Stonda assai particulare di a nostra Storia di Corsica, u reame di Teodoru, chì durò pocu, hà fattu nasce è face sempre nasce parechje interrugazioni. U persunagiu stessu, un sgiò di Westphalie, rè in un paese chì s’era fidatu à ellu, hè un suggettu di quistioni. Secondu i testimoni chì l’anu scontru, cum’è Sebastianu Costa, u so secretariu di statu, Teodoru di Neuhoff era autoritariu, li piacia pocu è micca a critica è ancu menu a cuntradizzione. À sente dì, s’infuriava prestu o avia stonde di depressione. Sicuramente chì un psicanalistu averebbe da dì nant’à ellu in quant’à a so zitellina campata in a severità, stu fattu hà influenzatu sicuramente u caratteru di Teodoru.

U so caratteru fece chì certe persone di bona vuluntà s’uppunianu à ellu mentre ch’elle l’averebbenu pussutu ghjuvà durante u so regnu. U stalvatoghju chì scuncerta u più hè quellu cuncernendu u rè è unu di i so tenenti, u generale Luccioni : Anghjulu Luigi Luccioni, di Carchetu, era unu di i capiguerra più famosi di a so epuca. Cusì, Teodoru li cuncedia un’unità autonoma è una missione difficiule, a presa di a citadella di Bunifaziu. In quant’à Ghjacintu Paoli, ricevì l’ordine d’impadrunissi di Bastia è l’ordini fubbenu i listessi pè Fabiani è Arrighi in Calvi è in San Fiurenzu. U rè, avendu amparatu l’arte di a guerra in a bella armata di Baviera, si credia capace di cunduce operazioni militari, è volse pigliassi u castellettu di San Pellegrinu ma ghjera una battaglia troppu difficiule. Pè ciò chì tocca à Ghjacintu Paoli, principiò bè a so lotta in i quartieri fora di Bastia ma abbandunò l’operazioni pè assiste à e funeraglie di u babbu.

Quand’ellu amparò a nutizia, Teodoru si messe in zerga è parlò di fà fucilà u traditore. Andrea Giafferi riescì à falli ammette, dopu à ore è ore, chì un dolu in famiglia suprana ogni evenimentu pè ogni Corsu. È l’operazioni militari cuntinuonu cù fiaschi è vittorie. Un ghjornu, s’affaccò un messageru à u campu di Teodoru è li annunziò una nutizia stunante. Sta volta, u generale Luccioni, invece d’impadrunissi di u so ogettivu, hà datu a cità di Purtivechju à i genuvesi... Peghju, Luccioni vultava avà versu San Pellegrinu pè fà rifalà u rè versu e parti suttane, cusì rendia u rè à i nemichi. U suvranu si messe torna in zerga, massimu chì Luccioni ùn avia scuse fora di s’ella ci hè stata una malintesa tamanta. In quant’à u statu attuale di e cunniscenze storiche, i narratori anu parè opposti. Serà un tradimentu ? Serà chì u generale hè statu obligatu di pattighjà cù u nemicu, vulendu cusì salvà l’avvene ? Sia ch’ella sia, hè statu ghjustiziatu dopu à un prucessu fintu.

St’ammazzu scumudò u vicinatu di u rè. Ind’è i partigiani, ghjera un sbagliu maiò o ancu un umicidiu ! Qualchì tempu dopu, mentre chì Teodoru cumbattia in Balagna, parenti è amichi urganizavanu una spedizione chì tumbò à Simone Fabiani. Durante una bella stonda, i partigiani di u generale Luccioni rimpruveronu à Teodoru st’ammazzu è rinfurzonu l’idea di u caratteru zergosu di u falsu rè.