1 - 2 - 3 - 4

Secondu Petru Cirneu, u sedecesimu seculu s'annunzia sott'à i più belli auspizii più chè u seculu scorsu. " L'annu di grazia 1506, dice, a pace regnava in tutta a Corsica ". S'annu custì, u papa Ghjugliu II autorizeghja i Frati Minori di l'Osservanza à fundà un cunventu in a pieve di Campulori. Stu cunventu, dedicatu à San Francescu cum'è a più parte di quelli di a famiglia franciscana, fù erettu, a prima custruzzione trà u 1506 è u 1509 secondu u Padre Olivesi, in u 1507 secondu Colonna, in u 1508 secondu Pietro di Rostino (40).
U scopu di a fundazione ùn pone nisuna difficultà. A l'incuntrariu, l'impiazzamentu ùn hè statu sceltu chè dopu discussioni è, secondu Gonzaga, citatu da Olivesi, grazia à l'intervenzione divina. Ghjè a listessa storia chè quella di Mahomet rifugiatu à Médine, chì hà lasciatu un camellu sceglie u locu per l'edificazione d'una moschea.
I nutabili di u Campulori s'eranu reuniti cù i religiosi venuti apposta per l'erezzione di u cunventu. Discussioni emergenu da l'assemblea. I rispunsevuli franciscani, sentenu soffià u ventu di a discordia, dumandanu à a pupulazione di rimettesine à a vuluntà di Diu chì, sullicitata da e preghere, ùn pudia chè manifestassi. Una prucessiò hè dunque decisa.
U ghjornu precisu, a longa sfilarata di i Campulurinchi in preghera si mette in marchja. Nantu à a strada un boie si tene fermu, mancu appena spaventatu da a folla. U Padre Agostino, di u Renosu di Tavagna prufitta di l'occasione è, trè volte à fila, à nome di a Santa Trinità, di a Vergine Maria è di San Francescu, cummanda à u boie di falli vede u locu duv'ella si devia fà a custruzzione. L'animale si mette in viaghju, cunduce a prucessione à passi lenti à u locu duv'ellu ci hè oghje u cunventu è ricusa d'andà più luntanu. " U situ hè veradimente munasticu, dice Olivesi. Da quì si scopre una grande piaghja è un'immensa stesa di mare. L'ochju gode d'una di e più belle (forse a più bella) vista di tutti i cunventi di Corsica ".
In fatti, à l'orlu di a strada dimartimentale, à 1200 metri di Cervioni, à 1600 metri di u Favalellu, u cunventu hà un impiazzamentu magnificu in un locu à umbria, cù a vicinanza d'una surgente : a funtana di i frati.
A prima custruzzione era mudesta. In u 1584, Monsignore Lisandru Sauli si cunsacra à fà a restaurazione e, forse, à ingrandallu, stimulandu u padre-guardianu chì s'inquietava chì i travagli ùn avanzavanu. Santu Lisandru Sauli li dicia : " ùn abbiete penseru, i travagli seranu finiti nanzu ch'ella venga à termine a vostra carica ", e so predizzioni si realizeranu grazia à e numerose cullaburazioni.