Cuncepita da u serviziu regiunale d'archeolugia, ogni regione hè passata à u stacciu fine. Una vintina di scavi sò realizati ogn'annu, 4500 siti sò stati ricolti.

U serviziu di l'archeolugia currisponde à a scienza di u passatu, cataste di documenti sò in i scagni di Joseph Cesari, u cunservatore regiunale di u serviziu regiunale di l'archeolugia, chì dipende da u Ministeru di a Cultura. Millaie di pagine, di scritti, di dissegni è di diagrammi custituiscenu una mansa di cunniscenze nuvelle nant'à a storia di a prestoria isulana.

Tuttu ciò chì cuncerna l'attualità ma dinù a memoria di l'archeolugia corsa si trova raccoltu in i scagni di u Serviziu Regiunale d'Archeolugia (SRA), stallatu accantu à a Direzzione Regiunale di l'Affari Culturali (DRAC). Joseph Cesari esamineghja u contu resu di i scavi di l'annata 2003 è i resultati, per fà una scelta pè u bigliettinu scientificu editatu tutti l'anni da u SRA è da a DRAC. E nove infurmazioni integreranu a nuvella carta archeologica di a Corsica, per un scopu fundamentale in a pulitica di u patrimoniu. Joseph Cesari è a so squadra, anu in carica l'archeolugia preventiva, u so scopu hè statu rinfurzatu, dipoi trè anni à tal puntu chì a so impurtanza cresce.

 

- Situ archeologicu di Castellu di Rustinu -

 

U Serviziu Regiunale di l'Archeolugia, hà datu l'ultima manu à a realizazione d'un arnese fundamentale pè a cunniscenza, a prutezzione, a ricerca è a gestione di u nostru patrimoniu: "a carta archeologica di a Corsica". Stu documentu s'inserisce in "a carta archeologica naziunale", chì addunisce è ordineghja i dati archeologichi dispunibili (secondu a lege di u 17 ghjennaghju 2001). A ogni nuvella operazione, stu patrimoniu s'arricchisce di u resultatu di i studii, pruspezzioni, è raporti di scavi. A carta cuntene dunque infurmazioni evulutive chì traducenu à a data di a so cummunicazione, u statu di i dati dispunibili.

Franck Leandri, ingenieru di u SRA dice: "basta à parcorre u territoriu di a Corsica per vede chì a nostra regione pussede un patrimoniu storicu cunsiderevule". Un inventariu sprupusitatu hè statu realizatu st'ultimi mesi da l'archeolochi cù a racolta d'infurmazioni inaspettate, e pruspezzioni aeree, terrestre, resultati di sundagi durante i travaglii d'ogni ghjornu. St'inventariu pò esse cunsultatu nant'à una banca di dati chì evulueghja, in leia à un sistemu d'infurmazioni geografichi chì crea leie attive trà a descrizzione tematica è diversi fondi cartografichi IGN. Ste carte sò indispensevule à u travagliu scientificu è amministrativu di u Serviziu Regiunale di l'Archeolugia.

L'utilità di a carta archeologica hè un arnese di decisioni in u quadru di a regulamentazione. A carta hè utile pè a gestione di i documenti d'accunciamentu di u territoriu è in particulare per l'urbanismu. 4500 siti archeologichi sò ricolti oghje ghjornu in Corsica. Riprisentanu una densità di dodeci siti per cummuna, siasi un situ tutti i dui chilometri. Ci vole à sapè chì e cummune di Sartè è di Purtivechju anu ognuna più di duie centu siti.

 

- Situ archeologicu di u castellu San Colombanu di Roglianu -

 

A ripartizione attuale di i siti ùn valideghja micca una realità storica, ma rispechja u statu di a ricerca archeologica in Corsica. Una ricerca dinamica cù parechji circadori è studianti chì travaglianu nant'à u Neoliticu è l'età di u Bronzu. Studii archeolochi nant'à l'Antichità si sò sviluppati. U Medievu hà benefiziatu d'anziani inventarii. L'epuca Muderna ùn hè più tantu pruspettata, cumprende e diverse furtificazioni, torre, edifizii religiosi, è i munimenti storichi prutetti da a lege di u 31 dicembre 1913.

