Dapoi l’anni cinquanta,
una squadra d’archeologhi, giovana
è dinamica, hà pruvatu à ricaccià i secreti da a terra corsa. Trent’anni
di sforzi ci permettenu oghje di ricustituì cun esatezza e tappe di u sviluppu di e sucietà prestoriche corse dapoi l’urigini sin’à a ghjunta di i cunquistadori rumani. Pudemu dinù entre in u core di a vita oghjinca di l’allevadori è agricultori stallati nant’à u situ eccezziunale di
Filitosa.
SCUPERTA DI FILITOSA
E ricerche
fatte in u 1839 da Prosper Mérimée, Ispettore di i monumenti storichi, palisonu à tutti chì l’isula avia testimunianze
materiali di una cultura bella anziana. In u 1946, u pruprietariu di u situ, Carlu Antone
Cesari, scuprì pè a prima
volta parechje statuestantare
stese à u pede di a culletta di Filitosa. Truvò dinù, nant’à u spronu, vistiche di custruzzione assai anziane. U sgiò Lamotte, capiarchivistu
di a Corsica, custattò l’impurtanza
di a scuperta. Infine,
Roger Grojean, archeologu
di u Centru Naziunale di a Ricerca
Scientifica (C.N.R.S.), in missione in Corsica, messe in opera
u scavu di Filitosa cù l’accunsentu è l’aiutu permanente
di Carlu Antone Cesari. Dapoi
tandu, a famiglia Cesari assicureghja a cunservazione è l’intrattenimentu di u situ.
PUNTI CRONOLOGICHI
6 000 nanz’à
Ghjesù Cristu (neoliticu anzianu) : qualchì famiglia si stalla sott’à agrotti
in scogliu. I decori ceramichi (chjoppule di cardium) sò listessi chè
quelli di l’altri siti corsi.
4500 nanz’à
Ghjesù Cristu (neoliticu mezanu) : populamentu debule.
3 300 nanz’à
Ghjesù Cristu (neoliticu recente) : u spronu hè occupatu
da pastori è cultivatori. Parechje macine mobili truvate nant’à u situ accertanu u travagliu agriculu. Rializazione di e prime stantare
chì sò petronculi travagliati male è micca lustrati.
1800 nanz’à Ghjesù Cristu (Età di u bronzu) : si pò percepì un’evuluzione
di u travagliu di e stantare :
stantara roza, stantara regularizata, stantara antropomorfa, statuastantara. Apugeu di l’arte statuariu è di e credenze megalitiche in Filitosa.
U spronu hè furtificatu è a pupulazione si stalla in e capanne in petra.
Seconda metà di u IIu millenariu :
custruzzione di trè insemi monumentali, frà questi dui avendu una finalità culturale. E
statuestantare sò sciappate è impiegate torna in a so custruzzione. Filitosa, aduprendu e credenze nove, ferma un centru religiosu maiò.
700 nanz’à Ghjesù Cristu (Età di u ferru) : u situ hè sempre occupatu.
111 nanz’à Ghjesù Cristu (occupazione rumana) : ogni tantu, a ghjente
campa in u spronu è e case sò
custruite ingiru à u situ.
FILITOSA È A SO EPUCA
U
primu impiantu di l’omu in Corsica hè di u VIIu
millenariu nanz’à Ghjesù Cristu. A vicinanza di a piaghja fruttifera di u Taravu, a presenza di una culletta chì si pò accuncià faciule è parechji agrotti sott’à scogliu ghjustificheranu l’occupazione di
u situ di Filitosa, da u VIu à u Iu millenariu nanz’à a nostra epuca. U gruppu di Filitosa campa
solu di caccia, di pesca è di cugliera. Adopra arnesi in legnu o in scogliu duru cum’è
a scaglia o l’ossidiana. À
u neoliticu recente, (IVu millenariu), ci hè una crescita
di a pupulazione isulana per via di a sparghjera di e pratiche agricule, cusì 3000 persone campanu in l’isula (estimu di l’archeologhi)
à u VIu millenariu.
À
parte da u IIIu millenariu,
l’europei anu custruitu monumenti fatti cù petronculi.
Cusì, u megalitismu (da u grecu megas : grande è
lithos : petra) s’impone
in Europa. In Corsica, ci sò 73 megaliti
zuccati, siasi 40 % di tutte e statuestantare francesi, lucalizati, cù e stantare, pè u più in a valle bassa di u Taravu, cù u spronu
di Filitosa, mentre chì a Sardegna
ne hà solu dui. In più, avemu parechje stantare (500 trove per avà). Eppuru, sò
belle scarse in a conca Mediterrania. I scarpellini, i scultori megalitichi anu fattu di Filitosa u più
grande centru di l’arte statuariu corsu è mediterraniu. A
significazione di e stantare
è statuestantare hè scunnisciuta per avà. Forse chì e statuestantare riprisentinu i « Paladini »
(capiguerrieri, religiosi, civili vivi o morti).
In cunsequenza, u gruppu mantene a forza, l’intelligenza di u mortu immurtalizendulu in a petra. A più bella
spressione di l’arte prestoricu corsu hè sicuramente l’arte statuariu.
A SOPRAVIVENZA ALIMENTARE
Ghjera u primu penseru.
À u Iu millenariu, e tecniche agricule sò ammaestrate dapoi una bella stonda da i Mediterranii. In a valle di u Taravu, i terreni di percorsu ùn mancanu è quandu a machja era troppu
zeppa, era brusgiata in certi lochi. Cusì, e bestie avianu novi
pasculi l’annu dopu. Infine, i campi à u pede di u poghju eranu suminati
di granu. Porci, muntoni è boi eranu
animali d’allevu. I campi à u pede di u poghju eranu suminati
di granu.
