L'Archeolugia in Corsica

una scelta di Nutiziali Culturali
ADECEC 2001

 

U situ archeologicu di «Vasculacciu» (1/12/2001)

Classatu in u 1839, publicatu in u 1840, da Prosper Mérimée, scavatu da Roger Grosjean in u 1960, u celebre situ preistoricu di sepulture « coffre » hè in traccia si svelà tutti i so secreti.
Si suppone chì l'isula hè abitata dipoi almenu 70 000 anni. Ma pè u mumentu a sola prisenza certificata hè quella di a Donna di Bunifaziu 9 000 anni. U celebre ispettore di i munimenti storichi, Prosper Mérimée, face una visita in u 1839, hè arregistra u situ preistoricu chjamatu oghje « Vasculacciu » nant'à a cumuna di Figari, vicinu à Sotta, sottu à Salva di Levu. Prosper Mérimée publicherà in u 1840 « Notes de Voyage en Corse ». Per accertà chì u situ hè cunnisciutu dipoi i tempi landani, Mérimée u classificheghja, dendune una descrizzione più o menu precisa. Un seculu è qualchì annu dopu, in u 1960, Roger Grosjean ci ferà scavi. Ghjè un cimiterione, quattru tombe seranu esplurate, è viutate di u so cuntenutu (una parte di u cuntenutu si trova à u museu di Sartè dipoi u 1999). François de Lanfranchi, è una squadra d'archeologichi, di studianti, di bone vuluntà, ottenenu l'autorizazione di fà scavi nant'à u situ di « Vasculacciu ». S'agisce d'un cimiterione preistoricu d'un'impurtanza maiò significativa di sta perioda di a storia megalitica in Corsica. A cronolugia di ste prime revelazioni, hè quella di u Vesimu millenariu, trà u IVesimu è u Vesimu, siasi u neoliticu mediu. Roger Grosjean u dava digià cum'è un locu impurtante à listessu livellu chè quellu di Li Muri d'Arzachena in Sardegna. Cinque tombe megalitiche sò state ricunnisciute, quattru iscritte dentru à tumuli di petra è di terra accinte di petre. « Vasculacciu » si prisenta cum'è un grande tumbulu, cù una strattigrafia assai impurtante. Per mette à ghjornu stu cimiterione eccezziunale ci vorebbi à elaburà un prugettu cunsequente in a so glubalità, à sapè. André d'Anna, direttore di e ricerche à u C.N.R.S., in Ecchisi in Pruvenza hè u cuurdinatore di u prugettu cullettivu nant'à l'epuca megalitica di a Corsica dipoi u 1994. D'altri spezialisti sì sò aghjustati à a squadra : Laurence Pinet, duttore in Ecchisi (spezialista di i monoliti), Franck Leandri (ingenieru di studii in Aiacciu, pè u ministeru di a Cultura), Jean-Baptiste Orsoni (prufessore onorariu di l'università, geologu), Jean-Louis Guendon (geomorfologu à u C.N.R.S.), Pascal Tramoni, duttore in Ecchisi in Pruvenza). Un'operazione simile hè stata pussibile grazia à : François de Lanfranchi, à u museu di Sartè, quellu di l'Alta Rocca, grazia dinù à u finanzamentu di a Regione, di l'associu A.R.S.E.C, è a famiglia Pietri pruprietaria di i lochi à scopre, à a riscopre.

 

Mariana : 1936 è 1937 i primi scavi (14/11/2001)

