimu papa à stà in Avignone.
In u 1367 si ne era andatu in Roma. Ci stete dui anni è mezu. U 17 aprile 1970, vultava i Avignone. Santa Brigida (Cf u 23 lugliu) ùn vulia è li disse chì s'ellu partia avia più pocu à campà. E' di fatti, nove mesi dopu, u 19 dicembre muria. Un' volse spirà in u palazzu di i papa è si fece purtà in una casa mudesta dicendu di lascià a porta aperta per chì a ghjente veghi chì un papa era capace di more in bon cristianu.
Etimolugia: da u lat. "urbanus" (urbanu).
Casate: Urbani;
Nomi: Bahn, Bahne, Bahnes, Bohn, Urb, Urbain, Urbaine, Urban, Urbana, Urbane, Urbanilla, Urbano, Urbanu, Urbanus, Urbas, Urbice.
I Patriarca.
I Patriarca sò i primi capifamiglia di l'Anzianu Testamentu. Da a creazione di u mondu à u dilluviu, eranu dece. I più impurtanti sò: Adamu, Set, Enos, Matusalemme è Noè.
Dopu à u dilluviu, Diu dete a so benedizione à Noè è à i so figlioli è li disse: "fruttate è multiplicate, è riempiite a Terra". E' i trè figlioli di Noè, Sem, Cam è Iaffet, anu ripupulatu a Terra.
Discendente da Sem à a decesima generazione, fù u patriarca Abramu, Patre di i Ghjudei.
Ubbidiente à l'ordini dati da Diu, Abramu partì cù a moglia, Sara, à stabilissi in u paese di Canaan. Quandu, in quellu paese ci fù a fame, scese in Egittu. Dopu andò in e pianure di Mamre.
Allora, Diu disse à Abramu, chì avia 99 anni, è ùn avia figlioli da Sara: "Ti feraghju multiplicà; nazioni è rè esceranu da tè; u mio pattu hè chì ogni maschju sia circuncisu".
Quandu Abramu ebbe centu anni, Sara, chì ne avaia 90, parturì di un figliolu è u chjamò Isaccu.
Un ghjornu, Diu disse à Abramu, per mettelu à a prova: "Tomba u to figliolu". Abramu era ubbidiente ma un anghjulu, mandatu da Diu, impedì chì Isaccu fussi sacrificatu.
Di una di e so moglie, chjamata Rebecca, Isaccu ebbe dui figlioli, Esau è Iacobbu.
Quandu Esau vendì à Iacobbu a so primagenitura per un pezzu di pane è un piattu di minestra di lentichje, Iacobbu diventò u patriarca ebreu à a testa di e dodeci tribù d'ìsraele.
Santu Petru Canisiu.
Petru Canisiu era un teologu ghjesuitu natu in a cità olandese di Nimega in u 1521, mortu à u cullegiu di Friburgu, in Sguizzera, u 21 dicembre 1597.
U babbu, podestà di Nimega, l'avia mandatu in Cologna à studià u Dirittu. Custì, à 22 anni, entrò in a Cumpagnia di Ghjesù, a Cungregazione di Santu Gnaziu appruvata da u papa trè anni nanzu.
Petru hà passatu a so vita à cumbatte u prutestantisimu in i paesi di lingua germanica. Hè statu in Ingolstadt, Vienna, Praga, Augsburgu, Dillinghen, nanzu di stabilissi in Friburgu. Hà creatu scole, cullegi, seminarii, stimatu da i papa è da i principi.
Dicenu chì ghjè grazia à ellu chì a Baviera è l'Austria anu cunservatu una pupulazione à maggiurità catolica.
Un'opera impurtante di Petru Canisiu, hè u so Catechisimu. Hè statu stampatu 400 volte è traduttu in tutte e lingue.
In e so pulemiche cù i prutestanti, hè statu sempre currettu, for di cù Luteru ch'ellu trattava di "varru imburitu".
Hè mortu à 76 anni, dopu à 6 anni di infirmità.
Etimolugia, casate è nomi: Cf u 29 ghjugnu
Santa Saveria.
Saveria si chjamava Francesca Saveria Cabrini. Era nata vicinu à Milanu in u 1850. I genitori eranu agricultori chì avianu di chè campà. I figlioli eranu numerosi. Ella era a tredecesima.