I spezialisti dicenu chì a Corsica ùn hà ancu ricoltu a medità di i so siti archeologichi. Una realità pigliata in contu da u serviziu di l'elaburazione di a carta archeologica. U so scopu hè di riesce à ricoglie più di dece mila siti in l'annata à vene.

 

 

U Serviziu Regiunale d'Archeolugia hà autorizatu vinti scavi è prugrammi di ricerche pè u 2003. Eccu a lista riprisentativa di a realità di a ricerca archeologica fatta in Corsica:

 

Cantieri di scavi:

 

* A Coscia in Roglianu: ghjacimentu paleontologicu di u Paleoliticu, rispunsevule scientificu Eugène Bonifay di u CNRS.

* Castiglione in Oletta: ghjacimentu paleontologicu di u Plestocene, rispunsevule scientificu Elisabeth Pereira, Università di Corsica.

* Teppa di u Lupinu in Santu Petru di Tenda: rispunsevule scientificu Michèle Salotti.

* I Calanchi in Suddacarò: abitaculu di u Neoliticu è di u Calcoliticu, rispunsevule scientificu Joseph Cesari, Serviziu Regiunale di l'Archeologia.

* A Pietra in Isula Rossa: abitaculu neoliticu, rispunsevule scientificu Michel-Claude Weiss.

* Pinzu in Castellu di Rustinu: situ medievale, rispunsevule scientificu Daniel Cesari, Educazione Naziunale.

* A Fuata in Lumiu: ghjacimentu neoliticu, rispunsevule scientificu Pierre Neuville.

* Mammucci in Santu Petru di Tenda: situ prestoricu, megaliticu, rispunsevule scientificu Franck Leandri, Serviziu Regiunale d'Archeolugia.

* San Ghjuvanni d'Ortolu in Sartè: abitaculu medievale, rispunsevule scientificu Gilles Giovannangeli, Educazione Naziunale.

* Stantari in Sartè: situ prestoricu megaliticu, rispunsevule scientificu André d'Anna, CNRS.

* Mariana in Lucciana: situ anticu è medievale, rispunsevule scientificu Philippe Pergola, CNRS.

* Vasculacciu in Figari: situ prestoricu, megaliticu, rispunsevule scientificu Pascal Tramoni di l'Istitutu naziunale pè l'archeolugia preventiva.

 

Prugetti cullettivi di ricerca:

 

* U neoliticu di a Corsica: rispunsevule Jean-Denis Vigne di u CNRS-Museum Naziunale di Storia Naturale è Laurent Costa di l'Università Parigi X- Nanterre.

* A bassa valle di u Golu da a Prestoria à u Medievu: rispunsevule Philippe Pergola.

 

Pruspezzioni tematiche:

 

* Costa di U Monte in Poghju Mezzana: rispunsevule scientifica Nathalie Marini di l'Università di Corsica.

 

Pruspezzioni è inventarii pè a Carta Archeologica:

 

* Cummuna d'Ersa: rispunsevule scientificu François Lorenzi di l'Università di Corsica.

* Cummuna di Corti: rispunsevuli scientifichi Franck Allegrini-Simonetti di l'Università di Corsica è Dominique Pasqualaggi di l'Università di Bordeaux.

* Cummuna di Sartè: rispunsevule scientificu Frédéric Demouche di u Museu di a Prestoria di Corsica.

* Cummuna d'Olmi Capella: rispunsevule scientificu Françoise Innocenzi di l'Università di Corsica.

* Piaghja di a Gravona, cummune d'Aiacciu è Bastelicaccia: rispunsevule scientificu Laurent Casanova di u Serviziu Regiunale d'Archeolugia.

 

E fiure presentate nant'à sta pagina sò state stratte da u Corse Hebdo N^u 240.