UNA VOCE DI A GIUVENTÙ
State
à sente l'intervista di Voce Nustrale
In lu 1975 iscia u prima numaru di a rivista Rigiru : era scrittu in u caparticulu « a
lingua è a cultura corsa
sò prove è vive ». Passatusi in là, vinti ottu anni dopu,
fate contu u nostru u
piacè di scopre una sala universitaria piena, à discorre è raghjunà sopra à u particulare di a litaratura nustrale… in lingua nustrale.
Marcuri 26 di farraghju, l’associu Missaghju invitava studianti, spizialisti è passiunati à vene à dibatte di litaratura corsa. Più pricisamente,
u tema era Litaratura è giuventù.
À partesi da cinque ore di sera, sò stati belli numarosi quelli chì si sò affaccati à sente raghjoni è cuntrastate : studianti di studii corsi è d’altre discipline, insignanti, scrivani, rispunsevuli di a ghjuria di a Biennale di e nuvelle,
associ cum’è u Centru Culturale Universitariu ;
ci eramu ancu noi altri di l’Adecec, invitati ch’è no eramu stati,
cun curtesia, da i rispunsevuli di Missaghju.
U incontru
hè principiatu cù a prisintazione di l’associu è i so fini. À l’iniziu u so nome u caccia da u ghjurnale di u sindicatu studiantinu CSC chì i so rispunsevuli ne facenu sempre parte oghje. Ma à pocu à pocu, sentenu u bisognu di virsià i so fatti di modu
più sputicu, parsunalizatu
di più, girendusi sta volta
ver di l’azzione culturale. Oghje
custituisce quessa a primura maiò, senza
chì nimu si scordi parsunalamente di a so adesione sindicale. Simpliciamente, pà a squatra rispunsevule è i membri sò difinite
altrimente e priurità.
Ghjustu appuntu
anu sceltu di parlà stu ghjornu
di u incontru trà litaratura è giuventù. Parlanu prima Rumanu Colonna è Niculaiu Sorba, po uni pochi d’autori -giovani- chì anu participatu à l’ultimu cuncorsu di e nuvelle, a Biennale di litaratura
urganizata in cumunu trà Sardegna, Cicilia,
Baliare è Corsica. Cusì si sò espressi Marcellu
Jureczek, Lisandru Muzy, Ghjuvan Matteiu
Alberghi è Niculaiu Sorba, quattru autori di a « ginarazione di
i pulloni » (pullastroni
ùn sò più avà, chì vulete o ghjente, tempi è
tempi !). Hè statu un piacè
di senteli raghjunà in lingua nustrale di i so tichji è primure
di scritture, nascia cum’è l’idea chì via, a lingua hè sempre
viva è s’arrappacheghja… Alanu Di Meglio, prisidente di a ghjuria di a
Biennale, ci hà lettu cù Saveriu Ferrandi
uni pochi di passi di l’autori mintuati. Era prisente in la sala Ghjuvan Luigi Moracchini, vincidore di u cuncorsu cù una nuvella fantastica, Maestria : scrive
oghje chì quantu hè è cun penna
maestra.
S’hè
pussutu sente un scambiu di
qualità sopra à tema è scelte parsunale,
risorte da i dibattiti chì
a lingua tene sempre u postu maiò in le primure di scrittura di certi invece chì ci n’hè chì s’adilitteghjanu piuttostu cù a virsura litararia.
Dibattitu vechju, l’hà ricurdata Paulu
Desanti, chì hà chjamatu à
una razza d’aghjurnamentu
di a scrittura oghjinca, inseme à a criazione di u prima rumanzu isulanu, chì à parè soiu trega
à vene. U dibattitu s’hè compiu cù
l’analisi fini di Dumenica Verdoni è Ghjacumu Thiers, prisidente di u CCU, po s’hè ritrovu ugnunu
à tuccà u bichjere di l’amicizia, sempre cù mudarazione ben intesu.
I rispunsevuli
di Missaghju, Rumanu
Colonna è Niculaiu Sorba,
l’avete pussuti sente nantu
à l’onde di Voce Nustrale, ci ferma da ricurdà u so situ, apartu à a discussione cù u so foru prigiatu da i studianti : http://missaghju.univ-corse.fr/. À ringrazialli
dunque, cum’è no ringraziemu à Ghjacumu Thiers è u
CCU d’avecci accoltu in cundizione cusì pusitive.
Fighjuleti i Nutiziali di
l’ADECEC :