Da chjuca, parlava digià di fassi sora è di parte in missione in China, ma era malaticciosa è nisuna cungregazione a volse accettà. Allora decise di creà a soia di cungregazione: quella di e Missiunarie di u Sacru Core. Sei cumpagne avianu accettatu di fanne parte. Tandu, Francesca Saveria avia 30 anni.
Ottu anni dopu, avia fattu e so prove è a cungregazione principiava à ingrussassi. U papa fece chjamà à sora Cabrini è li disse: "Un' anderete micca à levante ma à ponente". E' a manda in i Stati Uniti d'America duv'ellu ci era cintinare di mila di migranti taliani, pè u più abbandunati, disprezzati, è in a miseria.
Per elli, sora Cabrini apre scole, fonda uspidali, crea opere caritatose. Face u passa è veni da a Merica suprana à a suttana. Più di 150 istituzioni nascenu à i Stati Uniti, u Bresil, l'Argentina, è altri paesi. Saveria avia u geniu di l'urganizazione è una fede soda.
Hè morta à 67 anni, u 22 dicembre 1917. A salma hè cunservata in New York, in u 196èsimu carrughju.
Etimolugia: da u spagnolu "Javier" (nome di locu).
Casate: Savieri, Saviery.
Nomi: Javier, Saveria, Saverio, Saveriu, Saviera, Saviero, Savy, Ver, Vere, Veria, Verlein, Xablier, Xari, Xaveer, Xaver, Xaveria, Xaverius, Xaverl, Xavier, Xavière, Xever, Xidi.
Santa Vittoria.
Vittoria serebbi stata marturiata à u seculu terzu in Tribunlano, tramezu à Roma è à Rieti.
A legenda conta chì duie zitelle cristiane, prumesse à dui signori, ricusonu di sacrificà a so virginità. Vittoria averebbi ancu accettatu, ma a cumpagna ùn volse sente nunda, dicendu chì Diu preferia e figlie à e spose.
- E' cumu a sai? dumandò Vittoria.
- A sò chì a m'hà detta u mio anghjulu custode. Preghemu è viderai.
E' si messenu à pregà. E' l'anghjulu ghjunse è disse:
- U matrimoniu hè bè, ma a virginità hè megliu. U matrimoniu hè d'argentu, a virginità hè d'oru.
Etimolugia: da u lat. "victor" (vincidore). u Nome "Vittoria" hà un valore misticu, vole dì "Vittoria di Ghjesù Cristu", ma, in Francia è in Alemagna, hè statu messu à a moda per ragioni pulitiche. In Italia hè datu in l'onore di a Madonna di a Vittoria, festa istituita in u 1620 per celebrà a vittoria di l'armate cristiane contru à i Turchi, accantu à Praga. In Inghilterra, u nome serve pocu, malgradu ch'ellu sia statu quellu di una regina celebre, morta in u 1901.
Casate è nomi: Cf u 21 lugliu.
Santu Delfinu.
Delfinu l'avianu fattu vescu di Burdigala, l'attuale cità di Bordeaux, versu l'annu 380.
Si sà ch'ellu hà statu à u cunciliu di Saragossa, ch'ellu era l'amicu di Santu Ambrosgiu è si cunserva d'ellu qualchì lettera. Eranu indirizzate à San Paulinu di Nole ch'ellu avia battizatu.
Hè mortu in 402 o 403.
Etimolugia: da u gr. "Delphis" (delfinu).
Casate: Delfini.
Nomi: Dauphin, Dauphine, Delfina, Delfine, Delfinu, Delphin, Delphina, Delphine, Delphy.
Nanzu, u 24 dicembre, a memoria di u Beatu Francescu di i Malefici, di i Frati Minori, era celebrata in Corsica è sopratuttu in Galeria duv'ellu serebbi statu, è in Calinzana duv'ellu serebbi statu sepoltu versu l'annu 1290.
Natale.
Si festighjeghja a nascita di Ghjesù.
Sì Pasqua hè una festa istituita da i Ghjudei è adattata a à nova religione, Natale hè a più anziana di e feste sputicamente cristiane. Hè stata decisa da a Chjesa latina à u seculu quartu. A prima data sicura hè quella di 336. Pè a Chjesa d'Oriente, a festa di u 25 dicembre hè stata intrudutta in Antiocca versu l'annu 375 è in Alessandria versu l'annu 430. A Chjesa greca celebrava a nascita di Ghjesù à l'Epifania, u 6 ghjennaghju. Quandu e duie feste sò state ritenute da a liturgia, quella di u 6 ghjennaghju hè stata riservata à a cumemurazione di l'adurazione di i rè Maggi. A' u seculu sestu, anu permessu à i preti di dì trè messe, una à mezanotte, una à l'alba, è una à l'ora abituale dopu à u cantu di Terza.
