A decana di e sucietà sapienti
hà 122 anni d'esistenza
Francis Beretti - attuale presidente
A "Societé
des Sciences historiques et naturelles de la Corse" hè stata creata di dicembre di u 1880 da l'abbate Letteron è da qualchì sapienti. Avianu à core di priservà u patrimoniu culturale di l'isula.
A so storia ùn hè stata sempre faciule, ma hà sappiutu supranià
e difficultà è u tempu. Eccu a so storia.
Sta venerabile istituzione hà duie centu cinquanta aderenti, frà questi
cinquanta sò istituzioni di prestigiu cum'è l'università di a Sorbona di u Harvard, di Cambridge, di Berlinu
è u Senatu talianu. Ogni circatore travagliendu nant'à a Corsica o
in duminii diversi cum'è a storia, l'ambiante naturale, l'architettura, a demografia, a bottanica, a geolugia, ùn si pò passà di cunsultà u bigliettinu di a sucietà di e scienze. Ci hè forse un numeru frà i 697 publicati à i ghjorni d'oghje chì tratta di u sugettu chì l'interessa! In fatti, a sucietà sapiente publicheghja ogni trimestru o ogni semestru secondu l'impurtanza di
u libru un bigliettinu chì tratta di quistioni diverse in relazione cù u patrimoniu naturale, storicu, erettu o culturale di a
Corsica. L'articuli sò firmati da intelletti di quì è d'altrò, tutti restituiscenu a realità isulana d'eri o d'oghje. Un cumitatu di redazzione è di lettura custituitu di membri di u cunsigliu d'amministrazione di l'associu face
a selezzione di i scritti. Francis Beretti è Victor Serafini rispettivamente presidente è secretariu generale di a sucietà di e scienze dicenu:" Pruvemu à fà publicazioni
equilibrate è pluridisciplinarie.
Fide à e regule fissate da
u cannonicu Letteron, ùn accettemu chè articuli
originali è inediti è ricusemu
opere di pulemiche o d'opinione persunale"
U canonicu Letteron - presidente fundatore
Ghjè in u 1878, chì l'abbate Letteron ecclesiasticu sapiente ghjunghjia in Bastia per
insegnà e Lettere classiche à u liceu di a cità. Uriginariu di a Sciampagna, à a ceremonia di rimessa di premii di fin d'annata, hà emessu
l'idea di creà un'accademia pè perpetuà a tradizione di l'anziane sucietà litterarie. Ci hè vulsutu dui anni per chì l'idea si cuncretizeghji è u 26 dicembre di u 1880 nascia "la
Société des sciences historiques è naturelles de la Corse". Fundata cù a participazione
d'intellettuali corsi frà i quali Petru Lucciana, insegnante più cunnusciutu sott'à u nome di Vattelapesca, autore di pezze di teatru è rumanzi scritti in lingua corsa.
U scopu di a sucietà sapiente era di racoglie documenti manuscritti edittati, spapersi, cunnisciuti o inediti chì trattanu di a Corsica, per priservà u so patrimoniu intellettuale
è di fà piglià cuscenza à e giovane generazioni di sta richezza. U bigliettinu trimestriale servia è serve sempre di lea trà
a sucietà di e scienze chì hà subitu ricevutu
l'eccu favurevule di a pupulazione.
L'abbate Letteron è i cullaburatori, cù un'energia insazievule anu fattu un travagliu
di racolta è di publicazione
cunsiderevule custituendu cusì unu di i fondi
di documentazione i più ricchi
cuncernendu a Corsica. Ghjè
stu travagliu ch'elli cuntinueghjanu à i ghjorni d'oghje i rispunsevuli di st'associu. A più
vechja sucietà sapiente di l'isula è una di e
più anziane di Francia.
In 123 anni d'esistenza, hè certa
chì a sucietà di e scienze hà avutu mumenti
difficiule: a morte di i rispunsevuli
di u principiu, a diminuzione
di u numeru di l'aderenti,
a prima guerra mundiale, u saccheghju è a distruzzione di e
s'archivie durante a
seconda guerra. Grazia à a vuluntà di i so presidenti successivi è di i so membri à sucietà
di e scienze s'hè rimessa nant'à pede. I s'anziani presidenti ch'elli sianu omi di lettere,
omi di chjesa o omi di legi avianu
tutti in cumunu a listessa fede: sviluppà è trasmette i "munimenti intellettuali" di a Corsica. Francis Beretti l'attuale presidente è u so predecessore Joseph Palmieri anu seguitatu a strada di l'animatori di a sucietà dipoi u 1880. Ma ci nè unu chì cum'è
u canonicu Letteron hà lasciatu impronte,
ghjè Pierre Simi, geografu, insegnante, hà passiunatu generazioni
di liceani è assicuratu a presidenza di a sucietà di e scienze da u 1961 à u 1992, ne era
membru dipoi u 1948. Francis Beretti
dice: "Cum'è l'abbate
Letteron, Pierre Simi s'hè cunsacratu à a sucietà. Hà riesciutu
à cunduce à bè a so carriera d'insegnante
è quella di circatore essendune u presidente. À a fine
di a seconda guerra mundiale,
cù un picculu gruppu di cullechi prufessori frà i quali Ferrandu Ettori, hà principiatu
à milità per l'associu. Ghjera un intellettuale è un omu rimarchevule d'una grande umanità". Autore di libri famosi, u primu essendu "premier
précis de Géographie de la Corse", Pierre Simi
hà participatu à l'accunciamentu di u territoriu di
l'isula, fendu studii sopr'à locu per delimità e zone d'appellazioni d'urigine cuntrullata cuncernendu à viticultura. Un omagiu à a misura di u so travagliu li serà resu cù
a publicazione di cinque vulumi di i "bigliettini".
U primu escerà à u mese di marzu di u 2004, reuniscerà quattru numeri da u 698 à u 701, mille è cinque
centu pagine cunsacrate à u prufessore
Pierre Simi.
L'annata 2002 hà marcatu cambiamenti
in a struttura. In fatti pè a prima volta, a Sucietà di e Scienze hà acquistatu
un lucale chì si trova 1
place Vincetti. Un situ internet
hè in corsu d'ellaburazione.
L'annata in corsu vederà a ripresa di a cullezzione "Corse
d'hier et de demain" per studii particulari. À u mese d'aprile a sucietà participerà à u 128esimu cungressu
di e sucietà storiche è scientifiche chì si ferà à u liceu Paul Vincensini di Bastia cù sei centu participanti.
Infine un inventariu di e cullezzioni di libri di a sucietà di e scienze storiche serà fattu,
per edità un catalogu chì serà messu à a dispusizione di i circadori. E certa, a decana di e sucietà sapienti di Corsica hè animata d'un soffiu novu.