Pè una vera educazione bislingua

 

 

      « Insignamentu bislingu o educazione bislingua ? » U tema di u cullocchiu urganizatu u 5 di maghju di u 2004 in Corti, cù u sustegnu di l’università di Corsica è di a CTC, hà permessu d’addunì specialisti è pratichi pè fà un bilanciu, ma dinù studià e scelte pedagogiche messe in opera è e difficultà chì sò accadute. D’altrò, ùn ci vole micca à scurdassi quant’ellu face prò l’insignamentu bislingu à i zitelli. Difatti, secondu Marilène Menozzi, prufessore di scole di u situ bislingu Sandreschi di Corti : « inghjenna un’apertura, soprattuttu quand’ellu entre in prugetti pedagogichi permettendu di ligà tutte l’amparere, ch’elle sianu rializate in corsu o in francese. » In più, à sente à Ghjuvanni Duverger, ispettore d’accademia unurariu è cunsultante pè l’insignamentu bislingu à u ministeru di l’affari esteri : « st’insignamentu porghje una vera cumpetenza linguistica, chì puderà ghjuvà pè amparà una terza o quarta lingua, migliureghja a capacità à amparà è ci hè l’arricchimentu di passà da una cultura à un’altra ».

 

 

St’argumenti ùn devenu micca fà sminticà a quistione di l’utilità di a lingua nustrale pè a sucietà, dunque u so statutu. U linguistu Claudiu Hagège avia digià dettu à l’Università di Corsica chì, « pè salvà una lingua, ci vole una vuluntà pulitica è ch’ella entre in una certa rialità ecunomica è suciale ». Omu hà studiatu dinù a situazione di u Paese Bascu induve u modu d’amparera hè funditu nant’à un prufessore pè una lingua, mentre chì, in Corsica, avemu un maestru pè duie lingue.

           Infine, custattendu chì l’insignamentu bislingu ùn hè più una sperimentazione, i participanti à u cullocchiu anu amentatu ciò ch’ellu ci vulia da fà pè sustene u so sviluppu. A furmazione di i maestri è a custituzione di vere filiere sin’à u cullegiu è u liceu essendu poste maiò, perchè cundiziuneghjanu a piazza di u Corsu in l’educazione futura di i nostri figlioli.

 

U CRDP hà prisentatu e so paruzione.