U Natale, "le Noël" in francese, "Christmas", o festa di u Cristu, in inglese, "Veihnacht", o notte sacra, in alemanu, hè sempre stata una festa di gioia cù una massa di manifestazioni pupulare. Ghjè San Francescu d'Assisi chì, u primu, hà fattu un presepiu in chjesa per riprisentà u misteru di a Natività.
Altri usi sò assai più anziani è di urigine pagana per via chì Natale currisponde cù u principiu di l'invernu festighjatu in tutte e religioni antiche. L'ufferta di u viscu vene da i Galli, a decurazione di u ghjalicu vene da i Germani. In Corsica, l'incantesimi trasmessi a notte di Natale, venenu da nanzu à u Cristianisimu, ancu sì i preti ci anu intruduttu l'invucazione à Ghjesù è à Maria.
"Ancu l'usu di u focu natalecciu hè d'urigine pagana. Qualchì pochi ghjorni nanzu à Natale, i zitelli andavanu à ricoglie legne secche o à taglià gamboni verdi. A vigilia, i più chjuchi facianu l'ultima cerca pè e case: li davanu una legna di a pruvista per l'invernu, un carculellu d'accendime, una bracciata di pali à fasgioli diventati troppu corti, o un cantellacciu. I più grandi ammuntichjavanu issu legname è, à l'annuttà, ci mettianu focu. U picciafocu affaccava à a corsa da a casa a più vicina cù una scheza di deda infiarata. In u sciappittime furibondu, e fiare leccavanu i gamboni verdi, fendu cullà in u celu bughjosu nuli di calisgine. E' i zitelli stridavanu: "e sdreie! e sdreie!".
Etimolugia: I primi tempi di u Cristianisimu, u latinu "dies natalis", chì vole dì "ghjornu di a nascita", era interpretatu pè i martiri è i santi cum'è "ghjornu di a nascita à a vita eterna". Si trattava dunque di u ghjornu di a morte. Più tardi, a parulla Natale hè stata data cum'è nome à i zitelli nati u ghjornu di Natale, o per ricurdà a nascita di Ghjesù. In u 1981, in Corsica, venia à u 18èsimu rangu di i nomi maschili. Era quellu di 9 omi nantu à 1000.
Casate: Natali, Natalini, Natalucci, Nataloni, Nadini.
Nomi: Nacha, Nat, Natacha, Natala, Natale, Natalène, Natalia, Natalicio, Natalie, Natalina, Nataline, Natalinu, Natalio, Natalis, Natascha, Nathalia, Nathalie, Natoulia, Nattie, Nelig, Nettie, Netty, Noël, Noéla, Noéla, Noèle, Noélie, Noëlla, Noëlle, Nouel, Nouela, Novela, Novella, Nowell, Tacha, Tali, Talie, Velia.
Santu Stefanu.
Stefanu hè unu di i primi sette diacuni stabiliti in Ghjerusalemme da l'Apostuli. Hè u primu di i Cristiani à more pè a so fede. Hè statu tombu l'annu 36, forse nanzu.
Ciò ch'ellu si sà di ellu hè scrittu in l'Atti di l'Apostuli.
Simu à i primi tempi di a ruttura trà u Ghjudaisimu è u Cristianisimu. I dodeci Apostuli, avendu adunitu a multitutine di i discepuli, dissenu:
- "Un' hè cunvenevule chì noi, lasciata a parulla di Diu, ci occupimu di serve à tavula. Truvate frà voi sette omi di buna riputazione è sapienza per fà issu travagliu. E' noi cuntinuveremu in l'orazione è u ministeru di a parulla".
Issu ragiunamentu hà piaciutu à a multitutine, è anu elettu à Stefanu, omu pienu di fede è di Spiritu santu, è sei altri.
Stefanu cunvertia assai ghjente, ciò chì ùn piacia micca à tutti. Parechji di a Sinagoga, ùn pudendu resiste cù a parulla à a sapienza è à u spiritu di Stefanu, fecenu di manera ch'ellu sia mandatu davanti à i ghjudici di u tribunale di i Ghjudei, dicendu chì l'avianu intesu bestemmià contru à Mosè è contru à Diu.