U TRAVAGLIU DI A TERRA ROSSA
Pruduce ùn basta, ci vole à cunservà ste biade, cocele,
servele. L’età di u Bronzu ci prupone una bella varietà di forme ceramiche : giarre, urne, cuppette, bitucci, pignatte, piatti. E decine di millaie di chjappuli racolti durante i scavi mostranu chì a pruduzzione era diviziosa per via di a fragilità di u terrame.
VESTESI
Hè difficiule di prupone
ricustituzioni fide di vestiti purtati 3 000 anni fà da l’abitanti
di Filitosa. U piattavergogna in coghju
hè adupratu assai cum’è certi detaglii
di e statuestantare di u pianottulu
di Cauria l’accertanu.
Durante l’invernu, omu preferiscerà un vestitu di lana assai roza. Serà forse l’antenatu
di u pilone, mantellu di i pastori corsi.
INGIRU À U FUCONE
U ripastu
in ogni civilizazione hè un attu essenziale.
In e nostre
sucietà, u gruppu s’addunisce ingiru à u tavulinu. In Filitosa, posa ingiru
à u fucone induve brusgia sempre un focu. U fucone hè un elementu primurosu di a vita di u gruppu chì manghja è travaglia ingiru à ellu. Durante l’età di u Bronzu, ghjè un spaziu custruitu in terra rossa cotta è cintu di petre. Stu tippu di fucone
hè statu adupratu durante seculi è seculi postu chì omu u trova in certi stazzi di u principiu di u vintesimu seculu !
L’OMU FABRICHEGHJA I SO ARNESI
L’età
di u Bronzu hè una perioda di scaghjatura di u bronzu, mischju di ramu è di stagnu. Eppuru, ghjè durante
l’età du Ferru (à parte da
700 nanz’à Ghjesù Cristu) ch’è no truveremu assai pezze in bronzu. À a prestoria, ci vole à aspettà parechji seculi trà a nascita
di una nuvità tecnica è u so adopru in a vita oghjinca. L’omu di a protostoria (Età di i Metalli) si ghjova d’altri materiali chè u bronzu. Per esempiu,
u legnu pè l’asta di e lance, u manicu di e piole... À a fine di l’età di u Bronzu, avemu sicuramente
una specializazione di i travaglii.
L’OMU, L’ARTE È A MORTE
L’interru
in Corsica si face in a stazzona (dolmen) o in a fossa. A persona ghjace nant’à un lettu di teghje. Eppo, u mortu hè cupertu
di petre. Un rituale funerariu
(di regula un ripastu) accumpagna l’interru. L’archeologhi trovanu, vicin’à e tombe, resti di fuconi cuncogliendu osse d’animali. Spessu, a tomba hè aduprata pè un altru interru. A stazzona hè una camera funeraria fatta cù i pilastri è una teghja pè a tittera.
A custruzzione di bancali megaliti hè più anziana (IIIu millenariu). Sti bancali sò interrati
ma a stazzona hè custruita fora. Una trentina di stazzone è di bancali sò state cuntate. Secondu u prufessore
Grosjean, i capinemichi tombi durante a battaglia sò riprisentati
dinù da e statuestantare.
STE TORRE MISTERIOSE
Filitosa cuncoglie duie torre, à u centru è à u punente, cumpletate à l’este da una zona di surveglianza
di l’entrata principale. Un’accinta
ciclupeana ghjova à difende u situ. Cusì, st’insemi di case ragruppati è furtificati sò chjamati castelli. E torre ùn anu micca
una finalità militare perchè e so aperture sò solu l’entrate.
Dunque, omu ùn pò difendesi cù
un campu di visione strettu. L’urganizazione interna
di sti monumenti, cù l’assenza di finestre, face pensà à un locu di riti funerari
o d’iniziazione. E cendere accertanu chì fochi rituali eranu incesi
ma ùn si sà perchè. In Sardegna, e torre, chjamate nuraghi, sò l’elementu centrale di un sistemu furtificatu inquadrendu un’unità di case è sò più grandi chè e torre corse. Infine, a torra ùn hè micca solu
un agrottu è un locu di cultu ma ghjova forse à allucà a manghjusca è u materiale di i guerrieri in tempu di pace.
A GUERRA
L’avertimenti di u
« Paladinu » ùn sò micca
stati intesi è a tribù di Cucuruzzu (Livia) o di Castellucciu (nant’à a sponda diritta di u Taravu) anu assaltatu à Filitosa perchè, dapoi parechje
lune, i pastori di Filitosa cunducianu
e so bande nant’à i pasculi di e tribù vicine, senza stà
à sente e minacce di l’imbasciadori
di l’altri castelli. Eppuru, l’archeolugia ùn hà cunfirmatu sta
tesi ma omu ci pò crede postu
chì a densità maiò di i castelli di u sudu di l’isula face chì i so territorii sò à toccatocca, è, dunque, u risicu di cunflittu cresce. Però, sti
cunflitti duravanu pocu. L’equilibriu alimentare di u gruppu abbisugnava di compie prestu a lita : i capi di i
dui castelli si scambiavanu
rigali, sacrifizii chì guarantiscenu a pace.
Durante duiemila anni, a vita cuntinueghja
à Filitosa. L’omu si stalla
in i circondi vicini vicini, a terra hè sempre messa in risaltu. Citemu l’olivu postu a qualchì metru da l’infilarata di e statuestantare. Avendu più di
1200 anni, hè u più vechju di Francia !
Per ogni infurmazione pudite cuntattà à M. Cesari :
M. Cesari
Site archéologique de Filitosa
20140 FILITOSA