L'ultimu quadernu "Corsica" (N° 195) di a FAGEC (1), hè cunsacratu à i primi scavi archeologichi di u 1936 è 1937, nant'à u situ di Mariana. Fattu da Frédérique Nucci duttore in storia anziana à l'università di Corsica, eleva di Jean è Olivier Jehasse, aderente di "Labiana", u laburatoriu di storia anziana è d'archeolugia di l'IDIM. U so travagliu prisenta e prime campagne di scavi archeologichi fatti nant'à u situ di Mariana, situatu nant'à a cumuna di Lucciana, nanzu a seconda guerra mundiale, da Louis Leschi, direttore di l'antichità d'Algeria, è Albert Chauvel, architettu in capu di i munimenti storichi. Stu raportu ripruduce l'illustrazione chì ste duie persone avianu rimessu à Mma Moracchini-Mazel, chì ripiglierà i scavi in l'annate 50. Per via di a guerra, Louis Leschi è Albert Chauvel, ùn anu fattu chè duie campagne di scavi. Stu quadernu di a FAGEC, oltre e precisioni ch'ellu dà di i raporti di i scavi, inventariu è piani, dà un'idea di l'ambiente di u travagliu di l'epuca grazia à illustrazioni. Seguiteranu trè altri numeri dedicati à a cità antica chì sò in preparazione. Frédérique Nucci, publicherà frà pocu certi elementi di u materiale, chì sò inediti à stu ghjornu, trovi di a squadra Leschi. A giovana studiente si prupone quand'ella serà duttore in archeolugia di fà ricerche nant'à u situ di Mariana (sugettu principale di a so tesa chì ghjè in corsu), è di fà prugressà a storia di st'antica culunia di Marius. Genevieve Moracchini-Mazel, è i so numerosi cullaburatori anu digià svelatu e so interpretazioni ducumentate di l'archetetture paleocristiana di a fine di u IVesimu seculu. Sta mansa d'infurmazioni sò nant'à u situ Internet (http://cerpam.multimania.com), grazia à giovani circatori corsi membri di u Centru di studii rumani paleocristiani è d'archeolugia medievale di a Corsica (CERPAM), chì travaglianu in lea stretta cù " Labiana " è a FAGEC, chì hà publicatu in i so quaderni scritti di cunferenze date ogni trimestru à l'occasione di e spassighjate di a federazione di i duttori di l'università di Corsica. Oghje s'appronta à accoglie d'altri manuscritti relativi à studii nant'à l'antichità è u medievu di a nostra isula fatti da una nova generazione di storichi è d'archeologichi di l'università di Corsica.

 

Jean è Laurence Jehasse sfruttanu u situ d'Aleria

In un ducumentu ch'elli venenu di publicà, " Aleria, nouvelles données de la nécropole ", in dui vulumi. Edizione : Maison de l'Orient Méditerranéen 2001, publicatu cù a participazione di u Dipartimentu di a Corsica Suprana, di a Regione, è di l'Università di Corsica - Labiana : Jean è Laurence Jehasse portanu a certezza d'una sucietà d'Aleria, è a so urganizazione. I scavi realizati facenu a lea trà l'epuca di u bronzu, cum'è in Filitosa, è l'epuca rumana.
Jean Jehasse, dopu avè studiatu u classicu, u francese, u grecu, è u latinu à l'università di Liò, ottene un'agregazione, è si piglia di passione per l'archeolugia, sustene una tesa d'umanismu classicu. Laurence Jehasse, uriginaria di Sartè, insegnante, diventa in u 1969 duttore in archeolugia, spezialista di a ceramica greca, etrusca, è si cunsacra à e ricerche à u CNRS. Mette in piazza u museu Jérôme Carcopino, in u forte genuvese, duv'elle sò esposte e scuperte d'Aleria. Più d'una quarantina di publicazione à stu ghjornu. Dipoi u 1955 u coppiu d'archeolochi, netta, cumpara, data, ritratta, misura ricustituisce ogni oggettu cù precisione : tombe scavate di sottu terra, scheletri, vasetti, giuvelli, punte di sfrezze... Un travagliu longu è fastidiosu, ma valurizente. Più di duie centu tombe, mille ogetti uriginarii di a Grecia, di l'Italia Meridiunale, Etruschi, di Roma, di Spagna, è di l'Africa cù Cartagine. Perchè tanta abbundanza in Corsica à quella epuca ? Per via di a so pusizione geografica in i currenti marittimi, ecunomichi, strategichi è pulitichi di tuttu u Mediterraniu, è per via dinù di a s'apertura versu i cuntinenti. D'altronde a più parte di l'ogetti scavati sò stati impurtati : giuvelli, ceramiche d'una qualità superiore. L'abitanti d'Aleria anu amparatu à travaglià u ferru, ciò chì li dava una superiurità contru l'invasori. Cusì i Corsi si sò mantenuti in l'isula. I grechi intruducenu l'insetu di a vigna, benefizieghjanu di a scuperta di u canapu, di i stuvigli in terra cum'è l'altre civilizazioni di u Mediterraniu. Ghjè cusì chì dipoi quarant'anni Jean è Laurence Jehasse facenu richerche nant'à u situ d'Aleria. Dice Jean Jehasse : " ùn sfruttemu micca tuttu, lasciemu qualchì vistica à analizà, per chì un ghjornu i nostri eredi siinu in misura di pudè verificà e strutture ". Jean è Laurence Jehasse cullabureghjanu cù u tempu, sottu l'aspettu di u passatu, senza mudificane u spiritu, fendu a lea cù un avvene più longu.