Falzi testimoni assicuronu chì l'omu tenia certi ragiunamenti contru à u Tempiu è contru à a Legge, è dicia chì Ghjesù u Nazareu strughjerà u Tempiu è muterà e regule stabilite da Mosè.
Davanti à i ghjudici, Stefanu fece un discorsu per pruvà chì Ghjesù era u Messia annunziatu da i Prufeti è chì l'adurazione di Diu si devia fà in tutta a Terra, è micca solu in u Tempiu.
Issu discorsu ùn piacì. Stefanu fù purtatu for di cità è tombu à petrate.
Etimolugia: da u gr. "stephanos" (curona).
Casate: Stefanacci, Stefanaggi, Stefani, Stefanini, Stephani, Stephanopoli.
Nomi: Esteban, Esteffe, Estevan, Estève, Estienne, Etienne, Etiennette, Staffan, Staines, Stè, Steaphan, Steeje, Stefa, Stefaans, Stefan, Stefani, Stefanina, Stefano, Stefanu, Stefell, Steffert, Steffie, Stepan, Stepanida, Stepha, Stephan, Stephana, Stéphane, Stephania, Stephanie, Stephanson, Stephanus, Stephen, Stevana, Steve, Steven, Stevena, Stevenje, Stevenson, Stevie, Stiobban.
Paesi è cità: Biella, Prato, Rovigo, Capua. In Corsica: Conca, Cardu, Aiti, a Nuvale d'Alisgiani.
Prutezzione: Stefanu hè u santu patrone di l'impetratori.
Santu Ghjuvanni l'Evangelistu.
Ghjuvanni hè u fratellu di Ghjacumu u Maiore. Eranu piscadori in Galilea.
In tutte e grande occasioni di a vita di Ghjesù, Ghjuvanni hè prisente: era prisente u ghjornu di a Trasfigurazione; era cù Ghjesù quand'ellu agunizava in Ghjetsemani; era à u pede di a croce è Ghjesù li affidò a mamma; hè statu u primu à ghjunghje à u sepolcru quandu Maddalena u truvò viotu; fù dinù u primu à ricunnosce à Ghjesù risuscitatu.
Ghjuvanni serebbi l'autore di u Vangellu chì porta u so nome. Ritiratu in l'isula greca di Patmos, hà scrittu l'Apocalisse. Hè mortu assai vechju in Effese, cità turca, versu l'annu 104. L'ultimi tempi, ùn sapia più chè ripete: "O i mio zitellucci, tenitevi caru!".
I scritti di San Ghjuvanni anu permessu parechje eresie. Si sà chì i Cattari avianu cum'è primu libru u so Vangellu. Ci sò chì anu pretesu chì i Giovannali di Carbini devianu u so nome à San Ghjuvanni.
Etimolugia: da l'Ebreu "Yohanân" (Iavè hà aggraziatu).
Casate: De Giovanni, Gianetti, Giannetti, Gianni, Giannini, Giannoli, Giannotti, Giovannai, Giovannali, Giovannangeli, Giovannelli, Giovannetti, Giovanni, Giovanninelli, Giovannini, Giovannoli, Giovannoni, Giovanonni, Giovansili, Nanni, Nannini, Sangiovanni, Vanni, Vanucci, Zanni, Zannini.
Nomi: Chann, Eoin, Evan, Ghjuvanna, Ghjuvanni, Ghjuvannina, Ghjuvanninu, Gian, Gianina, Gianna, Gianninu, Gion, Giovanna, Giovanni, Hampe, Hampus, Hanko, Hannele, Hannes, Hans, Hänsel, Hanselo, Hansi, Hansko, Haske, Henne, Henneke, Henschel, Iaian, Ian, Iban, Ivan, Ivanka, Ivanne, Ivassik, Jack, Jaine, Jane, Janet, Janetta, Janey, Janina, Janine, Janis, Janka, Janna, Janneken, Jannice, Jannine, Janning, Jànos, Jantinus, Janyce, Jayne, Jean, Jeanette, Jeanie, Jeanine, Jeanna, Jeanne, Jeannette, Jeannie, Jehan, Jehanne, Jeng, Jengen, Jennegien, Jenneke, Jenny, Jens, Jent, Jevon, Joan, Joaninha, Joann, Joanne, Joâo, Jock, Joen, Joes, Johan, Johann, Johanna, Johanne, Johannes, John, Johnie, Johny, Jon, Jonet, Jonn, Jöns, Joop, Jovanka, Juan, Juana, Juanita, Juhans, Nanette, Nannetta, Netta, Nettchen, Nettg, Nettie, Nino, Nita, Schang, Schani, Seain, Sean, Seonag, Seonaid, Shane, Sheena, Sheenagh, Sheona, Shiona, Sine, Sinead, Sjang, Sjo, Vanina, Vannina, Wanne, Wantje, Yann, Yanni, Yannick, Yoann, Yvan, Zaneta.- In u 1981, in Corsica, Ghjuvanni era à u primu rangu di i nomi maschili. Solu o accuppiatu à un altru, era quellu di 164 omi nantu à 1000.
