1 - 2 - 3 - 4

Versu u 1671, u stabilimentu hè ingrandatu per pudè riceve dodeci religiosi. À u principiu di u 18simu seculu, hà forse e dimensioni definitive hè ghjè ingiratu da un accintu. Hè tandu unu di i cunventi i più impurtanti di Corsica. Pussede 14 o 15 religiosi è ne pò riceve dipiù. Hà 5655 lire di rivenuti : un grande ortu (3545), un castagnetu (1160) è una vigna (950).
Dopu u 1729, u cunventu participeghja à a rivolta contru à Genuva. Hè forse à iss'epuca ch'omu scava una cisterna in u scornu sud-este di a corte interiore. Forse in previsione d'un assediu postu chì l'acqua di surgente ùn mancava al di fora. St'a cisterna hè stata riempiuta dopu à l'ultima guerra.
À a Revuluzione francese, u cunventu hè cunfiscatu è datu à u geniu militare ma a chjesa, chì hà allora sette cappelle laterale, " qualchì d'una bellissima " dice u raportu Renucci, hè cunservata à u cultu.
In u 1816, u marchese de Riviere, cummissaru strasurdinariu di u rè, cede u cunventu à a cumuna di Cervioni. Sta cessione hè forse di corta durata postu chì u stabilimentu resta pruprietà di u ministeru di a guerra è serve di caserna.
In u 1861, u guvernu compra u duminiu di Casabianda è ci trasferisce u penitenziariu di Chiavari duve a malaria face disguasti. A murtalità hè impurtante. L'annu dopu, u ministeru di l'internu si face dà u cunventu chì ghjuverà di rifugiu d'istatina è d'infirmeria à u penitenziariu.U statu civile di Cervioni face mensione di l'impurtante murtalità frà i prigiuneri : 4 morti in u 1862, 63 in u 1863, 59 in u 1864, 80 in u 1865, 25 in u 1866, 3 in u 1867, 33 in u 1876, 17 in u 1877, 2 in u 1878, 5 in u 1879, 12 in u 1880 (frà tempu, u rifugiu hè statu trasferitu in Marmanu).
In u 1884, u penitenziariu essendu statu supressu, l'amministrazione di i Duminii hè incaricata di vende u cunventu. A cumuna di Cervioni u vorrebbi cumprà ma, per via di i disguasti devuti à u filosserà è à di l'oidiu, ùn dispone chè di pochi mezi (41). Eppuru brama di fà cessà l'emigrazione è salvà a so ecunumia. L'acquistu di u cunventu face parte d'un pianu di rinascita. U casamentu serebbi datu in affittu per l'allevu di i vermi a seta, a preparazione di e foglie di tabaccu è a frabricazione di u vinu da un industriale chì comprerebbi l'uva quandu e vigne serebbinu ricustituite. Una lettera di u direttore di i Duminii, di u 16 marzu di u 1889, dà u s'accordu per una vendita à l'amichevule à cundizione chì l'operazione sia dichjarata d'utilità publica. U 18 maghju, u Cunsigliu municipale face una dumanda in stu sensu.
L'annu dopu, Sadi Carnot visita a Corsica. U 10 aprile, a municipalità, chì ùn hà ancu ricevutu una rispota, face una riquiesta à u prefettu per ch'ellu a trasmetti à u presidente di a Republica. Sta volta, hè torna quistione di trasfumà u cunventu in stabilimentu industriale destinatu à a preparazione di i prudutti agriculi : distillazione di piante arumatiche, scurtichera è scarmigliera di a ramia si a cultura pò esse intrudutta in u cantone. S'agisce d'una fibra impurtata da China è destinata à a fabricazione di i biglietti di banca.