A storia d'Aleria
In 159 nanzu à Cristu, Focea, in Asia Minore hè assaltata da l'invasione di i Persi. Vint'anni nanzu un oraculu l'avia digià fattu vede a strada di u salutu insegnenduli una cità : Alalia, a strada versu Cyrnos. Un gruppu di culunizatori ghjunghje nant'à e costi di l'isula in piaghja orientale, vicinu à a foce di u Tavignanu, hè creanu a cità d'Alalia. À qualchì chilometru da u stagnu di Diana Alalia hè un agrottu sicuru pè i battelli di cummerciu è di guerra. I Grechi s'impegnanu hà fà a prusperità di sti lochi. Alalia face l'inviglia di i Truschi è di i Cartiginesi, chì in 535 piglianu a cità à i Grechi. A culunia focese si stabilisce in Marseglia. In 259 a cità hè annessata da Roma è diventa una regione cummerciale impurtante. Ghjè da Alalia in 46 nanzu à Cristu chì Ghjuliu Cesaru spedisce in Roma u granu di a piaghja orientale, u mele, a pece, a cera, l'oliu d'uliva, u ramu, u piombu argentiferu. L'Imperatore Augustu imbellisce a cità, face custruì rampali, è aquidotti. A legenda conta chì l'Imperatore Claudiu ci manda in esigliu a Seneca trà l'annu 41 è l'annu 48 dopu à Cristu. À parte da u Vesimu seculu i Vandali mettenu un termine à a duminazione rumana, Alalia serve di tappa à i Sarracini, à i Barbareschi, è à i ladri d'ogni sorte. A cità hè distrutta, poi incendiata, versu l'annu 809, quand'elli sbarcanu i Mauri, fendu ostaggi, hè ùn lasciendu daretu à elli chè vechji. Aleria hè tandu ruinata, è disertata. À u seculu XII è XV, i veschi provanu à reabilitalla, ma in vanu. Rinnuncianu à fassi cunsacrà in a catedrale d'Aleria. I porti rumani, i fiumi è i canali ùn sò più intrattenuti. U palludismu s'installa in a piaghja. Ghjè in Aleria ch'ellu sbarca Teodoru Iu fattu rè di Corsica in u 1732.

 

E stantare di Cauria in Sartè (16/10/2001)

A regione di Sartè hè u locu di e stantare, a più anziana data di quattru milla anni nanzu à Cristu. Una campagna di scavi hè stata fatta in Cauria, cù a participazione di dece studienti, scavi chì cunfirmanu a richezza archeologica di a regione. Durante un mese, Mr André d'Anna, direttore di ricerche à u CNRS, hà rinnuvellatu una campagna di scavi in Cauria, duve i scavi sò stati digià fatti in u 1964 è u 1968, sottu a direzzione di Roger Grosjean, " u babbu di a preistoria corsa ". Ghjè ghjustappuntu in Cauria ch'ella si trova à più impurtante cuncentrazione di stantare di tutta a Corsica. Un travagliu specificu, cù Paul Nebbia, direttore di u Museu di a Preistoria Corsa in Sartè ; Pascal Tramoni, specialistu di u neoliticu corsu, titulare d'un dutturatu (Maison Méditerranéene des Sciences de l'Homme); Jean-Louis Guéron, ingenieru di recerche à u CNRS, Laurence Pinet, chì finisce a so tesa nant'à e stantare, è dece studienti in archeolugia, cù a cullaburazione di a Cullettività Territuriale, è di u Statu (ministeru di e ricerche), anu finanzatu stù studiu, cumplementariu di a rinnuvazione di u museu di a preistoria in Sartè. L'analisa di i resultati derà dipiù precisioni nant'à l'omi di u neoloticu nant'à u situ di Cauria, chì data di 2 000 anni nanzu à Cristu, e più belle stantare anu 1 200 anni nanzu à Cristu, a più anziana ricolla ella à 4 000 anni nanzu à Cristu. Ben intesu u granitu di e lastre, è quellu di e stantare antropomorfe sculpite è armate, più chè l'altre si deteriureghjanu cù u tempu. Ogni participante a sta campagna di scavi, hà l'impressione d'esse à u centru di a memoria d'un patrimoniu. I cercatori scientifichi ùn anu micca pussutu spiegà tuttu, ma forse chì à parte da i resultati di i travagli fatti, è quelli chì sò a vene, un ghjornu i visitatori saperanu à natura è a funzione di ste stantare.