Paesi è cità: Pesaro, Mecklemburgu, Besançon, Clèves, Langre, Lione. In Corsica: Santu Petru di Tenda, Ventiseri, San Ghjuvanni di Moriani.
I Santissimi Nucenti.
U Vangellu secondu San Matteu conta chì, quandu i maggi annunzionu a nascita, in Bettelemme, di un futuru rè di i Ghjudei, u rè Erode fece massacrà in a cità è cuntorni, tutti i ciucci di menu di dui anni.
Ghjesù a si francò grazia à un anghjulu di u Signore chì ghjera apparsu in sognu à Ghjiseppu dicenduli:
- Alzati! piglia a criatura è a mamma, è fughji in Egittu, è stacci fin chì ùn t'averti di vultà.
E' Ghjiseppu, Maria è Ghjesù, stetenu in Egittu sinu à a morte di Erode.
A' u seculu quintu, a Chjesa cristiana hè messu i Santissimi Nucenti in testa di i martiri. Reliquie ci ne fù per tuttu u mondu.
A quistione si hè posta di sapè quantu criature sò state massacrate. I Grechi, è u ghjesuitu Salmerone in u 1612, dicianu 14.000; i Siriacchi: 64.000; u martirulogu di Aghenova: 144.000. Oghje, a Chjesa stima chì ci ne hè statu una vintina.
Casate: Innocenti, Innocenzi
Santu Davide. Santu Tumasgiu Becket.
Davide hè mortu in Ghjerusalemme 973 anni nanzu à Cristu. Avia 70 anni.
L'Anzianu Testamentu conta ch'ellu era un giovanu pastore capirossu, puetu è musicante, sceltu da Diu per esse rè d'Israele.
In Ghjerusalemme, fatta capitale, hà preparatu u regnu di u figliolu, Salomone. Dicenu ch'ellu hà cumpostu i famosi Salmi, base di e prighere ghjudeie è cristiane. Maria, a mamma di Ghjesù, serebbi stata di a razza di Davide.
Etimolugia: da l'ebreu "daoud" (tenutu caru... da Diu).
Nomi: Dafydd, Daibidh, Dave, David, Davida, Davidde, Davide, Davidka, Davidou, Davie, Davina, Daviot, Davit, Davy, Daw, Dawie, Taffy, Vida, Vidli.
Tumasgiu Becket, natu in Londra in u 1118, hè mortu in Canterbury in u 1170.
Quandu, à 36 anni, diventò u cancelieru di Arrigu Secondu, rè d'Inghilterra, Becket era un bel omu, grande, assai imbiziosu. Li piacia u lussu è ghjera grande amatore di caccia. Durante sette anni, fù un ministru aggalabatu è fidu.
Tandu, u rè era in bischizzu cù u papa per via di l'immunità ecclesiastiche. Persuasu di e qualità diplumatiche di Tumasgiu, u fece arcivescu di Canterbury, dunque patrone di a Chjesa anglicana. Dui anni dopu, invece di serve u so rè, Tumasgiu si dichjarava in favore di a Chjesa di Roma. Temendu una cundanna à morte, si vestì da frate è si rifugiò in Francia duv'ellu stete sei anni.
In u 1170, allora chì Arrigu era in traccia di fà a pace cù u papa, ebbe u permessu di rientre in Inghilterra è di ripiglià a so carica di arcivescu. Cum'è sì nunda fussi cambiatu, fece l'errore di scumunicà i veschi chì sei anni nanzu si eranu dichjarati in favore di u rè.
Avendu intesu u rè chì dicia, senza pensà à male: "Ma quale hè chì mi sbarazzerà di issu insulente!", quattru cavalieri vanu à truvà à Tumasgiu in u so palazzu di Canterbury, è li dumandanu di rinuncià à a scumunica. Cum'ellu ricusa, u si striscinanu in una cappella laterale è u tombanu à sciabulate.
