L'archeologhi Michel-Claude Weiss è Francescu de Lanfranchi ci parlanu d'una scuperta archeologica impurtantissima, fatta trent'anni fà, quella di a decana di i Corsi vechja d'8000 anni.
Malgradu u pesu di l'anni, o piuttostu di i seculi, sta " brava donna ", hè sempre affascinente, postu chì parechji omi s'interessanu sempre à ella à fine di disciuplicà i misteri chì l'atturnieghjanu sempre, ciò chì custituisce à stu ghjornu a più anziana vistica umana in Corsica. Frà l'omi chì l'anu esumatu, trent'anni fà, da a so sepultura, stu scheletru preistoricu vechju di più d'8000 anni (epuca preneolitica), fù battizatu da un giurnalistu di Corse-Matin cù assai rumantismu a " Donna di Bunifaziu ". U nome hè restatu è francherà forse i seculi. L'annata 2002 marca u trentesimu anniversariu di st'evenimentu. Un ritornu in daretu s'impone, à u mese di lugliu, di u 1972, più precisamente u14 di lugliu, ghjè una ghjurnata assignalata in a mente di Francescu de Lanfranchi è Michel-Claude Weiss, i dui archeologhi chì anu ricullatu a salma. I dui circatori scontri à l'università di Corsica duve u Prufessore Weiss hè insegnante, è rispunsevule di u dipartimentu archeolugia, duv'ella hè esposta una " copia " di a donna, (l'uriginale essendu cunservatu à u museu di Livia), ci contanu cù emuzione sta scuperta archeologica è umana. In u 1972 Michel-Claude Weiss era codirettore di l'Istitutu corsu di studii preistorichi, è cù Francescu de Lanfranchi si spartianu in u sessanta u territoriu isulanu in cerca di vistiche : u primu facia scavi à u nordu, u secondu à u sudu. Fatte in paralellu, l'investigazioni anu da cunverge in u 1966 versu u sudu, più precisamente versu u situ di l'Araguina-Sennola situatu longu à a naziunale 196, à duie centu metri di l'imboccatura di Bunifaziu. Ghjè custì ch'ellu fù scupertu à casu, un agrottu preistoricu, ciò chì l'archeologhi chjamanu in u so linguaghju " une station ".

Infurmati, i dui scientifichi entrenu in ballu per impedì a sparizione d'ogetti per via di a publicità fatta ingiru à sta scuperta. Seguiterà una campagna di scavi assai fruttuosa. In tuttu dece campagne, chì dureranu sin'à u 1976, chì si traduceranu cù a racolta d'infurmazioni senza paragone in Corsica, nant'à e diverse tappe d'evuluzione preistoriche è protoistoriche (grazia à i cinquanta trè stratti rilevati). Un saltu in daretu chì hà da permette à e cunniscenze archeologiche di fà un'avanzata impurtante. St'epuca custituisce una tappa impurtante per l'archeolugia corsa. Àcontru sensu di a scola scientifica chì preduminava sin'à tandu, Michel-Claude Weiss è Francescu de Lanfranchi, anu da innuvà utilizendu in Bunifaziu, un'altra manera di travaglià. I dui archeologhi dicenu : " D'una manera disprezzante ci chjamavanu i scavatori à i pinnelli, i stratti di i depositi sò cacciati minuziosamente ". Un travagliu di furmicule chì i dui archeologhi esecuteghjanu cù risichi in st'agrottu calcariu. " Framenti di scogliu si staccavanu di manera regulare, dice Michel-Claude Weiss, mi ricordu d'una massa di parechji chilò chì minacciava di cascacci in capu, infurmatu u direttore di l'antichità ci hà mandatu caschi in plasticu per prutege u capu ". Un annu dopu à l'esumazione d'una parte di u scheletru d'un omu preistoricu vechju di 5 000 anni nanzu à Cristu, i dui omi decisenu di ripiglià i scavi in l'Araguina-Sennola. Tandu l'archeologhi lucalizeghjanu in i stratti inferiori una tacca tondula di culore scuru. Una pinnellata permette di sgagià un ditu di pede, poi à pocu à pocu, scoprenu un scheletru interu chì hè bè cunservatu. Dice Francescu de Lanfranchi : " L'agrottu si truvava à bor di strada, ùn pudiamu lascià u scheletru senza surveglianza, cù l'aiutu d'altre persone chì facianu parte di a squadra, avimu scavatu notte è ghjornu, mentre chì l'abitanti assistianu à e ricerche in un silenziu religiosu ". U studiu fattu dinù da un antropologu, Henri Dubay, hà facilitatu " l'identificazione " di sti resti umani. In data di 6 600 anni nanzu à Cristu, vale à dì l'epuca preneolotica, a " Donna di Bunifaziu ", hè un scheletru più vechju chè quellu scavatu l'annu nanzu. Sta scuperta hè a cunfirmazione d'una frequentazione umana à u settesimu millenariu in Corsica. Seguiteranu trè altre campagne di scavi . A prublematica ùn hè micca tantu di scavà, è di scopre ma d'interpretà è di capì. In un primu tempu, i studii si sò fatti à l'interiore di l'agrottu per analizà u documentu archeologicu in u so cuntestu. Altrimente, ùn hà nisunu valore scientificu. In un secondu tempu, avimu cacciatu i resti da l'agrottu è l'avimu depusitati fora, cuperti di carta igienica, per mancanza di mezi finanziarii. À stu livellu di e ricerche, apparisce chì l'agrottu d'Araguina-Sennola cuntenia duie sepulture è sulaghji d'abitaculi. L'analisi di u cuntestu porterà d'altri elementi determinanti nant'à st'osse chì sò quelle d'una " giovana " donna. Allungata nant'à u spinu, u capu giratu à diritta, i pedi aghjunti, u corpu era ricupertu d'una polvera minerale di culore brunu rossu scuru prubabilmente sepellita sottu a rena. Studii patologichi anu permessu di stabilì chì a " Donna di Bunifaziu " suffria d'infirmità chì l'impedia di marchjà. Un detagliu chì indica chì sta donna hà vissutu in un gruppu, duve a nuzione d'aiutu, avia, una vera impurtanza. L'investigazioni cuntinueghjanu à i ghjorni d'oghje (analisi d'ADN è paragoni morfologichi sò in corsu), per cumpletà i rinsignamenti racolti. Interrugati trent'anni dopu Michel-Claude Weiss è Francescu de Lanfranchi dicenu : " L'archeolugia deve assai à l'azardu, ghjè d'altronde di sta manera ch'elle sò state realizate è più belle scuperte. A messa à ghjornu di a " Donna di Bunifaziu ", custituia per noi a ricumpensa di tutti i sforzi realizati tant'anni nanzu ". " Sò eramu cummossi da sta scuperta, per via di u statu di cunservazione di u scheletru, aviamu difficultà à realizà ciò ch'ella riprisentava da u puntu di vista scientificu. Ci ne simu resi contu à u filu di l'avanzata di l'analisi fatte da i differenti spezialisti ". Stu caratteru eccezziunale hè sempre d'attualità. A " Donna di Bunifaziu " ghjè à stu ghjornu u suggettu u più anzianu chì hà pigliatu un valore internaziunale per via ch'ella custituisce a più anziana testimunianza d'una prisenza umana isulana in u Mediterraniu occidentale. St'onore ùn la face micca diventà rossa sta donna venerabile. D'altronde ùn hà micca svelatu tutti i so secreti. Secreti chì l'archeologhi speranu di truvà in a so tutalità grazia à e nuvelle perspettive chì a scienza offre.