 

Scavi di Mariana : a fine d'una campagna (9/10/2001)

A campagna di scavi principiata u 25 aostu nant'à u situ di Mariana in Lucciana hà pigliatu fine venneri scorsu. L'operazioni sottu a direzzione di Philippu Pergola : " Rettore di l'Institutu Puntificale d'Archeolugia Cristiana ", anu permessu di mette à ghjornu mobuli archeologichi, parechje millarie di pezze, testimunieghjanu di l'intensità di i scambii trà u nordu di a Corsica, a Toscana, è a Liguria. Duie squadre di studienti anu fattu e pruspezzioni durante un mese è mezu, anu permessu di sottulineà chì una prisenza umana impurtante avia investitu u situ di a Canonica à u principiu di u primu seculu nanzu à Cristu, cù a culunia di Marius. E scuperte permetteranu di dì a natura di l'abitazione di l'epuca, è u generu di scambii chì Mariana intrattenia cù i Truschi nanzu a fundazione rumana. Philippu Pergola dice : " i scambii anu sempre esistutu malgradu l'incursioni barbaresche ". St'ultime scuperte sò primurdiale per via ch'elle permettenu di scrive cù più precisioni a storia di a Corsica. Hè previstu di piglià in contu tuttu u materiale chì pruvene da u situ recuperatu à l'occasione di i scavi chì sò stati fatti anterioramente è cunservati in altrò. Uperaziunale dipoi u veranu di u 2000, stù prugettu cullettivu di ricerca cuncerna Mariana è a valle di u Golu. Sò cusì vinti dui circadori venuti da quattordeci centri di ricerche, da a Francia, da l'Italia (Vaticanu) è da l'Inghilterra. U fattu si stà chì a cità di Mariana per via di e ricchezze dissimulate, offre a prumessa di surprese, in a misura chì nisuna prisenza medievale o muderna ùn hà nascostu i stratti di a Corsica antica. A prossima campagna di scavi nant'à u situ di a Canonica si ferà quist'annu chì vene.

 

U situ neoliticu di A Fuata in Lumiu (3/10/2001)

Una cinquantina di campagne di scavi sò state fatte nant'à u situ di " A Fuata " in Lumiu, occupatu anticamente da unu di i primi paesi agriculi di a Balagna, ste campagne anu permessu cusì di mette à ghjornu e vistiche d'un abitaculu chì data d'una perioda cumpresa trà menu 2 800 è menu 2 200 nanzu à Cristu. Per l'archeolochi di l'Universià di Corsica, u situ hè riccu di vistighe, postu chì u paese ùn hè statu occupatu chè da una sola civilizazione di u neoloticu. U travagliu di u duttore Pierre Neuvile, duttore in archeolugia, cù una squadra di studianti di u terzu ciclu di maestria di ricerche preistoriche di l'Università di Corsica, direttu da u prufessore Michel-Claude Weiss, hà permessu di mette à ghjornu una struttura d'ottu metri di lungura, svelendu cusì a superficia d'un' impurtante abitaculu di trenta metri quadrati. U situ scupertu in u 1980 à l'occasione d'una pruspezzione diretta da u prufessore Weiss, piglia cusì un'altra dimensione. Parechji seculu fà, nant'à u situ di i scavi, anu vissutu ghjente, in una cabana fatta di mena è di paglia, cù i muri ricuperti di frasconi, struttura chì ripunia nant'à una fundazione fatta di petre. L'abitazione facia parte d'un immensu territoriu, chì cupria una superficia di più d'un'ettaru, urganizatu in quindeci piattaforme ognuna di ste strutture allugiava da ottanta à centu persone. L'inseme custituia unu di i primi paesi agriculi di Balagna, pienu di vita prubabilmente in una perioda cumpresa trà menu 2 800 è menu 2 200 nanzu à Cristu, prutetta da un'accintu qualchì pezzu di stù muru sò sempre visibili à i ghjorni d'oghje. Sò dunque cusì più di 15 000 framenti di ceramica chì sò stati ritrovi, è parechje sfrezze. U duttore Neuville, è a so squadra anu fattu a cartografia di i lochi cù precisione, è annutatu nant'à un pianu i lochi precisi duv'elli sò stati ritrovi sti framenti, nanzu di rimette un raportu chì escerà à u mese di dicembre prossimu.