Etimolugia, casate è nomi: Cf Tumasgiu l'Apostulu (3 lugliu).
Paesi è cità: Londra, Canterbury, Parigi, Lione, Sens.
Santu Ruggeru.
Ruggeru serebbi statu un santu vescu di Canosa, in e Puglie taliane, pruvincia di Bari.
Contanu chì, l'annu 1276, l'abitanti di Barletta, spruvisti di reliquie, sò andate à arrubà quelle di a cattedrale di Canosa. Un' si sò micca cuntentati di purtassi u cascione di e reliquie chì ghjera daretu à l'altare maggiore, si anu pigliatu dinù a salma di Ruggeru, mortu da pocu - almenu cusì pensavanu -, una ciccona, u tronu in marmaru di u vescu è unipochi di vasetti sacri.
U papa Nucenziu Quintu l'ublicò à rende tuttu ciò ch'elli avianu pigliatu for di, cù l'accunsentu di u vescu di Canosa, u cadaveru di Ruggeru. Ci hè da crede chì, in Canosa, ùn eranu micca cunvinti di a so santità .
Sia cum'ella sia, oghje Ruggeru hè nantu à u catalogu di i santi chì dice ch'ellu hè mortu versu l'annu 496 è micca à u seculu XIII cum'ella dice a legenda.
In Barletta, u preganu dicendu: "Diu omniputente è eternu, voi chì avite fattu vene u beatu Ruggeru da Canosa à Barletta, accurdateci, per piacè, per mezu di i so meriti è virtù, di esse, pè u sempre, franchi d'ogni male. Amen".
Etimolugia: da u germanicu "hrod" (gloria) è "gari" (lancia).
Casate: Ruggeri, Ruggieri.
Nomi: Dodge, Riehle, Roar, Rodge, Rodger, Rog, Rogelic, Rogelio, Roger, Rogeric, Rogerio, Rogge, Roggie, Rogier, Röle, Rosser, Rotkar, Rüdeger, Rüdiger, Ruggero, Ruggeru, Ruggiero, Ruggieru, Rutger, Rutje, Rüttger.- U nome Ruggeru (Rüdiger) servia assai in i paesi germanichi. Si hè spartu in Italia à l'epica di i principi nurmani : Ruggeru, duca di e Puglie, Ruggeru Primu, conte di Sicilia, Ruggeru Secondu, rè di Sicilia.
Paesi è cità: Barletta.
Litteratura: u nome Ruggeru hè statu pupularizatu da l'Ariosto quand'ellu hà scrittu l'"Orlando furioso" duve u paganu Ruggeru si cunverte à u Cristianisimu è sposa à Bradimante, surella di Rinaldu.
Santu Silivestru.
Silivestru, fattu papa u 31 ghjennaghju di l'annu 314, hè mortu u 31 dicembre 335.
U so puntificatu, chì durò quasi 22 anni, hè viotu di ogni realizazione, ma a colpa ùn hè soia. Si trova ch'ellu hè statu papa quandu Custantinone era imperatore. In 313, nanzu chì SIlivestru sia elettu, Custantinu avia permessu a religione cristiana in tuttu l'imperu rumanu è, vista issa generosità, intendia à esse u solu à guvernà a Chjesa.
Sì San Silivestru hè quantunque un santu assai pupulare, hè per via chì a festa casca l'ultimu ghjornu di l'annu.
Etimolugia: da u lat. "silva" (furesta, valdu).
Casate: Silvestri, Silvestrini, Silvestroni, Silvani, Selvini, Silvini Silvagnoli, Silvarelli.
Nomi: Fester, Jelvestr, Sailbheastar, Sila, Silane, Silas, Silivestru, Silouan, Silva, Silvana, Silvane, Silvano, Silvanu, Silvère, Silverio, Silvester, Silvestre, Silvestro, Silvestru, Silvia, Silviane, Silvin, Silvina, Silvino, Silvio, Silvius, Sylvain, Sylvaine, Sylvaine, Sylvan, Sylve, Sylvère, Sylvester, Sylvette, Sylvie, Sylvin, Sylvius, Vester.
Paesi è cità: Cinturi, i Perelli d'Alisgiani. A' u Medievu, Silivestru avia, in Corsica, una decina di chjese.