05-1789 Muria Natale Saliceti, d'Oletta, prufessore d'anatumia è primu medicu di u papa Piu Sestu.
05-1791 I deputati Cristofanu Saliceti è Carlu Andria Pozzu di Borgu signavanu un cuntrattu cù a cumpagnia marsegliese di u curallu, chì pretendia avè u monopoliu in u Mediterraniu, per dà u dirittu di pesca à Aiacciu mediante una tassa in curallu per ogni gondula. Issu cuntrattu fù pocu rispettatu da i Corsi.
05-1828 U puetu bastiacciu Salvadore Viale partia per Parigi per circà di buscassi un postu di Cunsiglieru à a Corte di Ghjustizia di Bastia. Per istrada si cansava à Macôn ind'è Lamartine.
05-1874 Era accesu pè a prima volta u fanale di a punta di e Becche.
05-1883 Muria Bonaventura Colonna di i Leca, un Corsu di Vicu, chì avia datu u Dahomèi à a Francia.
05-1894 Manuellu Arene, u più forte puliticante corsu di l'epica, si fidanzava cù a bastiaccia Laura Orenga.
05-1898 Elezzione legislative. Luziu Casabianca è i fratelli Gavini (Antone è Bastianu) sò battuti da Mariu Giacobbi, u culunnellu Astima è Santu Malaspina. Arene, in Aiacciu, batte à Rouher.
05-1902 Santu Casanova scrivia nant'à l'erruzzione vulcanica di a Martinica.
05-1906 Elezzione legislative : nant'à i cinque eletti di l'isula, quattru sò republicani è unu hè di a Chjesa.
05-1906 U canonicu aiaccinu Jean-Baptiste Desanti hè numatu vescu.
05-1913 À a fine di maghju, sbarcava, in Corsica, u pittore Maurice Utrillo.
05-1915 Carlu Pieri, di i Prunelli di Fiumorbu era tombu in guerra. Era esciutu da Saint-Cyr cù u numeru 2, in a prumuzione di De Gaulle è u maresciale Juin.
05-1926 A rivista " Mercure de France " principiava a publicazione di u rumanzu di René de Weck : " Le roi Théodore ". A seguita hè stata publicata di ghjugnu.
05-1926 Escia u primu numeru di " U Lariciu ", rivista trimestriale di litteratura è arti regiunalisti corsi.
05-1927 Jean Chiappe era fattu prefettu di pulizza di Parigi. Cunserverà l'impiegu durante 7 anni.
05-1938 U psicanalistu ghjudeu Sigmund Freud ebbe à fughje da l'Austria, per via di l'occupazione allemana. A so discepula è amica Maria Bonaparte averebbi vulsutu purtassilu in Corsica, ma u prufessore, chì avia 82 anni, preferì andassine in Inghilterra duv'ell'hè mortu l'annu dopu.
05-1938 Durante una vendita à l'asta, l'anellu di u banditu André Spada hè vendutu 320 franchi.
05-1943 Turpigliera di u "Général-Bonaparte" (137 morti è 147 vivi).
05-1945 In Aiacciu, u tribunale di guerra francese prununzieghja cundanne contr'à u tribunale di guerra talianu è altri criminali di guerra fascisti.
05-1947 A statua di N.D. du Grand Retour ghjunghjia in Corsica. Si tratta d'una di e quattru copie di a Madonna di Boulogne-sur-Mer chì sò state spassighjate in tutta a Francia da u 1943 à u 1948. A statua di Boulogne-sur-Mer, indì u Pas-de Calais, a vera, dicenu ch'ell'hè ghjunta in issu locu, nant'una barca, senza rame nè marinari. E quattru copie, fatte per ringrazià a Madonna di u ritornu di i prigiuneri di guerra, anu visitatu 16 000 parochje, fendu 120.000km. Nisuna manifestazione religiosa hà mai cuncoltu tanta ghjente. In u 1946, à u vechju campu di pallò di Colombes, ci era 100 000 persone.
05-1959 Escia u primu numeru di a rivista regiunalista Monte Cintu.
05-1966 Lisandru Sanguinetti era fattu ministru di l'Anziani Cumbattenti.
05-68 A Corsica hè senza linee marittime è aeree durante trè settimane.
05-1970 "Les Cahiers de l'Histoire" numeru 91, stampavanu "La Corse des origines à nos jours" di Louis Comby.
05-1972 L'usina taliana di Scarlino ottenia u permessu di ghjittà i so residui in mare Tirenu, malgradu chì u laboratoriu d'Idrobiolugia di Roma è u ministeru di a Salute si sianu dichjarati contru.
05-1975 Escia u libru di Gauthier è Alessandri " Esquisse géologique de la Corse ".
05-1976 Escia u racontu di Pasquale Marchetti " Santu di Corsica ", indì a cullezzione " Les Albums du Père Castor " di l'editore Flammarion.
05-1983 Era stampata in Milanu, una guida di Corsica segnata Tullio Bagnati è Albano Marcarini laureati in urbanistica.
05-1988 Era finitu di stampà u libru di Petru Dumenicu Sammarcelli " La langue et la cheminée ".
05-1989 Escia u libru di Lisandrina Grimaldi : " U stringagliulu di Sigolu ".
05-1989 Escia u libru di puesie di Petru Vachet-Natali : " Sfiacculate ".
05-1990 Escia u libru di Ange-Laurent Bindi : " Le naufrage de l'autonomie corse, 1982-1987 ".
Dans le cadre de l'émission Anniversarii :du lundi au samedi à 12h02 et 16h02; le dimanche à 17h02.