 

Filippu Pergola reelettu rettore in Roma (17/9/2001)

Ghjè à l'unanimità chì Filippu Pergola hè statu reelettu rettore di l'Istitutu Puntificale d'Archeolugia Cristiana. Stù rinnuvellamentu hè statu cunfirmatu ufficialmente da u Cardinale Zénon Grocholewski, è da l'arcivescu Giuseppe Pittau, Prefettu, è secretariu di a Cungregazione per l'Educazione Catolica, è pè u Ministeru di l'Educazione di a Santa Sede. Malgradu e cariche numerose in Roma, Filippu Pergola cunsacra una parte di u so tempu in Corsica, in giru à a Corsica cristiana di i primi tempi. Hè statu sceltu da a Cullettività Territuriale di Corsica cum'è cummissaru di l'espusizione " Corsica Cristiana ", è cum'è cuurdinatore cù Daniel Istria, pè e ricerche archeologiche nant'à u situ di Mariana.

Trè quistioni li sò state poste, eccu e so risposte :

Chì piazza occupa a Corsica in e vostre ricerche, è in a missione di l'Istitutu Universitariu sottu a vostra direzzione ?
- " L'istitutu Puntificale d'Archeolugia Cristiana hà una missione di furmazione a u core di a Chjesa Universale, è accoglie per trè anni studienti di cinque cuntinenti, titulari d'una maestria, o d'un' equivalente (Bac + 4 o 5). I prufessori sò circatori specialisti di l'urigine di u cristianismu ".

Chì piazza hè riservata à a Corsica ?
- " A Corsica cum'è tutte l'isule di u mediterraniu, occupa una piazza impurtante. L'istitutu à firmatu accordi in cullaburazione cù tutte l'Università sarde, è siciliana, chì l'avianu sullicitatu, d'altri sò in preparazione cù l'isula di Malta, è l'isula di Chipru in particulare. Un'annu fà, aghju fattu à pruposta à u presidente di l'Università di Corti, d'assucià quella di Corsica. Ghjè cusì chì st'ultimi anni, l'universitarii i più numerosi sò stati i sardi è i siciliani, parechji di sti studiente facenu i scavi di u situ di Mariana ".

Qualesse sò e priurità di a vostra azzione in Corsica ?
- " Sò numerose. Ci hè in primu à necessità di dà una furmazione cumpletta à sti giovani, in parallelu à i corsi teorichi ch'elli ponu riceve in Corti, o in l'altre Università, per via chì l'archeolugia ghjè soprattuttu una sperienza nant'à u terrenu. Sta furmazione cuncerna dinù e trafile chì ùn appartenenu à u duminiu archeologicu, in cullaburazione cù u Dipartimentu di l'Arti è l'I.U.T. Quist'annu 40 giovani corsi, 30 di l'Università di Corti seranu accolti in Mariana. Ci hè dinù a scuperta di a nostra storia, ricerche nant'à u terrenu, a pruspezzione di i scavi, è studii apprufunditi fatti in Mariana. Ciò chì ghjè statu intrapresu in a regione di Corti è di u Tavignanu trà u 1973 è u 1986, creandu cù Dumè Gambini, è l'ADRESCO (Association pour le Développement des Etudes et des Recherches dans le Cortenais et le Bassin du Tavignanu), poi cù François Flori Ouenikion. Dece campagne di scavi nant'à quattru siti di u curtinese (Santa Mariona, in Corti, San Ghjuvanni di U Ponte à u Larice, in Altiani, San Ghjuvan Battista, in Corti è Castellu, sempre nant'à u territoriu di a cumuna di Corti, cù una squadra di studienti, è di duttori, in lea cù u mondu assuciativu, è più particularmente l'associu " A Rinascita ", cù a participazione di e municipalità di a cumunità di e cumune, è al di là, rilancià st'attività chì serà cuurdinata scientificamente cù Jean Cancellieri. U nostru scopu hè di mette in valore stu patrimoniu per l'inseme di a nostra cumunità, è per quelli chì visitanu è tenenu caru a nostra regione ".

