« E via cruci » intrudutte in Corsica
da San Leunardu di Portu Mauriziu

Eccu ghjuntu u tempu di Quaresima pè i cristiani. Una stonda primurosa in a liturgia nanzu à Pasqua, st’intervallu di tempu hè puntellatu da riti specifichi, u più impurtante essendu a pratica di « e via cruci », chì si praticheghjanu in chjesa. « E via cruci » sò state sparte da i franciscani dipoi u 1312, st’ultimi avianu ottenutu da i Turchi a guardia di i Lochi Santi, frà questi a « Via Dolorosa », chì andava da u tribunale di Pilatu à u Golgotha. U tempu passendu, i Turchi videndu a folla di i pelegrini chì vulianu seguità u percorsu di a Passione di Ghjesù, i franciscani li sustituiinu « Vie Dulurose » fora, o nentru e chjese, cù croci, quadri o bassi rilievi riprisentendu e tappe, o stazioni, parcorse da Ghjesù da a so cundannazione à u sepolcru. Ghjè solu qualchì seculu più tardi chì sta devuzione si sparse in Occidente. U numeru di e stazioni varieghja sin’à u XIXu seculu, ma e quattordeci stazioni ricumandate da i franciscani funu ritenute. U rituale di sta devuzione ùn hè cambiatu è cumprende, à ogni stazione, preghere, cantichi è un’esortazione. In Corsica, « e via cruci » sò state intrudutte da San Leunardu di Portu Mauriziu, à un’epuca turbata di a nostra storia. Qual’era San Leunardu ? Un missiunariu franciscanu, chì si chjamava Paulu-Ghjilormu Casanova, natu in Portu Mauriziu (oghje Imperia, pruvincia di Genuva). Cunnisciutu cum’è essendu u più grande missiunariu di a so epuca. Ferà più di duiecentu missioni, frà queste dodeci in Corsica. In u 1744, u papa Benedettu XIV u mandò in Corsica à a dumanda di u senatu di Genuva. A faccenda di San Leunardu fù immensa, per via chì, à e guerre contr’à Genuva, s’aghjustanu e guerre di i partiti, l’ignuranza di u cleru, è u lascia corre generale. San Leunardu ghjunghje in Corsica à un’epuca duv’ellu ci fù duiemila umicidii in dui anni. Ghjera per ellu una missione religiosa è pulitica. Sbarca in Bastia u 12 dimaghju, fù ricevutu in paparia, è ci sterà una settimana. In a chjesa di San Ghjuvan Battista hè cunservatu un mobulu di sacristia, chì l’hà ghjuvatu per scrive unepoche di e so prediche. Pacificheghja a Casinca, u Niolu, l’Ampugnani è u Fiumorbu. Predicheghja a ricunciliazione, fendu signà trattati di pace davant’à nutari trà i nemici, face pregà e pupulazioni, è cunfessa, ma soprattuttu, finisce ogni missione cù « e via cruci », fendu participà tutti l’abitanti di a pieve accorsa per sentelu predicà. San Leunardu fece inalzà in Corsica un centu di « via cruci » (certe croci esistenu sempre in i nostri paesi). San Leunardu parte da Corsica u 19 di nuvembre di u 1744. Hè mortu in Roma in u 1751, fù canunizatu in u 1867. Oghje ghjornu a devuzione di « e via cruci » hè sempre viva in Corsica. D’altronde Mma Geneviève Moracchini-Mazel pensa chì i quadri di e stazioni di e nostre chjese, opere di pittori lucali, anu forse datu l'estru à e prediche di San Leunardu. In ogni parochja di l’isula, « e via cruci » si facenu ogni venneri di Quaresima ; e preghere taliane di San Leunardu sò state tradutte in francese, ma numerose sò e persone chì bramanu di perpetuà st’orazione di u grande missiunariu : « vi pregu, o Ghjesù bonu, per la vostra passione, dacci perdonu ».