U SAMPETRACCIU (1890 - 1983)

 

 

Casata: NOTINI

Nome: Ghjannettu

Nascita: U 4 dicembre 1890 in San Petru di Venacu

Morte: In 1983 in Corti

 

Scrivanu è pueta

 

Opere publicate:

Rime, puesie varie, strufulette, punte di Minutu Grossu," A Muvra" 1927

I Successi di Natalone Zuccone, cumedia, "A Muvra" 1927

A Pulitica, cumedia, "A Muvra" 1928

Arcanghjula, cumedia, "A Muvra" 1930

U bascigliè di Fifina, cumedia, "A Muvra" 1932

Una veghja cù Barbarismi, "A Muvra" 1934

Dichiarazioni d'Amore, "A Muvra" 1934

Scartafacci muntagnoli, "U Muntese" 1968

Hà cullaburatu à A Tramuntana, A Muvra, l'Almanaccu di a Muvra, Baretta Misgia

 

Strattu:

 

A PULITICA

 

Attu II, scena prima

 

Ghjacumone (spassighjendu) : Allora dici tù, o Savè, chì quist'annu currimu un bruttu cavallu?

Saveriu : Imbeh!... Sentite, o sgiò Merre: per mè, l'affare hè più chè seriu. Sì no ùn ci sbrugliemu cù qualchì manichiccia, aghju paura ch'elli ùn ci lampinu à gambe à l'aria! Semu à e strinte, mirà!

Ghjacumone : Eh!...Semu à e strinte, semu à e strinte!...(Da parte): Ancu quessa hè vera. (À Saveriu): Voi altri v'annigate sempre in un bichjeru d'acqua. Ùn ci vole mancu à dà creditu à tutte e gazette chì correnu pè u paese! Mi dite ancu d'ùn cuntà più sopra a famiglia di Ghjilormu... Uff! Quandu a videraghju a crederaghju, è di prima, nò. Ghjilormu vutammi contru? Ùn ci spezzu mancu sonnu! Or voi, cunnuscite l'elettori secchi!

Ghjuvanni : Avete tortu, o sgiò Merre, d'ùn credela! Sì vo a vi pigliate cusì sopra sopra, puderestete ancu cascà da in altu! È ancu sapete ch'elle sò e donne chì cummandanu in casa di Ghjilormu!...