 

I scavi archeologichi di Mariana (7/9/2001)

A ceremonia ufficiale di a ripresa di i scavi nant'à u situ storicu di Mariana s'hè fatta sabbatu scorsu, in prisenza di l'eletti di a Corsica, frà i quali Jean Baggioni presidente di l'Assembla di Corsica, Filippu Pergola, rettore à l'institutu puntificale di ricerche archeologiche cristiane, è Mounir Bouchenaki, direttore generale, aggiuntu à a cultura à l'Unesco. I scavi facenu parte d'un Pruggettu Cullettivu di Ricerca (PCR), operaziunale dipoi u veranu di u 2000. Mubilizeghja vinti centri di ricerche (10 Francesi, 8 Italiani, 1 Spagnolu, 1 di a Cità di u Vaticanu). Giovani scientifichi di l'IUT, è una squadra di l'Università di Corti, serà diretta da u prufessore Marie-Madeleine Spella. St'ultimi porranu seguità furmazioni in u duminiu di scavi archeologichi, di restaurazione, di prisentazione di siti archeologichi, è geologichi. Una bella opportunità. A municipalità di Lucciana hà fattu l'acquistu di quattru ettere di terrenu à u nordu di a Canonica. Joseph Galletti ci spiega : " Avimu fattu un sforzu per cumprà stu terrenu, da quì à trè o quattru anni metteremu in piazza un museu ". Filippu Pergola uriginariu di Venacu, rettore di l'institutu puntificale d'archeolugia cristiana ghjè à u centru di l'operazione, dice : " Sò assai emuziunatu di truvami nant'à stu situ eccezziunale. U miò travagliu hè di cuurdinà l'inseme di i scavi. Ghjè un travagliu difficile, ma, cù l'aiutu di Daniel Istria, membru di a Scola francese di Roma, è Franck Allegrini, duttore in archeologia di l'Università di Corsica, simu reuniti per scopre d'altre pagine di a nostra storia ". Avà chì ghè avà, i circadori sanu pocu è nunda nant'à a cità rumana di Mariana. Edificata nant'à un situ eccezziunale à u primu seculu nanz'à Cristu, da u generale Marius chì li dà u so nome. Cità chì hà una pusizione strategica nant'à a costa à 3km da u mare. Ghjera prubabilmente un puntu centrale trà u mondu mediterraneu, è a Corsica di l'internu. L'anziani scavi anu permessu di scopre un situ paleocristinanu chì data prubabilmente di a fine di u Vsimu seculu : a più anziana catedrale di a Corsica, pussede trè navate, è un battisteru. Sti scavi sò stati pussibili grazia a u cuncorsu di a merria di Lucciana, pruprietaria di u situ, è di i mobuli, grazia dinù à a Direzzione regiunale di l'Affari culturali, di u Cunsigliu Generale di a Corsica Suprana, di a Cullettività Territuriale, è di l'associu culturale Mariana in a valle di u Golu. Ognunu brama di scrive d'altre pagine di a storia di stu situ, chì ùn hà ancu svelatu tutti i so secreti.

