PITTIROSSU (1883 - 1961)

 

 

Casata: PERETTI

Nome: Tumasgiu Pasquale

Nascita: In 1883 in Ogliastru

Morte: In 1961 in Sénas (13)

 

Prufessore

 

Opere publicate:

Hà publicatu una mansa d'articuli in parechji ghjurnali: Le Petit Bastiais, Bastia Journal, U fucone, U Laricciu

Pachjeccu in Parigi, 1931

 

Strattu:

 

UNA NIVAGHJA IN ALISGIANI

 

Una sera di ghjennaghju, in 1896,in Pinzalone d'Alisgiani, nevava à issa più bella. Falavanu quelli stracci, bianchi è muti, chì ci vulia à vede. Un furesteru, biancu di neve chì paria un incamisgiatu, ghjunse à pichjà à a nostra porta è dumandò, in francese, s'ellu ci era un'usteria in paese. Babbu li rispose in francese chì ùn ci ne era, ma chì l'averebbi datu un cuchjaru di suppa, un tagliolu di casgiu è un lettu à saccone cù a so bella strapunta, è u fece entre.

U pinzutu s'inturchjò à u carminu per scallassi è asciuvassi, eppò si calò à tavulinu cù noi. Manghjò duie piattate di minestra cundita cù l'asciunghje chì l'accuzzò l'appitittu, ùn si fece pregà per ingollesi una frittata cù u lardu è per sciaccassi una pisticcina crostula cù un mezu palmu di figatellu ristitu. U vinu era scarsu ma l'acqua li piacque. Una tazzina di caffè fattu tandu. Cacciò di u so saccu una buttigliola di rumu bonu, è babbu è ellu a si viutonu guasi.

Quand'ellu fù cordu, parlò.

Annu Corsu, 1932