 

E ricchezze archeolugiche di a Corsica Suttana (13/8/2001)

E vistighje d'anziane civilizazione sò numerose in Corsica Suttana. Ci si trova siti preistorichi rimarchevuli chì datanu di parechji millenarii cum'è : Torre, Tappa, Ceccia, Arraghju. St'ultimu hè forse u più cunnusciutu, un situ di l'età di u bronzu cum'è quellu di Cuccuruzzu. Siti maestosi, ingirati di misteri, chì appartenenu à a civilizazione di i Castelli chì s'hè sviluppata à u secondu millenariu nanz'à Cristu.Vistighje chì testimunieghjanu di a vita di i so abitanti i « Korsi », chì praticavanu l'agricultura, a caccia, a pesca, a racolta di i frutti, è amaestravanu a metallurgia di u bronzu. D'una manera generale e muraglie sò alte di quattru metri, anzi tuttu è a dispusizione di u nentru, fatta di curridori à volte è nichji chì sò interressanti, per via di a tecnica arcaica, ancu si ste custruzzioni anu cambiatu cù u tempu, e civilizazioni successive, à un mumentu datu anu utilizatu o distruttu in parte ste realizazioni. U Castellu d'Arraghju nant'à a cumuna di San Gavinu di Carbini dumineghja u golfu di Purtivechju à un'altitudine di 245 metri, face pensà à una furtezza minerale. Cù un'accintu d'un'altezza di quattru metri, nant'à dui di largu. U situ hè diventatu un'abitaculu furtificatu chì lascia apparì trè strutture distinte è à u centru una corte di 450m ². Torre, picculi paisoli situati à u nordu di Purtivechju, anu datu u so nome à a cultura torreana. Oghje omu pò vede i resti d'un'inseme sprupusitatu cù una torra, più sottu e vistighe d'una torra ciclopeana. In Ceccia nant'una culletta si trova una torra chì serebbi stata reutilizata. In Sotta si trova u situ di a Tappa, furtificazioni chì serebbinu state occupate 4 000 anni fà. A Corsica Suttana hè ricca di maraviglie d'un'epica landana.

 

I scavi di Mariana in espusizione in Marseglia (10/7/2001)

L’espusizione intitulata “Tout feu, tout able: mille ans de verre antique dans le midi de la France”, inaugurata l’8 ghjugnu scorsu à u museu di Storia di Marseglia, prisenta frà d’altre numerose cullezzioni venute da i musei francesi è strangeri, una mostra rimarchevule d’oggetti in vetru chì pruvenenu da i scavi di u situ anticu di mariana (cumuna di Lucciana). Sti vetri messi in valore in una vitrina, ritenenu l’attenzione di u publicu per via di l’eleganza è per via quelli sò rari. Scavati da Mma Moracchini-Mazel, presidente di l’associu “Les amis de Mariana”, sti vetri sò stati imprestati pè tutta a durata di l’espusizione chì piglierà fine u 31 dicembre 2001.

Un pezzu di vetru di u IV seculu
Un pezzu di vetru, attibuitu à a seconda medità di u IV seculu, serrebbi cuntempurarenu di a basilica paloecristiana à pavimentu in musaiche, edificata frà l’annate 380 è 400.
Frà l’oggetti interressanti à vede si trovanu e forme decurate è un framentu in vetru sculpitu riprisentendu una scena d’un martiriu. Mma Danièle Foy, specialista di u vetru, è cummissarru di l’espusizione in Marseglia, averrebbi da publicà in i “cahier” un studiu di l’inseme di u materiale in vetru chì pruvene da Mariana è messi à ghjornu grazia à i scavi di Mma Moracchini-Mazel. Figuranu digià in u catalogu di Mma Foy, è M. Nenna, permettenu di capì megliu i scambi cummerciali chì si realizavanu cù a piccula cità purtuaria di Mariana à sapè (l’urigine, a datazione, a tecnica, ecc.). I “Cahiers Corsica” di a FAGEC anu publicatu una seria d’articuli cunsacrati à i scavi di Mariana hì cuncernanu i cimiterii, a numismatica, e musaiche, a fauna, l’architetture, ecc. U prussiimu “Cahier” chì escerà cù a signatura di Mlla F. Nucci, ferà l’evucazione di e prime campagne di scavi realizate trà l’annate 1936 è 1937, da Louis Leschi.
E persone chì bramanu d’avè e publicazioni, o rinsegnamenti cuncernendu i varii temi publicati in l’altri numeri (200 in tuttu), ponu scrive à : a Fagec, Maison des associations, centre commerciale Monte Stello, 20290 Borgo, o cunsultà u situ internet des Amis de Mariana (http://cerpam.multimania.com).